وادەی هاتنی شەپۆلێکی دیکەی باران و تاوەتەرزە راگەیەنرا

وێستگەنیوز-

شارەزایەکی کەشناسی پێشبینییەکانی بۆ کەشوهەوای سبەینێ و رۆژانی داهاتوو بڵاودەکاتەوە کە بە پێی ئەو پێشبینییانە لە پاشنیوەڕۆی سبەینێ کەشوهەوا ناجێگیر دەبێت و باران بارین دەستپێدەکاتەوە.

ئاراس جەبار شارەزای کەشناسی پێشبینی دەکات؛ "سبەی دووشەمە 6/4/2026 جارێکی دیکە لەکاتەکانی دوای نیوەرۆ تا ئێوارە ناجێگیری لەکەش و بەرگەهەوای ناوچەکانی هەرێمی کوردستان دەستپێدەکاتەوە و لەو ماوەیەدا لەشوێن و ناوچە جیاجیاکانی سنوری پارێزگای دهۆک و سلێمانی و هەڵەبجە و هەولێر و ئیدارەی سۆران و راپەرین ناوبەناو کەڵەکە هەوری بە بروسکە و تاوە تەرزە و باران بە بڕ و رێژەی جیاواز دروست ئەبێتەوە و لەهەندێ شوێندا تاوە باران و تەرزەکان بەهێز و بەخوڕ ئەبن و لەهەندێ شوێنیشدا لەوانەیە لاواز بێت یان هیچ بارانێک نەبارێت".

بە پێی ئەو پێشبینییە، "هەر سبەینێ لەسنوری پارێزگای کەرکوک و ئیدارەی گەرمیان کەش و هەوا بەدرێژای کاتەکان جێگیر ئەبێت و پلەکانی گەرماش بەجێگیری ئەمێنێتەوە ، خێرای با لەسەرخۆ بۆ مامناوەند ئەبێت 5-15کم/ک ئاراستەی با باشوری رۆژئاوا ئەبێت".

ئاراس جەبار هەروەها پێشبینی ئەکات؛ "ناجێگیری کەش و هەواو تاوە باران و تەرزەی بەهارە لەسەر ناوچەکانمان ماوەکەی درێژترببێتەوە تا ناوەراستی هەفتەی داهاتوو رۆژی دووشەمە 13/4/2026 ئەوەش لەئەنجامی بەردەوامی و مانەوەی بارستە هەوای ساردە لە چینە بەرزەکانی بەرگەهەوادا و شێداریەکی زۆر لە هەوای ناوچەکانمان بەهۆی بارانی زۆری ماوەکانی رابردوو".

ناوبراو دەڵێت، "ئاگاداریەکیش بۆ شوانە بەرێزەکان و ئەو هاوڵاتیانەی کە روو لەدەشت و شاخەکان بۆ هەر مەبەستێک ئەکەن بەدرێژای ئەو ماوەیە لەنێوان کاتەکانی نیوەروان بۆ ئێوارە کە کاتی ناجێگیربوونی کەشوهەوایە هەورە بروسکەکان زۆر ئەبن و لەهەمان کاتیش لەناکاو بەهێز و توند ئەبن بۆیە ئەبێت زۆر ئاگاداربن تا بەدووربن لە مەترسیەکانی بەرکەوتن بە بروسکەی ئەم کاتە کە بەهێز و مەترسیدارن بۆ سەر ژیانتان".

PM:10:49:05/04/2026

ئه‌م بابه‌ته 1076 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت