مالیكی هۆشداری ده‌دات له دواخستنی پرۆسه‌ی هه‌ڵبژاردن
وێستگه‌نیوز-
سه‌رۆكی ئیئتیلافی ده‌وڵه‌تی قانوون هۆشداری ده‌دات له‌وه‌ی گه‌ر هه‌ڵبژاردنی په‌رله‌مانی عێراق له كاتی خۆیدا ئه‌نجام نه‌درێت، پرۆسه‌ی سیاسی هه‌ره‌س ده‌هێنێت.
ئه‌مڕۆ یه‌كشه‌ممه نوری مالیكی، سه‌رۆكی ئیئتیلافی ده‌وڵه‌تی قانوون له دیدارێكی له‌گه‌ڵ كۆمه‌ڵێك كه‌سوكاری شه‌هیدان و برینداران وتی: "هه‌ڵبژاردنی داهاتووی په‌رله‌مانی عێراق له‌كاتی خۆیدا به‌ڕێوه‌ده‌چێت و به‌هیچ شێوه‌یه‌ك گۆڕانكاری تیادا ناكرێت".
وتیشی: "ئه‌گه‌ر دوابخرێت، پڕۆسه‌ی سیاسی وڵات هه‌ره‌س ده‌هێنت و په‌رله‌مان و حكومه‌ت ره‌وایه‌تیان نامێنێت".
جه‌ختیشی له‌وه كرده‌وه كه "هیچ كه‌س ناتوانێت ده‌سته‌ی لێپرسینه‌وه و دادپه‌روه‌ری هه‌ڵبوه‌شێنێته‌وه، چاره‌نوسی ده‌سته‌كه به‌ستراوه‌ته‌وه به ده‌ستوره‌وه و نه‌بوونی به مانای ئاژاوه‌گێڕی دێت".
سه‌رۆكی ئیئتیلافی ده‌وڵه‌تی قانوون ده‌سته‌ی لێپرسینه‌وه و دادپه‌روه‌ری به‌رزنرخاند له پشكنینی ناوی كاندیده به‌شداره‌كان له هه‌ڵبژاردنه‌كاندا.
داواشی له گه‌لی عێراق كرد به‌شداری له‌م "شایسته نیشتمانی و ده‌ستورییه‌دا بكه‌ن، به‌و پێیه‌ی بناغه‌ی پێكهێنانی حكومه‌ت و به‌رده‌وامبونی پرۆسه‌ی سیاسییه".
مالیكی راشیگه‌یاند كه "عێراق وڵاتی ئێمه‌یه، ڕێگه ناده‌ین هیچ كه‌سێك ده‌ستدرێژی بكاته سه‌ری، له سایه‌ی گه‌له‌كه‌یدا به‌هێز و خۆڕاگر ده‌مێنێته‌وه".
PM:08:58:24/08/2025
ئه‌م بابه‌ته 456
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت