هاوپەیمانیی بەڕێوەبردنی دەوڵەت داوای پاراستنی خۆپیشاندەران و پەسەندکردنی بودجە دەکات
وێستگەنیوز-
هاوپەیمانیی
بەڕێوەبردنی دەوڵەت لە 40ەمین کۆبوونەوەی خولی خۆیدا جەختی لەسەر مافی
یاسایی خۆپیشاندەران و پاراستنیان کردەوە، هاوکات داوای کرد یاسای بودجە لە وادەی
دەستووری خۆیدا پەسەند بکرێت و سەرچاوەکانی داهاتی نیشتمانی هەمەجۆر بکرێن.
بەپێی
ڕاگەیەندراوێکی نوسینگەی راگەیاندنی سەرۆک وەزیران، عەلی زەیدی سەرۆکی ئەنجوومەنی
وەزیران میوانداریی کۆبوونەوەی هاوپەیمانیی بەڕێوەبردنی دەوڵەتی کرد، بە
ئامادەبوونی سەرۆک کۆمار و سەرۆکی پەرلەمان و سەرۆکی ئەنجوومەنی باڵای دادوەری.
دەشڵێت، لە کۆبوونەوەکەدا پەرەسەندنە ئەمنی و سەربازییە
ناوخۆیی و هەرێمییەکان تاوتوێ کران و جەخت لە گرنگییدان بەم بابەتانە کرایەوە لە
سایەی ئاڵۆزییە هەرێمی و نێودەوڵەتییەکاندا، هەروەها داوا لە هەموو لایەک کرا
پابەندی پاراستنی ئاسایش و سەروەریی وڵات بن.
هاوپەیمانییەکە رایشی گەیاند، مافی خۆپیشاندان لە
دەستووردا دەستەبەر کراوە و داوای کرد پاراستنی پێویست بۆ خۆپیشاندەران دابین
بکرێت و گوێ لە داواکارییە رەواکانیان بگیرێت، بە مەرجێک زیان بە موڵکی گشتی و
ئاسایشی هاووڵاتییان نەگەیەنرێت و ڕێگەکان دانەخرێن.
لە بەشێکی دیکەی کۆبوونەوەکەدا، جەخت لەسەر پەسەندکردنی پڕۆژەیاسای
بودجە لە کات و وادەی دیاریکراوی دەستووریدا کرایەوە، تاوەکو دادپەروەری لە
دابەشکردنی ساماندا بەدی بێت و پێداویستییە خزمەتگوزارییەکانی هاووڵاتییان دابین
بکرێن، هاوکات هاوپەیمانییەکە دەستخۆشی لە
هەنگاوەکانی دامەزراوەکان کرد بۆ هەمەجۆرکردنی سەرچاوەکانی داهاتی نیشتمانی و
فرەچەشنکردنی دەروازەکانی هەناردەی نەوت بە مەبەستی بەهێزکردنی سەقامگیریی ئابووری.
PM:11:48:24/10/2026
ئه‌م بابه‌ته 124
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت