ئێران به‌كارهێنانی ئامێره‌كانی په‌یوه‌ندی له به‌رپرسان و پاسه‌وانه‌كانیان قه‌ده‌غه ده‌كات
وێستگه‌نیوز-
فه‌رمانده‌یی ئاسایشی ئه‌لیكترۆنی ئێران ڕۆژی سێشه‌ممه فه‌رمانێكی ده‌ركرد و به‌كارهێنانی ئامێره‌كانی په‌یوه‌ندی له به‌رپرسان و تیمه ئه‌منییه‌كانیی پاسه‌وانیان قه‌ده‌غه كرد.
به پێی ڕاپۆرتێكی ئاژانسی هه‌واڵی مێهری ئێران، پێده‌چێت ئه‌م ڕێوشوێنه به ئامانجی به‌رزكردنه‌وه‌ی ئاسایشی ئه‌لیكترۆنی و پاراستنی زانیارییه هه‌ستیاره‌كانی به‌رپرسان بێت.
ئه‌مه‌ش دوای كوشتنی چه‌ند سه‌ركرده‌یه‌كی سه‌ربازی و زانای ئێرانی دێت له ڕۆژی هه‌ینیه‌وه كه ئیسرائیل هێرشێكی له‌ناكاوی بۆ سه‌ر ئێران ده‌ستپێكرد.
یه‌حیئیل لیته‌ر باڵیۆزی ئیسرائیل له ئه‌مریكا له‌م دواییانه‌دا له راگه‌یه‌ندراوێكی سه‌رنجڕاكێشدا كه په‌یامی كۆدكراوی تێدایه، ئاشكرای كرد كه ته‌لئه‌بیب به نیازه هه‌ینی داهاتوو "ئۆپه‌راسیۆنێكی گه‌وره" دژی ئێران ئه‌نجام بدات.
له چاوپێكه‌وتنێكدا له‌گه‌ڵ ڕۆژنامه‌نووسی ئه‌مریكی لیندسای كیس، لیته‌ر وتی: "چاوه‌ڕوانی سوپرایزێك بكه‌ن له كۆتایی ئه‌م هه‌فته‌یه‌دا" به‌بێ ئه‌وه‌ی سروشتی ئۆپه‌راسیۆنه‌كه و كاتی وردی ئۆپه‌راسیۆنه‌كه و لایه‌نی ئامانجدار ئاشكرا بكات.
پێده‌چێت ناوبراو هۆشداری بدات له‌وه‌ی له كۆتایی ئه‌م هه‌فته‌یه‌دا ئۆپه‌راسیۆنێكی سه‌ربازی توند دژی ئێران ئه‌نجام ده‌درێت و ده‌ڵێت: "كاتێك دۆخه‌كه ئارام ده‌بێته‌وه، شه‌وی پێنجشه‌ممه و هه‌ینی سوپرایز ده‌بێت كه ئۆپه‌راسیۆنی په‌یجه‌ره‌كان ساده ده‌ربكه‌وێت".
ناوبراو ئاماژه‌ی به هێرشه‌كه‌ی ئیسڕائیل له مانگی ئه‌یلولی ساڵی رابردوو له لوبنان كرد كه په‌یجه‌ر و ڕادیۆكانی كرده ئامانج كه ئه‌ندامانی حزبوڵای لوبنانی به‌كاریان ده‌هێنا.
به‌پێی ڕاپۆرتێكی ئاژانسی هه‌واڵی فارس، ئیسرائیل بۆ ئه‌نجامدانی تیرۆر له ناوخۆی ئێران، ته‌كنه‌لۆژیای شوێنپێهه‌ڵگرتنی مۆبایل، ته‌نانه‌ت له‌كاتی كوژانه‌وه‌شدا به‌كارده‌هێنێت.
PM:02:57:17/06/2025
ئه‌م بابه‌ته 224
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت