ئەمریکا بۆ عێراق: دەستوبرد لە کشانەوەی هێزەکانمان دەکەین
وێستگەنیوز_
بە شێوەیەکی چاوەڕواننەکراو، ئەمریکا پەلە لە کشانەوەی هێزەکانی لە عێراق دەکات و رایدەگەیەنێت، "پابەند نابین بەو خشتە زەمەنییەی بۆ ئەو مەبەستە دیاریمان کردووە".
بەگوێرەی هەواڵێکی ماڵپەڕی سکای نیوز لە زاری سەرچاوەیەکەوە، بە شێوەیەکی لەناکاو ئەمریکا بڕیاریی داوە سەرجەم سەربازەکانی لە بنکەی سەربازی عەین ئەسەد و ڤیکتۆریا لە عێراق بکشێنێتەوە و بەشێکیان رەوانەی هەولێر و بەشەکەی دیکەشیان رەوانەی وڵاتە عەرەبییەکانی دراوسێ بکات.
ئاماژەی بەوەشکردووە، لایەنی عێراقی ئاگادارکراونەتەوە کە دەستوبرد لە کشانەوەی ئەو هێزانە دەکەن و پابەند نابن بەو خشتە زەمەنییەی لەسەری رێککەوتوون.
ئەمە لە کاتێکدایە، بڕیاربوو مانگی داهاتوو تەواوی هێزەکانی ئەمریکا بێجگە لە راوێژکارەکان، لە بنکەکانی عەین ئەسەد و ڤیکتۆریا بکشێننەوە و پرۆسەکەش بە چەند قۆناغێک تێبپەڕێت، بەڵام ئێستا پلانەکە گۆرانکاری بەسەردا هاتووە.
رۆژی یەكشەممە، 17ـی ئابی 2025، حوسێن عەلاوی، ڕاوێژکاری سەرۆک وەزیرانی عێراق، لە لێدوانێکیدا بۆ ئاژانسی هەواڵی عێراقی ئاشکرای کرد، مانگی داهاتوو ئەرکی هاوپەیمانان لە بەغدا و عەین ئەسەد کۆتایی دێت.
رۆژی دواتر، باڵیۆزخانەی ئەمریکا لە بەغدا، راگەیەنراوێکی لەبارەی کۆتاییهاتنی ئەرکی هاوپەیمانیی نێودەوڵەتی دژ بە داعش لە عێراق، بڵاوکردەوە و وتی: "ئەرکی هاوپەیمانیی نێودەوڵەتی لە عێراقدا بۆ هاوبەشییەکی ئەمنیی دوولایەنە، دوولایەنەی زیاتر تەقلیدی دەگۆڕدرێت."
دووپاتیشی کردەوە، "ئەمە کۆتایی کاری هاوپەیمانیی نێودەوڵەتی نییە بۆ شکستپێهێنانی داعش، بەڵکو هەوڵە مەدەنییەکانی بە سەرکردایەتییەکی مەدەنی لەسەر ئاستی جیهان بەردەوام دەبێت؛ و وردەکارییەکانی پەیوەست بە پلان و ئۆپەراسیۆنە سەربازییەکانیان، رەوانەی وەزارەتی بەرگریی ئەمریکا دەکرێن."
PM:03:11:24/08/2025
ئه‌م بابه‌ته 1824
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت