زاخۆ؛ بەهۆی گرانبوونی نرخی گازوایل؛ شۆفێرانی پاس مانیانگرتووە
وێستگەنیوز-
لە زاخۆ بەشێک لە شۆفێرانی پاس و مینی پاسەکانی هێڵەکانی ناو بازاڕ بۆ دەرەوەی شار، بەهۆی گرانبوونی نرخی سووتەمەنییەوە مانیان گرتووە و کار ناکەن.
مانگرتنەکە دوای ئەوە هات کە نرخی یەک لیتر گازوایل بۆ هەزار و 500 دینار بەرزبووەوە، بە تایبەتی شۆفێرانی هێڵی ناوبازاڕ بۆ ئیبراهیم خەلیل و هێڵی گوڵان (ڕۆژهەڵاتی زاخۆ) کارکردنیان ڕاگرتووە.
بەشێک لە شۆفێران دەڵێن بەهۆی بەرزیی نرخی گازوایلەوە تووشی زیان بوون و تەواوی داهاتی ڕۆژانەیان تەنها بۆ سووتەمەنی دەچێت، بۆیە کار ناکەن تا گازوایلی پاڵپشتیکراویان بۆ دابین نەکرێت. ئەم دۆخەش وایکردووە ئەو هاووڵاتییانەی دەیانەوێت هاتووچۆ بکەن، ناچار بن تاکسی تایبەت بەکاربهێنن.
لەسەر ئەم بابەتە و بە مەبەستی گەیاندنی دەنگی شۆفێران و چارەسەرکردنی کێشەکەیان، وێستگەنیوز پەیوەندی بە بارزان سۆفی، سەرۆکی سەندیکای گواستنەوەی زاخۆ کرد و ناوبراو رایگەیاند: کە دوای گەیاندنی داواکاری و گلەیی شۆفێرانی پاسی کۆستەر بە لایەنە پەیوەندیدارەکان، بڕیار دراوە گازوایل بە نرخی پشتگیریکراو کە 750 دینارە بۆ هەر لترێک بۆ شۆفێران دابین بکرێت.
بەپێی رێککەوتنەکە، هەفتانە 100 لتر گازوایل دەدرێت بە هەر شۆفێرێک و دابەشکردنەکە لە سەرەتای هەفتەی داهاتووەوە دەست پێدەکات؛ بە شێوازێک کە لە دوو ڕۆژی جیاوازدا و هەر جارێک 50 لتر لە وێستگەکانی سەر ڕێگای ئیبراهیم خەلیل وەردەگرن.
لە بەرامبەر ئەم ئاسانکارییەدا، داوا لە شۆفێران کراوە دەست بە کارەکانیان بکەنەوە و بە هیچ جۆرێک نرخی کرێی گواستنەوەی سەرنشینان لە ناو شاری زاخۆدا بەرز نەکەنەوە.
PM:05:44:04/11/2026
ئه‌م بابه‌ته 196
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت