عێراق و سوریا له‌سه‌ر زیادكردنی هاوكارییه ئه‌منییه‌كان رێككه‌وتن
وێستگه‌نیوز-
ئه‌مڕۆ پێنجشه‌ممه 28ی ئابی 2025 سه‌رچاوه‌یه‌كی هه‌واڵگری عێراق ئاشكرای كرد كه حه‌مید ئه‌لشه‌تری سه‌رۆكی ده‌زگای هه‌واڵگری عێراق له‌گه‌ڵ ئه‌حمه‌د ئه‌لشه‌رع سه‌رۆكی سوریا له دیمه‌شقی پایته‌خت كۆبووه‌ته‌وه.
ئه‌و سه‌رچاوه‌یه به ئاژانسه فه‌رمی هه‌واڵه‌كانی عێراق "واع"ی وت كه "ئه‌لشه‌تری و ئه‌لشه‌رع تاووتوێی ئاسایشی سنووره‌كان و رووبه‌ڕووبوونه‌وه‌ی تیرۆر و دۆخی ره‌وه‌ندی عێراقییان له سوریا كردووه".
به‌پێی ئه‌و سه‌رچاوه‌یه، هه‌ردوولا رێككه‌وتوون له‌سه‌ر "زیادكردنی هاوكارییه ئه‌منییه‌كان بۆ به‌رزكردنه‌وه‌ی ئاسایش و سه‌قامگیری ناوچه‌كه".
ئه‌و سه‌رچاوه‌یه جه‌ختی له‌وه كرده‌وه كه "سه‌ردانه‌كه‌ی سه‌رۆكی ده‌زگای هه‌واڵگری عێراق بۆ دیمه‌شق به فه‌رمانی محه‌مه‌د شیاع سودانی سه‌رۆك وه‌زیران بووه".
هاوكات ئه‌لشه‌تری سه‌ردانی باڵیۆزخانه‌ی عێراقی له دیمه‌شق كرد و له‌گه‌ڵ هه‌ڵسووڕێنه‌ری كاروباری عێراق كۆبووه‌وه و گوێی له كێشه‌كانی به‌رده‌م ره‌وه‌ندی عێراقی له سوریا و ڕێگاكانی چاره‌سه‌ركردنیان گرتووه.
سه‌رچاوه‌كه ئاشكرای كردووه كه سه‌رۆكی ده‌زگای هه‌واڵگری په‌یامێكی سودانی به سه‌رۆكی سوریا گه‌یاندووه سه‌باره‌ت به "په‌ره‌پێدانی په‌یوه‌ندییه دووقۆڵییه‌كان و تێپه‌ڕاندنی ئاسته‌نگه هاوبه‌شه‌كان".
ئه‌مه دووه‌م سه‌ردانی به‌رپرسی هه‌واڵگریی عێراق بۆ دیمه‌شق دوای گۆڕینی ڕژێم له سوریا. ڕۆژی 25ی نیسانی 2025 به حه‌مید ئه‌لشه‌تری به سه‌رۆكایه‌تی شاندێكی فه‌رمی حكومه‌ت له‌گه‌ڵ سه‌رۆكی سوریا و ژماره‌یه‌ك به‌رپرسی حكومی ئه‌و وڵاته كۆبووه‌وه.
PM:09:15:28/08/2025
ئه‌م بابه‌ته 428
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت