بزووتنه‌وه‌ی‌ گۆڕان (گردی‌ زه‌رگه‌ته‌): دانا ئه‌حمه‌د مه‌جیدمان وه‌ك رێكخه‌ر قبوڵ‌ نییه‌

‌

وته‌بێژی‌ بزووتنه‌وه‌ی‌ گۆڕان (گردی‌ زه‌رگه‌ته‌) رایده‌گه‌یه‌نێت كه‌ "دانا ئه‌حمه‌د مه‌جیدمان وه‌ك رێكخه‌ر قبوڵ‌ نییه‌".

 عەبدوڵڵا چۆمانی، وتەبێژی بزوتنەوەی گۆڕان(گردی زەرگەتە)، لە كۆنگرەیەكی رۆژنامەوانیدا وتی: "لە كۆنفرانسی ئەمڕۆ بە بەڵگەوە ساختەكاری ئەنجامدراوە، هێزی چەكدار و كادیری لایەنی سیاسی بەشداربوون تێیدا، بۆیە كۆنفرانسەكە گرفتی تێكەوت، دواجاریش ئێمە كۆنفرانسەكەمان جێنەهێشت، بەڵام لەلایەن كۆمسیۆنەوە هۆڵەكە چۆڵكرا".

وتیشی:"كۆمسیۆن هیچ بڕیارێكی یەكلاكەرەوەی لەبارەی زۆرینەی رەهاوە نەدا، جگە لەوەی كۆمسیۆن گرفتی تەكنیكی هەبوو كە واژۆ و ئامادەبوویان پێ جیا نەدەكرایەوە، جگە لەو كێشەیەی كە لەنێوان هێزە ئەمنیەكان و هەڵسوڕاوێكی گۆڕان دروستبوو، سەرئەنجام كۆنفرانسەكە بەپێی بەرنامەیەكی رێكخراو شكستیهێنا".

وتەبێژی كۆنفرانسی دامەزراندنی بزوتنەوەی گۆڕان دەشڵێت "لەچوارچێوەی یاسا بەركارەكان كۆمسیۆن لەداهاتوو هەر بڕیارێك بدات ئێمە پێوەی پابەندین".