هۆشیار زێباری: له هه‌ڵبژاردنی داهاتووی په‌رله‌مانی عێراقدا ساخته‌كاری ده‌كرێت
وێستگه نیوز-
هۆشیار زێباری ئه‌ندامی ده‌سته‌ی كارگێڕیی مه‌كته‌بی سیاسیی پارتی دیموكراتی كوردستان له ئێستاوه گومان له‌سه‌رهه‌ڵبژاردنی داهاتووی په‌رله‌مانی عێراق دروست ده‌كات و ده‌ڵێت: "ساخته‌كاری ده‌كرێت".
هۆشیار زێباری ئه‌ندامی ده‌سته‌ی كارگێڕیی مه‌كته‌بی سیاسیی پارتی دیموكراتی كوردستان له هه‌ژماری خۆی له پلاتفۆڕمی (X) نووسیوویه‌تی: "پرۆسه‌ی هه‌ڵبژاردنی داهاتووی په‌رله‌مانی عێراق پاك و بێگه‌رد نابێت، به‌هۆی ئه‌وه‌ی سه‌رچاوه‌كانی ده‌وڵه‌ت له رێگه‌ی پێشكه‌شكردن پرۆژه و گرێبه‌ست بۆ هه‌ندێك بازرگان به‌ده‌ر له ڕێنماییه‌كانی گرێبه‌ستی حكومی، به‌كار ده‌هێنرێت".
هۆشیار زێباری ده‌ڵێت: "دامه‌زراندنی لیستی چاودێری كۆمه‌ڵایه‌تی بۆ به‌هیلاكبردنی ئابووریی وڵات و دابه‌شكردنی ملیاره‌ها دۆلار به‌سه‌ر كاندیده‌كانی به‌شدار له پرۆسه‌ی هه‌ڵبژارن و كڕینی كارتی ده‌نگده‌ر، ئه‌وه پشتڕاست ده‌كه‌نه‌وه كه له هه‌ڵبژاردنی داهاتوودا ساخته‌كاری ده‌كرێت".
ئه‌و به‌رپرسه‌ی پارتی داواش له ده‌سه‌ڵاتی دادوه‌ری عێراق و نێرده‌ی نه‌ته‌وه یه‌كگرتووه‌كان (یۆنامی) و كۆمسیۆنی باڵای ھه‌ڵبژاردنه‌كان ده‌كات "بێنه سه‌ر هێڵ و رێوشوێنی توند له دژی سه‌رپێچیكاران بگرنه‌به‌ر و ناویان ئاشكرا بكه‌ن له پێناو شه‌فافبوونی پرۆسه‌ی هه‌ڵبژاردنی داهاتوو".
بڕیاره هه‌ڵبژاردنی ئه‌نجومه‌نی نوێنه‌رانی عێراق له 11ی تشرینی دووه‌می ئه‌مساڵ ئه‌نجام بدرێت. كۆمسیۆنی هه‌ڵبژاردنه‌كانیش به‌رده‌وامه له ئاماده‌كارییه‌كانی بۆ ئه‌نجامدانی پرۆسه‌كه.
PM:11:17:23/08/2025
ئه‌م بابه‌ته 808
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت