دادگای فیدڕاڵی ره‌تیكرده‌وه بڕیاری وەلائی بۆ هه‌ڵوه‌شاندنه‌وه‌ی په‌رله‌مانی كوردستان ده‌ربكات
وێستگەنیوز- نێچیرڤان کەمال
میدیای فه‌رمی عێراق بڵاویكرده‌وه، دادگای باڵای فیدراڵیی عێراق ره‌تیكرده‌وه بڕیاری وەلائی بۆ هه‌ڵوه‌شاندنه‌وه‌ی په‌رله‌مانی كوردستان ده‌ربكات بە ئامانجی راگرتنی كاروباری پەرلەمانی كوردستان کە 4ی ئەم مانگە کاراکرایەوە.
ئاژانسی هەواڵی عێراقی (INA) ئه‌مڕۆ یه‌كشه‌ممه له‌زاری سه‌رچاوه‌یه‌كه‌وه بڵاویكرده‌وه، "دادگای باڵای فیدراڵیی عێراق سكاڵاكه‌ی بۆ دەركردنی فەرمانی وەلائی بە ئامانجی راگرتنی كاروباری پەرلەمانی كوردستان رەتكردەوە".
لای خۆیەوە عەلی حەمەساڵح، بڕیاردەری ره‌وتی هەڵوێستی نیشتمانی، رایگەیاند، دادگا بڕیاری داوە سکاڵاکە رەتبکاتەوە و دوبارە جەختی لەسەر هەڵوێستی خۆی کردەوە کە پێی وایە هەڵوەشاندنەوەی خولی ئێستای پەرلەمان، بە وتەی ئەو، "تاکە و باشترین چارەسەرە" بۆ تێپەڕاندنی قەیرانی سیاسیی ئێستا لە هەرێمدا.
ئەوەش لە کاتێکدایە، 10ی ئه‌م مانگه، یەکێتیی و جوڵانەوەی نەوەی نوێ سکاڵایەکی فەرمییان لە دادگای فیدراڵی عێراق تۆمارکرد دژی ئەو دانیشتنەی کە لە سەرەتای هەفتەی رابردو (4ی تشرینی دوەمی 2026) لەلایەن پەرلەمانی هەرێمی کوردستانەوە ئەنجامدرا، هەردوو لایەن داوایان كردبوو دادگای فیدراڵی ئەو دانیشتنە و بڕیارەکانی هەڵوەشێنێتەوە، چونکە دان بەو هەنگاوانەدا نانێن کە لەلایەن پارتی و لایەنەکانی تری بەشدارەوە ئەنجام دراون.
PM:01:33:15/11/2026
ئه‌م بابه‌ته 44
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت