پەروەردەی هەولێر: دوای هەڵسەنگاندنی زیانەکانی لافاو بڕیار لەسەر درێژکردنەوەی پشوو دەدرێت

وێستگەنیوز-

بەڕێوەبەرایەتیی گشتیی پەروەردەی هەولێر بڕیاردان لەسەر درێژکردنەوەی پشووی دەوامی ناوەندەکانی خوێندن یان گەڕانەوە بۆ دەوامی فەرمی دەبەستێتەوە بە وەرگرتنی راپۆرتی فەرمیی ژووری قەیرانەکان و بەڕێوەبەرایەتیی کەشناسی، دوای ئەوەی شەپۆلێکی بارانبارین و لافاو لە هەولێر و چەند ناوچەیەکی هەرێمی کوردستان راگەیاندنی پشووی خوێندنی لێکەوتەوە.

لوقمان سەعید، بەڕێوەبەری گشتیی پەروەردەی هەولێر رایگەیاند، لە چاوەڕوانی راپۆرتی ژووری قەیرانەکانی پارێزگای هەولێر و کەشناسیدان بۆ هەڵسەنگاندنی ئاستی زیانەکان و بەردەوامیی شەپۆلەکە، تا سەرپشکانە بڕیاری کۆتایی لەسەر دەوامی پەروەردە بدەن، جەختیشی کردەوە، تا ئێستا هیچ راپۆرتێک لە پەروەردەی قەزاکانەوە نەگەیشتووە کە ئاماژە بە چوونەژوورەوەی ئاو و لافاو بکات بۆ ناو بینای قوتابخانەکان.

دوێنێ لە هەولێر و چەند ناوچەیەکی دیکە بەهۆی لافاوەوە پشوو تەنها بۆ خوێندکاران و مامۆستایان راگەیەندرا، لە کاتێکدا دەوامی فەرمانبەران ئاسایی بوو، ئەم رێکارانەش لە کاتێکدان کە رەخنەی بەردەوام دەگیرێت لە ئاستی ئامادەکاریی پێشوەختەی حکومەت بۆ بەرەنگاربوونەوەی لافاو، کە بووەتە هۆی دروستبوونی فشار و بارگرانی لەسەر ژێرخانی شار و دەستگەیشتن بە خزمەتگوزارییەکان.

PM:05:34:08/11/2026

ئه‌م بابه‌ته 204 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت