لە دهۆک شەڕ روویدا و چەند کەسێک کوژران و بریندار بوون

وێستگەنیوز-

لە سنوری پارێزگای دهۆک لەسەر کێشەی کۆمەڵایەتی، شەڕ لەنێوان چەند کەسێک روویدا و بەهۆیەوە قوربانی لێکەوتەوە، بەپێی زانیارییە سەرەتاییەکان سێ کەس کوژراون.

سەردار شێخ یەحیا، قایمقامی قەزای شێخان، رایگەیاند: ئێوارەی ئەمڕۆ لە گوندی ئێسیانی سەر بە ناحیەی باعەدرێ لە قەزای شێخان لە سنوری پارێزگای دهۆک، رووداوێکی تەقەکردن روویداوە و کوژراو و بریندار هەیە.

وتیشی: رووداوەکە لەسەر کێشەیەکی کۆن بووە و تائێستا ژمارەی کوژراو و بریندارەکان دیار نییە، بەڵام پۆلیس گەیشتوونەتە شوێنی رووداوەکە بۆ هێورکردنەوەی دۆخەکە و لێکۆڵینەوە لەسەر رووداوەکە.

 

سەبارەت بە قوربانییەکانی ئەم رووداوە رێزان میرزا بەگ، بەڕێوەبەری ناحیەی باعەدرێ لە سنووری دهۆک، رایگەیاند: لە رووداوەکە سێ کەس کوژراون کە یەکێکیان ژنە و کەسێکی دیکەش بریندار بووە.

بە پێی زانیارییەکان بکوژەکە نیشتەجێی وڵاتی ئەڵمانیایە و تازە گەڕاوەتەوە و پێشتریش هەڕەشەی کوشتنی لێکردبوون.

 

PM:09:25:01/05/2026

ئه‌م بابه‌ته 480 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت