مانگی سووری عێراقی لە چلەی ئیمام حوسێندا فریاگوزاریی تەندروستی پێشکەش بە زیاتر لە 980 هەزار زیارەتکار کردووە
وێستگەنیوز_
مانگی سووری عێراق دەڵێت، لە چلەی ئیمام حوسێن دا خزمەتگوزاری فریاگوزاریی و تەندروستییان پێشکەش بە زیاتر لە 980 هەزار زیارەتکارانی عێراقی و بیانی کردووە.
بەگوێرەی راگەیەندراوێکی مانگی سووری عێراقی، تیمەکانیان خزمەتگوزاریی تەندروستی و پزیشکی و فریاگوزاری سەرەتاییان پێشکەش بە 980 هەزار و 319 زیارەتکاری عێراقی و بیانی کردووە، کە لە پارێزگاکانی عێراقەوە هاتوون. "ئەمە جگە لە پێشکەشکردنی خزمەتگوزاریی مرۆیی بۆ زیارەتکارانی بیانی کە لە دەروازە سنوورییەکانی هەولێر و بەسرە و واست و دیالەوە هاتوونەتە کەربەلا بۆ رێوڕەسمی چلەی ئیمام حوسێن."
ئاماژە بەوەشکراوە، ئێمە؛ تیمە خۆبەخشەکانمان لە پارێزگاکان و دەروازە سنوورییەکان بڵاوکردووەتەوە و کۆمەڵێک خزمەتگوزارییان پێشکەش کردووە، لەوانە، چاودێری تەندروستی سەرەتایی کە 184 هەزار و 232 کەس لێی سوودمەند بوون، هەروەها سێ هەزار و 165 نەخۆش بە ئەمبولانس گواستراونەتەوە نەخۆشخانەکان.
عەباس بەهادلی، وتەبێژی وەزارەتی ناوخۆی عێراقیش ئاشکرای کردووە، لە ماوەی ئەم مانگەدا، چوار ملیۆن و 100 هەزار زیارەتکاری بیانی بۆ بەشداری لە چلەی ئیمام حوسێن هاتوونەتە ناو خاکی عێراقوە.
PM:01:02:14/08/2025
ئه‌م بابه‌ته 476
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت