بارزانی: ئەرکی سەرشانی دەوڵەتی عێراقە قەرەبووی کوردانی فەیلی بکات
وێستگەنیوز-
ئەمڕۆ شەممە، 4ـی نیسانی
2026، مەسعود بارزانی، سەرۆکی پارتی دیموکراتی کوردستان لە ساڵیادی جینۆسایدی
کوردانی فەیلی پەیامێکی بڵاوکردەوە و رایگەیاند، چواری نیسان ڕۆژێكی خەمناكە لە ساڵنامەی
گەلی كوردستان، كوردانی فەیلی لەژێر دەسەڵاتی شوومی رژێمی پێشووی عێراقدا ئازار و
دەرەبەدەریی زۆریان بینیوە و هیچ مافێكیان پێ ڕەوا نەبینراوە.
دەقی پەیامەکە:
بەناوی خودای مەزن و
دلۆڤان
چواری نیسان ڕۆژێكی خەمناكە
لە ساڵنامەی گەلی كوردستان، یادی جینۆسایدكردنی خوشك و برایانی فەیلیە كە بەهۆی
كوردبوونیانەوە ڕووبەڕووی چەوساندنەوە و كۆمەڵكوژی و زوڵم بوونەوە. كوردی فەیلی لەژێر
دەستەڵاتی شوومی ڕژێمی پێشووی عێراقدا ئازار و دەرەبەدەریی زۆریان بینیوە و هیچ
مافێكیان پێ ڕەوا نەبینراوە. شەهیدكردنی هەزاران گەنج و سەندنەوەی ناسنامە و دەركردنی
دەیان هەزار خانەوادەی كوردی فەیلی بەشێك لە پیلان و ئەو سیاسەتە نامرۆڤانەیە بوو
كە لە دژی گەلی كوردستان بە شێوەیەكی ڕێكخستوو و بە بەردەوامی لە لایەن ڕژێمی پێشووی
عێراق ئەنجام دەدرا.
لەیادی چل و شەش ساڵەی
جینۆسایدكردنی كوردانی فەیلیدا هەزاران سڵاو بۆ گیانی پاكی شەهیدانی كوردی فەیلی و
هەموو شەهیدانی کوردستان دەنێرین. ئەرکی سەرشانی دەوڵەتی عێراقە قەرەبووی ئازار و
نەهامەتییەکانی خوشک و برایانی کوردانی فەیلی بکات. لەو یادەدا ڕۆڵی تێكۆشەر و خەباتگێڕانی
كوردی فەیلی لە پاڵپشتیكردنی بزووتنەوەی ڕزگاریخوازی گەلی كوردستان هەرگیز لەیاد
ناكرێت و كوردی فەیلی هەمیشە بەشێكی ئازیزی گەلی كوردستانن.
مسعود بارزانی
4ی نیسانی 2026
AM:11:55:04/04/2026
ئهم بابهته 212
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت