عێراق وه‌ڵامی نیگه‌رانییه‌كه‌ی باڵیۆزخانه‌ی ئه‌مریكای دایه‌وه
وێستگه‌نیوز-
سه‌باح نوعمان وته‌بێژی محه‌مه‌د شیاع سودانی فه‌رمانده‌ی گشتیی هێزه چه‌كداره‌كانی عێراق وه‌ڵامی نیگه‌رانییه‌كه‌ی باڵیۆزخانه‌ی ئه‌مریكای دایه‌وه و جه‌ختی له‌وه كرده‌وه كه چه‌كداره تیرۆریسته‌كانی داعش مه‌ترسی بۆ سه‌ر وڵات دروست ناكه‌ن.
نوعمان به ئاژانسی فه‌رمی هه‌واڵه‌كانی عێراق (واع)ی وت: "چه‌كدارانی داعش مه‌ترسی له‌سه‌ر عێراق دروست ناكه‌ن، هێزه ئه‌منییه‌كانیشمان به‌توانا و ئاماده‌ن بۆ مامه‌ڵه‌كردن له‌گه‌ڵ پێشهاته ئه‌منییه‌كان".
وتیشی: "رۆژانه چاودێری ئه‌منی و هه‌واڵگری و ئۆپه‌راسیۆن له دژی چه‌كداره تیرۆریستییه‌كان له هه‌ر شوێنێك بن، ئه‌نجام ده‌ده‌ین، و له سایه‌ی ئیراده و وریایی هێزه ئه‌منییه‌كان گورزی به‌رده‌وامیان لێده‌درێت".
ئاماژه‌ی به‌وه‌شدا كه "سنووره‌كان به‌ته‌واوی پارێزراون، هه‌ر پێشهاتێكی ناوچه‌كه‌یش راسته‌وخۆ كاریگه‌ریی له‌سه‌ر ئاسایشی عێراق نابێت، دڵنیاین له تواناكانی هێزه ئه‌منییه‌كان له‌ڕووی مه‌یدانی و هه‌واڵگرییه‌وه".
ناوبراو له درێژه‌ی قسه‌كانیدا باسی له‌وه كرد كه "نیگه‌رانییه نێوده‌وڵه‌تییه‌كان سه‌باره‌ت به چه‌كدارانی داعش په‌یوه‌ندی به دۆخی عێراقه‌وه نییه، ئه‌و رێكخراوه به شێوه‌یه‌كی سروشتی هه‌ڕه‌شه‌یه‌كی ناوچه‌یی و نێوده‌وڵه‌تییه و له چه‌ند وڵاتێكدا بوونی هه‌یه، ئه‌وه‌نده‌ی په‌یوه‌ندی به عێراقه‌وه هه‌یه، ڕێكخراوه‌كه ئیفلیج بووه و له‌لایه‌ن هێزه ئه‌منییه‌كانه‌وه گورزی به‌رده‌وامی لێده‌درێت".
ئه‌م وتانه‌ی وته‌بێژی فه‌رمانده‌ی گشتی هێزه چه‌كداره‌كانی عێراق دوای ئه‌وه هات كه باڵیۆزخانه‌ی ئه‌مریكا له به‌غدا له هه‌ژماری فه‌رمی خۆی له پلاتفۆرمی (X) نووسی: "ئه‌مریكا به‌رده‌وامه له پێشینه‌دان به هاوبه‌شییه‌كانی له‌گه‌ڵ هاوپه‌یمانان و لایه‌نه‌كانی ناوچه‌كه له شه‌ڕی به‌ره‌نگاربوونه‌وه‌ی تیرۆر. ئێمه نیگه‌رانی قووڵی خۆمان ده‌رده‌بڕین سه‌باره‌ت به جموڵی به‌رده‌وام و فراوانبوونی داعش و قاعیده له‌ناوچه‌كه‌دا".
باڵیۆزخانه‌كه ده‌ڵێت: "ئه‌مریكا ده‌ستخۆشی له وڵاتانی ئه‌ندامی نه‌ته‌وه یه‌كگرتووه‌كان ده‌كات بۆ به‌رده‌وامیدان به فشاره‌كانی به‌ره‌نگاربوونه‌وه‌ی تیرۆر له عێراق و سوریا و سۆماڵ".
PM:09:48:23/08/2025
ئه‌م بابه‌ته 656
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت