پارێزەرێک هۆكاری رەتكردنەوەی داواكارییەكەی یەكێتی و نەوی نوێ لە رێگەی وێستگەنیوزەوە شیدەكاتەوە
وێستگه‌نیوز – محەمەد فاتیح
شارەزایەكی دەستووری و یاسایی روونكردنەوە دەدات لەسەر ئەوەی دادگای باڵای فیدراڵی عێراق، داواکارییەکەی یەکێتیی نیشتمانیی کوردستان و جووڵانەوەی نەوەی نوێی بۆ دەرکردنی فەرمانی وەلائی الامر الولائي بە ئامانجی راگرتنی کاروباری پەرلەمانی کوردستان رەت كردووەتەوە.
پارێزەر ئازاد دۆسكی، شارەزای دەستووری و یاسایی تایبەت بە وێستگەنیوزی راگەیاند، "دادگای فیدراڵی عێراق داواكارى هەریەک لە یەکێتی و نەوەی نوێی لەبارەی کاراکردنەوەی پەرلەمانی کوردستان تاوتوێ کرد و رەتی کردەوە فەرمانی وەلائی بۆ وەستاندنی پرۆسەکە دەربکات".
ئەو دوو لایەنە لە رێگەی سکاڵا بنەڕەتییەكەیانەوە داوایان کردبوو پرۆسەی کاراکردنەوەی پەرلەمانی کوردستان رابگیرێت، بەڵام دادگا بەبێ ئەوەی هیچ رێکارێکی کاتی بۆ راگرتنی پرۆسەکە پەسەند بکات، داواكارى بۆ دەركردنی ئەمری وەلائی رەت کردەوە.
ئازاد دۆسكی باسی لەوەكرد بۆ وێستگەنیوز" دەركردنی فەرمانی وەلائی بەپەلە بەپێی مادەی 151 و 152 لە یاسای مورافەعات كاتێك سكاڵاكار داوای دەكات ئەبێت سەرەتا داوایەكی بنەڕەتی تۆمار بكات و ئەبێت سیفەی ئیستعجالی هەبێت و كاریگەری نەبێت بەسەر بابەتی داوا سەرەكییەكەوە.
وتیشی، "داوا بنەڕەتییەكە ڕەتنەكراوەتەوە تەنها ئەمری وەلائی رەتكراوەتەوە، چونكە داواكەی یەكێتی و نەوەی نوێ بەشێوەیەكی دروست نەبووە".
بە بڕوای ئازاد دۆسكی، داوا بنەڕەتییەكەی یەكێتی و نەوێ نوێش رەتدەكرێتەوە چونكە لە تایبەت مەندی دادگای فیدڕاڵی عێراق نییە.
PM:12:35:15/11/2026
ئه‌م بابه‌ته 272
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت