سودانی بۆ ماکرۆن: ئەو کەسانەی بە درۆن هێرشیانکردووەتە سەر هەولێر دەستگیرکراون
وێستگەنیوز-
لە پەیوەندییەکی تەلەفۆنی نیوان سەرۆک وەزیرانی عێراق و سەرۆکی
فەرەنسا، سودانی هەواڵی دەستگیرکردنی ئەو کەسانی راگەیاند کە لە هەولێر هێرشیان
کردبووە سەر بنکەیەکی هاوپەیمانان.
نووسینگەی راگەیاندنی سەرۆک وەزیرانی عێراق بڵاویکردەوە، ئەمڕۆ
چوارشەممە 8ـی نیسانی 2026، محەمەد شیاع سودانی، سەرۆک وەزیرانی عێراق پەیوەندییەکی
تەلەفۆنی لەلایەن ئیمانوێل ماکرۆن، سەرۆک کۆماری فەرەنساوە پێگەیشت، لە پەیوەندییەکەدا
باس لە دۆخی گشتیی ناوچەکە و هەوڵەکان بۆ راگرتنی شەڕ و ململانێکان کرا.
سودانی جەختی لە گرنگی بەردەوامبوونی ئاگربەست کردەوە بەو
ئاراستەیەی کە سەقامگیری لە ناوچەکە و جیهاندا بچەسپێنێت، هەروەها هەردوولا باسیان
لە "هێرشە ئازاربەخشەکانی" سەر لوبنان و لێکەوتە مەترسیدارەکانی بۆ سەر
ئاسایشی ناوچەکە کرد و جەختیان لە پاراستنی هاووڵاتیانی مەدەنی کردەوە.
لە تەوەرێکی دیکەی پەیوەندییەکەدا، سەرۆکوەزیرانی عێراق
ئاماژەی بە هەوڵەکانی هێزە ئەمنییەکانی عێراق دا لە دەستگیرکردنی ئەو تۆمەتبارانەی
تێوەگلابوون لە ئاراستەکردنی فڕۆکەیەکی بێفڕۆکەوان بۆ سەر شوێنێکی نزیک هەولێر، کە
تێیدا ڕاوێژکارانی هاوپەیمانی نێودەوڵەتی لێبوو و بەهۆیەوە ئەفسەرێکی فەرەنسی گیانی
لەدەستدابوو. سودانی رایگەیاند، ئەم هەنگاوە پابەندیی حکوومەت بە چەسپاندنی سەروەری
یاسا لە تەواوی عێراق نیشان دەدات.
لای خۆیەوە، ئیمانوێل ماکرۆن ستایشی هەوڵەکانی عێراقی کرد لە
پاراستنی سەقامگیری ناوچەکە. هاوکات پیرۆزبایی لە سودانی کرد بەبۆنەی سەرکەوتنی هەڵبژاردەی
تۆپی پێی عێراق بۆ یارییەکانی کۆتایی مۆندیال و خۆشحاڵی خۆی دەربڕی کە هەردوو هەڵبژاردەی
عێراق و فەرەنسا لە یەک کۆمەڵەدا ڕووبەڕووی یەک دەبنەوە.
PM:11:21:08/04/2026
ئهم بابهته 264
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت