سەرۆکی شارەوانیی نیویۆرک: کرێکارانی ئەمریکا لەو سیاسییانە بێزار بوون کە لەلایەن دەوڵەمەندەکانەوە کڕدراون

وێستگەنیوز-

زوهران مەمدانی، سەرۆکی شارەوانیی نیویۆرک رایگەیاند، ئەو سەرکەوتنانەی پارتی دیموکرات لە هەڵبژاردنەکاندا بەدەستیهێناون، دەریخست کە کارنامەکەیان بە تەواوی ئاوڕ لەو قەیرانانە دەداتەوە کە رووبەڕووی چینی کرێکاری ئەمریکا دەبنەوە.

لە چاوپێکەوتنێکیدا لەگەڵ تۆڕی هەواڵی CNN، مەمدانی باسی لەوە کرد کە رووداوەکانی شەوی رابردوو رەنگدانەوەی ئەو راستییەیە کە چینی کرێکاری وڵاتەکەی بێزار بوون لەوەی گوێبیستی ئەو سیاسییانە بن کە لەلایەن دەوڵەمەندترین چینەکانی کۆمەڵگەوە کڕدراون و پێیان دەڵێن داواکاری و پێداویستییەکانتان واقیعی نین. ئاماژەی بەوەش کرد، ئەم ئەنجامانە دەسەڵاتێکی تەواو دەبەخشن بۆ کارکردن لەسەر کەمکردنەوەی خەرجییەکان، هێنانەدی گۆڕانکاریی بەرچاو کە خەڵکی کرێکار راستەوخۆ لە گیرفانیاندا هەستی پێبکەن، هاوکات جێبەجێکردنی ئەو متمانەیەی بە حزبەکەیان بەخشیوە.

سەبارەت بە پەیوەندییەکانی لەگەڵ دۆناڵد ترەمپ و ئەوەی ئایا حەکیم جێفریز، کاندیدی ئەگەری بۆ سەرۆکایەتیی ئەنجوومەنی نوێنەران دەبێت پەیوەندییەکی باش لەگەڵ ناوبراو دروستبکات یان رێبازێکی توند بگرێتەبەر؛ مەمدانی جەختی لە لێهاتوویی جێفریز کردەوە لە دۆزینەوەی کاریگەرترین شێوازی پەیوەندیکردن، بەڵام هاوکات روونیکردەوە کە پەیوەندییە تایبەتییەکەی خۆی لەگەڵ ترەمپ لەسەر بنەمای کراوەیی تەواو و راستگۆییەکی راشکاوانە داڕێژراوە سەبارەت بە هەبوونی جیاوازیی گەورە و بنەڕەتی لە دید و سیاسەتەکانیاندا.

ئەم لێدوانانە لە کاتێکدایە کە بەگوێرەی ئەنجامە بەراییەکانی هەڵبژاردنی نیوەی خولی کۆنگرێس، پارتی دیموکرات سەرکەوتنێکی مێژوویی تۆمارکردووە و توانیویەتی بە مسۆگەرکردنی 241 کورسی لە ئەنجوومەنی نوێنەران و 54 کورسی لە ئەنجوومەنی پیران، زۆرینەی رەهای هەردوو ئەنجوومەنەکە لە چنگی کۆمارییەکان دەربهێنێت؛ لە گەورەترین پێشهاتی چاوەڕواننەکراویشدا، دیموکراتەکان توانییان سەرکەوتن لە ویلایەتی تەکساس بەدەستبهێنن کە بە قەڵای نەریتی و سەرەکیی کۆمارییەکان دادەنرێت.

AM:09:55:05/11/2026

ئه‌م بابه‌ته 264 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت