قەیس خەزعەلی: فشارە دەرەکییەکان دژی دەرکردنی یاسای حەشدی شەعبی گەیشتووەتە ئاستێکی زۆر مەترسیدار

وێستگەنیوز-

ئەمینداری عەسائیبی ئەهلی هەق رایدەگەیەنێت، ئەوانەی داوای هەڵوەشاندنەوە یان یەکخستنی هێزەکانی حەشدی شەعبی دەكەن یان بە مەبەست و ئاگاداری پیلانێکن کە عێراق دەکاتە ئامانج، ئاماژە بەوەشدەکات، فشارە دەرەکییەکان دژی دەرکردنی یاسای حەشدی شەعبی، گەیشتووەتە ئاستێکی زۆر مەترسیدار.

قەیس خەزعەلی، ئەمینداری عەسائیبی ئەهلی هەق لەمیانەی بەشداریکردنی لە بۆنەیەکی ئایینی وتەیەکی پێشکەش کرد و رایگەیاند، "داواكانی هەڵوەشاندنەوە یان یەکخستنی هێزەکانی حەشدی شەعبی، ئامانجیان دەرهێنانی خاڵی هێزی بنەڕەتی و گەرەنتی راستەقینەیە لە دەستی دەوڵەتی عێراق".

ئاماژەی بەوەشکرد، "ئەوانەی ئەو داوایە دەكەن یان بە مەبەست و ئاگاداری پیلانێکن کە عێراق دەکاتە ئامانج، یان نەزان و گەمژەن".

غەزعەلی وتی، "فشارە دەرەکییەکان دژی دەرکردنی یاسای حەشدی شەعبی، گەیشتووەتە ئاستێکی زۆر مەترسیدار، هەندێک لە هەڕەشەكان سەپاندنی سزای ئابووری لەخۆدەگرێت، کە نەوت و داهات و تەنانەت دۆلاری هەناردەکراو لەلایەن ئەمریکاوە دەگرێتەوە".

وتیشی، ئامانجی ئەم فشارانە رێگریکردنە لە دەرکردنی یاسایەکی نوێ کە رەوایەتی حەشد بچەسپێنێت، بوونی چەترێكی یاسایی، بە واتای دانپێدانانی پەرلەمانی عێراقە بە حەشدی شەعبیدا وەک دەزگایەكی فەرمی".

ئەوەشی خستەڕوو، "ئەگەر داواكە پێویستی هەڵوەشاندنەوە یان تێكەڵكردنێتی، بە راشکاوی و هێمنی دەڵێم، ئێوە لە خەیاڵدان، ئەمە بۆ ئێوە لە ئەستێرەکانی ئاسمان دوورترە، حەشد بۆ عێراقییەکان مەسەلەی بوون و گەرەنتییە بۆ ئاسایش و ژیانیان".

AM:09:28:23/08/2025

ئه‌م بابه‌ته 1072 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت