قوباد تاڵەبانی: لە دوای مام جەلالەوە، پێگەی یەکێتی هەرگیز وەک ئێستا بەهێز نەبووە

وێستگەنیوز-

لە سەردانەکەیدا بۆ قەزای کۆیە، قوباد تاڵەبانی، جێگری سەرۆکی حکومەتی هەرێمی کوردستان، پەیامێکی لەبارەی پێگەی یەکێتییەوە دا و ڕایگەیاند، لە دوای کۆچی دوایی مام جەلالەوە، پێگەی حزبەکەیان هەرگیز وەک ئێستا بەهێز نەبووە و لە ئێستادا متمانەپێکراوترین هێزی سیاسییە.

ئەمڕۆ یەکشەممە 11ـەی تشرینی یەکەمی 2026، قوباد تاڵەبانی لەگەڵ کوردە عومەر، لێپرسراوی مەڵبەند و ئەندامانی ئەنجوومەنی مەڵبەندی 14ـەی ڕێکخستنی کۆیەی یەکێتیی نیشتمانیی کوردستان کۆبووەوە.

لە کۆبوونەوەکەدا، قوباد تاڵەبانی ئاماژەی بە گرنگیی پێگەی کۆیە کرد بۆ یەکێتی و داوای لە ئەندامانی مەڵبەندەکە کرد زیاتر لە جاران خۆیان ماندوو بکەن بۆ ئەوەی ببنە داکۆکیکاری ڕاستەقینەی مافەکانی سەرجەم چین و توێژەکانی ئەو شارە.

هاوکات سیاسەت و هەڵوێستی یەکێتی بۆ ئامادەبووان ڕوونکردەوە و جەختی لەوە کردەوە کە حزبەکەیان بە سەرۆکایەتیی بافڵ جەلال تاڵەبانی، بە تەواوی پابەندە بەو بەڵێنانەی کە بە خەڵکی کوردستان و دەنگدەرانی داوە.

لە بەشێکی تری قسەکانیدا، تیشکی خستە سەر پێگەی یەکێتی لەسەر ئاستی کوردستان، عێراق و ناوچەکە و دووپاتیکردەوە کە لە هەموو پرسە چارەنووسسازەکاندا حیساب بۆ بۆچوون و هەڵوێستەکانیان دەکرێت، بەهۆی ڕوونیی سیاسەتەکانیشیوە، ئەمڕۆ یەکێتی بووەتە متمانەپێکراوترین هێزی سیاسیی گۆڕەپانەکە.

PM:03:35:11/10/2026

ئه‌م بابه‌ته 504 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت