راوێژکاری دارایی سەرۆک وەزیرانی عێراق: پێویستە لە مامەڵە ناوخۆییەکاندا دینار بەکار بێت

وێستگەنیوز-

راوێژکاری دارایی سەرۆک وەزیرانی عێراق رایگەیاند، جەخت لەسەر گرنگیی پابەندبوون بە یاسا بەرکارەکان کراوەتەوە بۆ بەکارهێنانی دیناری عێراقی لە سەرجەم مامەڵە دارایی و بازرگانییەکانی ناوخۆدا، بە مەبەستی بەهێزکردنی متمانە بە دراوی نیشتمانی و رێکخستنی بازاڕ، هەروەها جەخت لەسەر ئاسانکاری بۆ رۆیشتنی کەلوپەل کراوەتەوە لە رێگەی گرنگیدان بە هەناردەکردن و گەیاندنی بەردەوامی کەلوپەل بۆ بازاڕەکان و نەهێشتنی بەربەستەکانی بەردەم هاوردەکردن و دابەشکردن بۆ جێگیرکردنی نرخەکان.

مەزهەر محەمەد ساڵح روونی کردەوە، هاوئاهەنگیی ئامێرە بازرگانی و چاودێرییەکان یارمەتیدەرە لە بەدواداچوونی بازاڕەکان و سزادانی سەرپێچیکاران، بە شێوەیەک کە مافی بەکاربەران بەتایبەت توێژە کەم پێداویستەکان بپارێزێت و ژینگەیەکی بازرگانیی دادپەروەرانەش بۆ بازرگانە پابەندەکان مسۆگەر بکات.

وتیشی، رێکارە چاودێرییەکانی حکومەت کۆڵەکەیەکی سەرەکین بۆ کۆنترۆڵکردنی بازاڕ و رێگریکردن لە بەرزبوونەوەی بێپاساوی نرخەکان، هەروەها بەرەنگاربوونەوەی قۆرخکاری و قۆستنەوەی پێداویستییە خۆراکی و بەکاربەرییەکانی هاووڵاتییان.

سەبارەت بە تەواوکاریی سیاسەتە ئابوورییەکان، جەختی لەوە کردەوە، چاودێریی بازاڕ بە تەنیا بەس نییە، بەڵکو پێویستە هاوشانی سیاسەتی ئابووری و پشتگیریکردنی بەرهەمی ناوخۆیی بێت بۆ دەستبەربوونی سەقامگیریی بژێویی هاووڵاتییان.

PM:05:43:10/10/2026

ئه‌م بابه‌ته 312 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت