سوپای ئیسرائیل: ئاگربەستی تەکتیکی و کاتی لە چەند ناوچەیەکی غەززە رادەگەیەنین

وێستگەنیوز-

سوپای ئیسرائیل ئاگربەستی کاتی و تەکتیکی لە چەند ناوچەیەکی غەززە راگەیاند بە مەبەستی گەیاندنی هاوکارییەکان.

ئەمڕۆ یەکشەممە 27ی تەموزی 2025، سوپای ئیسرائیل رایگەیاند، "ئاگربەستی تەکتیکی و کاتی لە چەند ناوچەیەکی غەززە رادەگەیەنین".

سوپای ئیسرائیل ئاماژەی بەوەداوە، "تا کاتێکی دیکە رۆژانە ئۆپەراسیۆن لە شاری مواسی س غەززە و دێربەلەح دەوەستێنین".

دەشڵێت، "ئاگربەستە کاتییەکە لەوشوێنانە دەبێت کە تیادا سوپا ئۆپەراسیۆنی نییە".

هەروەها وەزارەتی دەرەوەی ئیسرائیل رایگەیاند، "ئیسرائیل کەمکردنەوەی گرژییەکان بە مەبەستی مرۆیی لە ناوەندە سڤیلەکان و رێڕەوە مرۆییەکاندا جێبەجێ دەکات، بۆ رێگەدان بە دابەشکردنی هاوکارییەکان."

ئەمەش لەکاتێکدایە، شەوی رابردوو لەژێر فشاری نێودەوڵەتیدا ئیسرائیل لە رێگەی ئاسمانەوە رێگەی بە نەتەوەیەکگرتووەکان دا خۆراک و دەرمان بگەیەنێتە غەززە.

سوپای ئیسرائیل ئاماژەی بەوکرد، "یەکەم بڕی هاوکاریی بۆ غەززە لە ئارد، شەکر و خواردنی قوتووبەند پێکهاتووە، هاوکارییەکە لەلایەن رێکخراوە نێودەوڵەتییەکانەوە دابینکراوە".

بەگوێرەی نەخۆشخانەکانی کەرتی غەززە، تائێستا لانیکەم 124 کەس بەهۆی برسێتییەوە گیانیان لەدەستداوە، کە 84یان منداڵن.

AM:08:34:27/07/2025

ئه‌م بابه‌ته 128 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت