وتەبێژی سودانی: لێکۆڵینەوە لە هێرشکردنە سەر نێردە دیپلۆماسییەکان دەکەین
وێستگەنیوز-
وتەبێژی فەرماندەی گشتیی
هێزە چەکدارەکانی عێراق هێرشکردنە سەر نێردە دیپلۆماسییەکان بە "کردەوەی تیرۆریستی"
ناولێدەبات و دەڵێت: لێکۆڵینەوە لەو هێرشانە دەکەن.
ئەمڕۆ یەکشەممە، 22ـی
ئاداری 2026، سەباح نوعمان، وتەبێژی فەرماندەی گشتیی هێزە چەکدارەکانی عێراق رایگەیاند،
لێکۆڵینەوەکان لەبارەی هێرشکردنە سەر نێردە دیپلۆماسییەکان و باڵیۆزخانەکان بەردەوامن.
هۆشداریشی دا کە ئەم جۆرە کارانە دەبنە هۆی لەکەدارکردنی ناوبانگی وڵات و گۆشەگیرکردنی
عێراق لەسەر ئاستی نێودەوڵەتی.
سەباح نوعمان لە لێدوانێکدا
بۆ میدیا عێراقییەکان ئاماژەی بەوە کرد، سەرۆکی ئەنجوومەنی باڵای دادوەری ئەم هێرشانەی
خستووەتە خانەی "کردەوە تیرۆریستییەکان" بەگوێرەی یاسای ژمارە 13ـی ساڵی
2005. گوتیشی: "ئەم کارانە ئیدانەکراون، چونکە پێگەی دیپلۆماسی عێراق لاواز دەکەن
و دەبنە هۆی شەرمەزارکردنی حکوومەت بەرامبەر کۆمەڵگەی نێودەوڵەتی."
ناوبراو جەختی کردەوە،
حکومەت بەردەوام کاری کردووە بۆ گەڕاندنەوەی شکۆی نێودەوڵەتی عێراق و وڵات بووەتە
بەشێک لە چارەسەری کێشەکانی ناوچەکە. ئاماژەی بەوەش کرد، عێراق لە ساڵانی
رابردوودا پۆستی گرنگی وەک سەرۆکایەتی لووتکەی عەرەبی و چەندین دەستەی نێودەوڵەتی
وەرگرتووە، ئەمەش نیشانەی متمانەی جیهانە بە رۆڵی کاریگەری عێراق.
سەبارەت بە گرژییەکانی
ناوچەکە، نوعمان ئاماژەی بە هۆشدارییەکانی محەممەد شیاع سودانی، سەرۆکوەزیرانی عێراق
کرد و وتی: "هەر تێکچوونێکی ئەمنی لە ناوچەکەدا، لێکەوتە و کاریگەرییە خراپەکانی
بۆ سەر هەمووان دەبێت." هەروەها باسی لەوەش کرد، ئێستا جۆرێک لە پشێوی سیاسی،
ئەمنیی و ئابووریی لە ناوچەکەدا دەبینرێت کە تەنیا ئێران ناگرێتەوە، بەڵکو کاریگەری
کردووەتە سەر وڵاتانی کەنداو و تەواوی جیهانیش.
سەباح نوعمان راشیگەیاند،
لەبەر بەرژەوەندییەکانی لێکۆڵینەوە، ئێستا گونجاو نییە وردەکاریی زیاتر لەبارەی
ناسنامەی ئەنجامدەرانی هێرشەکان بۆ سەر نێردە دیپلۆماسییەکان ئاشکرا بکرێت.
PM:01:25:22/03/2026
ئهم بابهته 228
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت