سەرۆکی لە کارلادراوی شارەوانی ئیستەنبووڵ: ساویلکە نیم و دەزانم بەشداریکردنم لە هەڵبژاردنی سەرۆکایەتی لێ قەدەغە کراوە
وێستگەنیوز_
پاش پێنج مانگ لە دەستگیرکردنی، ئەکرەم ئیمامئۆغلۆ، سەرۆکی گەورەشارەوانی لەکارلادراوی ئیستەنبووڵ کە ئێستا لە زیندانە رایگەیاند، ئامادەیە پشتگیریی کاندیدێکی دیکە بکات بۆ پۆستی سەرۆک کۆماری تورکیا.
بەرەبەیانیی رۆژی یەکشەممە 23ـی 3ـی 2025، لە چوارچێوەی ئەو لێکۆڵینەوەیەدا کە بە تۆمەتی گەندەڵی لە دژی گەورەشارەوانیی ئیستەنبووڵ دەستیپێکرد، ئەکرەم ئیمامئۆغڵو سەرۆکی گەورەشارەوانی ئیستەنبووڵ و 99 کەسی دیکە رەوانەی دادگای 'چاغڵایان' کران و داوای زیندانیکردنیان کرا. هەتا ئێستاش ئازاد نەکراوە و دادگاییش نەکراوە.
ئیمامئۆغلۆ لە یەکەم چاوپێکەوتنیدا بەشێوەی نووسراو لەگەڵ ماڵپەری بلوومبێرگی ئەمریکی رایگەیاندووە، شەرعیەتی دیموکراسی لە تورکیا لە لێواری لەناوچووندایە، ساویلکە نییە و دەزانێت بەفەرمی بەشداریکردنی لە هەڵبژاردنی سەرۆکایەتی تورکیای لێ قەدەغەکراوە.
ئاماژەی بەوەشکردووە، پێویستە ئۆپۆزسیۆن هاودەنگ بێت، ئەو ئامادەیە پاڵپشتی لە کاندیدێکی دیکە بکات بۆ پۆستی سەرۆک کۆماری تورکیا بەمەرجێک ئەو کەسە هەڵگری تێڕوانینی دادپەوەری و ئاشتی و گەشەسەندن بێت.
بەگوێرەی وتەی ماڵپەڕەکە، ئەکرەم ئیمامئۆغلۆ خۆی بۆ شەڕێکی یاسایی دوورودرێژ ئامادە دەکات، دەکرێت بێبەشی بکات لە بەشداریکردن لە هەڵبژاردنی سەرۆکایەتیی تورکیا، پێدەچێت دوورخستەوەی لە زەمینەی سیاسیی تورکیا کاردانەوە لە دەرەوەی ئەو وڵاتەش دروست بکات.
PM:12:10:14/08/2025
ئه‌م بابه‌ته 400
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت