سودانی سه‌رۆكایه‌تی كۆبوونه‌وه‌یه‌كی ئه‌منی به‌په‌له‌ی كرد
وێستگه‌نیوز –
محه‌مه‌د شیاع سودانی سه‌رۆك وه‌زیران و فه‌رمانده‌ی گشتی هێزه چه‌كداره‌كانی عێراق سه‌رۆكایه‌تی كۆبوونه‌وه‌یه‌كی ئه‌منی به‌په‌له‌ی كرد و تیایدا جه‌ختی له‌وه كرده‌وه كه هیچ لایەنێك لە سەروی یاساوە نییە.
نووسینگه‌ی راگه‌یاندنی سه‌رۆك وه‌زیرانی عێراق له راگه‌یه‌ندراوێكدا ئاماژه‌ی به‌وه‌دا كه ئه‌مڕۆ یه‌كشه‌ممه، محه‌مه‌د شیاع سودانی سه‌رۆك وه‌زیران و فه‌رمانده‌ی گشتیی هێزه چه‌كداره‌كان سه‌رپه‌رشتی كۆبوونه‌وه‌یه‌كی ئه‌منی به‌په‌له‌ی كرد، كه جێگری فه‌رمانده‌ی ئۆپه‌راسیۆنه هاوبه‌شه‌كان و فه‌رمانده‌ی ئۆپه‌راسیۆنه‌كانی به‌غدا و ئه‌فسه‌رانی ئه‌و هێزه ئه‌منییه‌ی كه وه‌ڵامی هێرشه‌كه‌یان بۆ سه‌ر به‌ڕێوه‌به‌رایه‌تییه‌كی كشتوكاڵ له به‌ری كه‌رخی به‌غدا دایه‌وه، ئاماده‌بوون.
له كۆبوونه‌وه‌كه‌دا سودانی جه‌ختی له‌سه‌ر پێویستی نەرمی نەنواندن لە ئەرکی پاراستنی یاسا و پارێزگاریكردن لە دامەزراوەکانی دەوڵەت كردەوە، لەگەڵ بەردەوامبون لە لێکۆڵینەوەکان بۆ ئاشکراکردنی وردەكاری دەستوەردانی دەستدرێژكاران و جوڵەكردنیان بەبێ رەزامەندی ئەمنی پێشوەختە.
سودانی جه‌ختی له‌وه كرده‌وه كه "پێویسته ئه‌نجامده‌رانی ئه‌و كاره به پێی یاسا كارپێكراوه‌كان لێپرسینه‌وه‌یان له‌گه‌ڵدا بكرێت، لێكۆڵینه‌وه‌كه به پیشه‌ییانه ئه‌نجام بدرێت، به پێی ئه‌و ڕێسایانه‌ی كه هێزه چه‌كداره‌كانمان پێوه‌ی پابه‌ندن و له ژێر چاودێری ڕاسته‌وخۆی فه‌رمانده‌ی گشتی هێزه چه‌كداره‌كاندا".
راشیگه‌یاند كه "هیچ كه‌سێك مافی ئه‌وه‌ی نییه جێگه‌ی ده‌وڵه‌ت یان ده‌سه‌ڵاتدارانی بگرێته‌وه، هه‌روه‌ها هیچ لایه‌نێك له سه‌رووی یاساوه نییه".
به‌یانیی ئه‌مڕۆ یه‌كشه‌ممه له‌گه‌ڵ ده‌ستبه‌كاربوونی به‌ڕێوه‌به‌رێكی نوێ له فه‌رمانگه‌ی كشتوكاڵ له به‌ری كه‌رخی باشووری به‌غدا و له‌كاتی كۆبوونه‌وه‌یه‌كی كارگێڕیدا، ژماره‌یه‌ك چه‌كدار هه‌ڵیانكوتایه سه‌ر فه‌رمانگه‌كه، دواتر هێزه ئه‌منیه‌كان رووبه‌ڕوویان بوونه‌وه و ژماره‌یه‌ك ئه‌فسه‌ر و كارمه‌ندیان بریندار بوون.
دواتر فه‌رمانده‌یی ئۆپه‌راسیۆنه هاوبه‌شه‌كانی عێراق رایگه‌یاند كه ژماره‌یه‌ك چه‌كداری سه‌ر به دوو لیوای حه‌شدی شه‌عبی له باشووری به‌غدا هێرشیان كرده‌سه‌ر هێزه ئه‌منییه‌كان و به‌وهۆیه‌وه 14 چه‌كداریان ده‌ستگیركران.
PM:09:33:27/07/2025
ئه‌م بابه‌ته 556
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت