"دەوڵەتی عێراق پێشێلکردنی ئاسمانی وڵاتەکەی و بەکارهێنانی لە هێرشەکانی ئیسرائیل دژ بە ئێران رەتدەکاتەوە"

وێستگەنیوز-

وتەبێژی فەرماندەی گشتی هێزە چەکدارەکانی عێراق رایدەگەیەنێت، دەوڵەتی عێراق پێشێلکردنی ئاسمانی عێراق و بەکارهێنانی لە هێرشەکانی ئیسرائیل دژ بە ئێران رەتدەکاتەوە.

سەباح نوعمان، وتەبێژی فەرماندەی گشتی هێزە چەکدارەکانی عێراق لە بەیاننامەیەکدا رایگەیاند، "دەوڵەتی عێراق رەتکردنەوەی رەهای خۆی دووپات دەکاتەوە لە پێشێلکردنی ئاسمانی عێراق و بەکارهێنانی لە دەستدرێژی سەربازیدا، کە لە لایەن قەوارەی زایۆنیست"یـەوە دژ بە کۆماری ئیسلامیی ئێران یا لەدژی هەر یەکێک لە دراوسێ ناوچەییەکانی ئەنجامی دەدرێت، ئەمەش نوێنەرایەتی پابەندبوونێکی بنەڕەتی و دەستووری لەلایەن عێراقەوە دەکات، بە سیاسەتی دراوسێیەتی باش و رێگریکردن لە بەکارهێنانی زەوی و ئاو و ئاسمانی وەک شوێنی هەر هێرشێک بۆ سەر وڵاتانی دراوسێ، کە ئێمە لەگەڵیاندا پەیوەندییەکی نایاب لە ئاستە جیاجیاکاندا دەبەستێتەوە".

ئاماژەی بەوەکرد، "حکومەتی عێراق لەگەڵ لایەنە نێودەوڵەتییە پەیوەندیدارەکان بەدواداچوون بۆ هەموو ئەو کارە نایاساییانە دەکات، کە پێشێلکارییەکی ئاشکرای سەروەری عێراق و بنەماکانی یاسا نێودەوڵەتییەکان پێکدەهێنن و کاردانەوەی نەرێنییان لەسەر سەقامگیری و ئارامی ناوچەکە دەبێت".

سەباح نوعمان وتی، "حکومەتی عێراق داوا لە ویلایەتە یەکگرتووەکانی ئەمەریکا دەکات بە پێی ئەو ڕێککەوتنانەی لە نێوان هەردوو وڵات و نۆرم و ڕێککەوتننامە نێودەوڵەتییەکاندا ئەنجام دراون، بەرپرسیارێتی خۆی لە ئەستۆ بگرێت، بۆ ئەوەی ڕێگە لە فڕۆکەکانی قەوارەی زایۆن بگرێت بۆ ئەوەی دووبارە ئاسمانی عێراق پێشێل نەکات و هێرش نەکات".

وتیشی، "عێراق پابەند بووە بە بەرزترین پلەی خۆڕاگری، بەو هیوایەی ڕێگە خۆش بکات بۆ چارەسەری دیپلۆماسی و سیاسی بۆ هێورکردنەوەی دۆخەکە بە ڕێگەی ئاشتیانە، و مافی ئەوەی هەیە بەپێی یاسا نێودەوڵەتییەکان و ڕێککەوتننامەکانی نەتەوە یەکگرتووەکان، تواناکانی خۆی بەکاربهێنێت بۆ ڕووبەڕووبوونەوەی هەر پێشێلکارییەکی سەروەری نیشتمانی لەلایەن هەر لایەنێکەوە بێت".

ئەوەشی خستەڕوو، "لەسەر بنەمای ڕاسپاردەکانی سەرۆکی ئەنجومەنی وەزیران، فەرماندەی گشتیی هێزە چەکدارەکان و لە ڕێگەی وەزارەتی دەرەوە و نوێنەرایەتی عێراق لە رێکخراوی نەتەوەکان، کۆماری عێراق ڕێوشوێنی کردەیی لە دژی پێشێلکردنی سەروەریی لە لایەن قەوارەی زایۆنیست"ـەوە بە پێشێل کردنی ئاسمانی عێراق گرتووەتە بەر".

PM:09:53:14/06/2025

ئه‌م بابه‌ته 328 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت