ئاوات شێخ جەنگی بۆ دادوەرەکانی سلێمانی: بڕیارێکی مێژوویی بدەن و بەرائەتی ئەو گەنجانە رابگەیەنن کە دەستبەسەرکراون

وێستگەنیوز-

ئاوات شێخ جەنگی پەیامێکی بڵاوکردەوە و تێیدا روو لە دادوەرەکان و سەرۆکی هەرێمی کوردستان دەکات، داوا دەکات بڕیارێکی مێژوویی بدەن و بەرائەتی ئەو گەنجانە رابگەیەنن کە دەستبەسەرکراون.

ئەمڕۆ سێشەممە 13ی تشرینی یەکەمی 2026، ئاوات شێخ جەنگی، خوشکی لاهور شێخ جەنگی و پۆڵاد جەنگی پەیامێکی لەژێر ناونیشانی "ئاهوناڵەکە دەگاتە شوێنی خۆی" لەبارەی دۆسییەی دادگاییەکەی پێنجشەممەی لاهور شێخ جەنگی و گیراوانی لالەزار بڵاوکردەوە.

لەپەیامەکەدا ئاوات شێخ جەنگی رایگەیاندووە، "پێنجشەممە تەنها دانیشتنێکی دادگا نییە، بەڵکو تاقیکردنەوەی خوای گەورە و ویژدانە."

ئاماژەی بەوەشکردووە، 1 ساڵ و 2 مانگە ئەو گەنجانە بە ناحەق دەستبەسەرکراون و خێزان و کەسوکاریان لە چاوەڕوانیدان. داواش دەکات ئەو زوڵمە رابگیرێت و بڕیارەکان نەکرێنە قوربانی ویستی حزبی و شەخسی، چونکە دادپەروەری دروشم نییە، بەڵکو کردارە.

لە کۆتایی پەیامەکەیدا، ئاوات شێخ جەنگی جەختی لەوە کردووەتەوە کە لە نێوان خوای گەورە و مەزڵومدا هیچ پەردەیەک نییە و ئاهوناڵەی دایک و باوکی ئەو گەنجانە دەگاتە شوێنی خۆی.

PM:08:16:13/10/2026

ئه‌م بابه‌ته 328 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت