دامەزراوەی پەی: دوای 500 رۆژ لە هەڵبژاردن، پەرلەمانی كوردستان هێشتا ئاشی ئاو لێبڕاوە

وێستگەنیوز-

دامەزراوەی پەی بۆ پەروەردەو گەشەپێدان لە ساڵیادی راپەڕیندا راگەیەندراوێکی بڵاوکردەوە و دەڵێت، "لە كاتێكدا ئەم یادە دەكەینەوە، لە هەرێمدا بە شێوەی فەرمی كراوە بە پشوو و شانازی پێوە دەكەین، بەرهەمەكەی كە پەرلەمانی كوردستانە، وێرای ئەوەی زیاتر لە سێ ساڵە پەكخراوە".

ئەمڕۆ پێجشەممە 5ی ئاداری 2026، دامەزراوەی پەی بۆ پەروەردەو گەشەپێدان رایگەیاند، "ئەمڕۆ یادی 35 ساڵەی راپەڕینە شكۆدارەكەی ئاداری 1991 دەكەینەوە كە رزگاری و دەسكەوتی گەورەی بۆ گەلی كوردستان بەدەستهێنا، لەسەرووی هەمووشیانەوە كە شانازی پێوە دەكرێت پەرلەمانی كوردستان و ئەنجامدانی یەكەم هەڵبژاردنی بوو".

ئاماژە بەوەکراوە، "لە كاتێكدا ئەم یادە دەكەینەوە، لە هەرێمدا بە شێوەی فەرمی كراوە بە پشوو و شانازی پێوە دەكەین، بەرهەمەكەی كە پەرلەمانی كوردستانە، وێرای ئەوەی زیاتر لە سێ ساڵە پەكخراوە، ئەمڕۆ (500) رۆژیش تێدەپەڕێت بەسەر هەڵبژاردنی خولی شەشەمیدا، كەچی تا ئێستاشی لەگەڵدابێت كۆنەبووەتەوە، لەكاتێكدا ئاهەنگ دەگێڕین و دلخۆشین، كەچی دامەزراوەكە بێ ئیرادەو بێ رۆڵكراوە. كەواتە ئەگەر پەرۆشی یادكردنەوەی راپەڕینین، دەبێ پەرۆشی پاراستن و زیندوو هێشتنەوەی دەسكەوتەكانی بین، لەسەرووی هەموویانەوە پەرلەمانی كوردستان، كە لەوێوە حكومەت و دامەزراوەكانی تری هەرێم دروستكران و هاتنە كایەوە، بەڵام بەداخەوە زۆرینەیان شەرعییەتی یاساییان لەدەستداوە".

دامەزراوەکە دەڵێت، "دوای تێپەڕ بوونی (500) رۆژ بەسەر هەڵبژاردن، دوای ئەو هەزاران بەڵێنە رەنگاوڕەنگەی لیست و كاندیدەكان بە دەنگدەرانیاندا، نەك هەر هیچیان لێی جێبەجێ نەكردووە، بەڵكو دامەزراوەكەش وەك ئاشێكی ئاولێبڕاو چۆڵ و هۆڵەو تا ئێستا نە هیچ كۆبوونەوەیەكیان كردووەو نە دەستەی سەرۆكایەتیان هەڵبژاردووە، ئەوەی هەبێت لەبەرامبەر هۆڵی سارد و سڕ و بەتاڵ و بێدەنگی پەرلەماندا تەنها وەرگرتنی ئیمتیازاتەكانیان و بێدەنگبوونیانە! ئەگەر هێزەكانی دەسەڵات هۆكاری سەرەكی ئەم بەستەڵەكە سیاسییەی هەرێم بن، لەبەرامبەردا یاریی قێزەونی زۆرینەی بەناو ئۆپۆزسیۆنەكانیش كەمتر نییە لە رۆڵی پارتی و یەكێتی، ئەگەر لەوان بێ بەڵێنتر نەبووبن، راستگۆتر نەبوون! ئەوەی دەگوزەرێت نەنگییەكی گەورەیە بۆ یەكەیەكەی هێزە سیاسییەكان و سەركردەكانیان و پەرلەمانتارەكان بەبێ جیاوازی، كە لە ناشرینیدا لە مێژووی گەلاندا وێنەی نەبووە و نییە!".


دەشڵێت، "لەو ماوەیەدا زۆرترین گۆڕانكاری لەناوچەكەدا هەبوون و هەن، هەر لە قەیرانی پێکهێنانی حکومەتی عیراقەوە، تا پرسی رۆژئاواو سیاسیەتی جۆلانی و مەترسی گروپە تیرۆریستەكان، پرسی رۆژهەلات و شەڕی ئێران و ئەمەریكاو ئیسرائیل كە كاریگەرییان بەسەر هەرێمی كوردستانەوە هەبووە و هەیە، پەڕینەوەی پڕیشكی ئاگری شەڕەكە بۆی ئەگەرێكی نزیكە، جا راستەوخۆ بێت یا ناڕاستەوخۆ، كەچی تا ئێستاشی لەگەڵدابێت نەك هەر پەرلەمان كارا نەكراوەتەوە، بەڵكو هێزە سیاسییەكان لە ململانێی خۆیان نەكەوتوون!".

لە راگەیەندراوەکەدا هاتووشە، "لەم پێناوەدا ئەوەی ئەمڕۆ لە یادی راپەڕیندا گرنگە جارێكی تر جەخت لەسەر كاراكردنەوەی پەرلەمان بكەینەوە، بەبیر خەلكی كوردستانی بێنینەوە، كە دەبێ فشارەكان بۆ كاراكردنی پەرلەمان زیاتر بكرێن، چونکە لەلایەك هەڕەشە و مەترسییەكی گەورە لەسەر هەرێمی كوردستان هەیە، لەلایەكی تریشەوە كوردستان لەبەردەم دەرفەتێكدایە كە لە مێژوودا بەدەگمەن هەڵدەكەوێت، بەڵام پرسیارەكە ئەوەیە كورد خۆی لە كوێیە؟ چۆن هەڵسوكەوت لەگەڵ گۆڕانكارییەكاندا دەكات؟ بە یەک گوتار دەچێتە ناوەوە یە هەر بە پەرتەوازەیی؟ ئایا كاراكتەرێكی بەشداری خاوەن پشك دەبێت و بەقەد سەنگ و قورسایی خۆی مافە زەوتكراوەكانی دەگێڕێتەوە؟ یا بەشداری پێكراوێكی بێدەسكەوتی بەكارهێنراوی دەست لە بنی هەمبانە دەرچوو دەبێت؟".

ئەوەشخراوەتەڕوو، "ناكرێ هەموو جارێك خەلكی كوردستان قوربانی بدات، بەڵام لە بریارداندا بەشداری پێنەكرێت، رایان نەبێ لە قۆستنەوەی دەسكەوتەكان و دوورخستنەوەی مەترسییەكان. بێگومان بەشداری خەلكیش لە رێگەی پەرلەمانەوە دەبێ. بەڵام ئێستا كە دەرفەت و مەترسییەكان لەلایەن سەركردەی پارتە سیاسییەكانەوە بڕیاری لێدەدرێت. ئەوانیش ئەوەندەی لە بیری خۆیان و لە خەمی ئەوەدان لەناو هاوكێشەكاندا زیاتر خۆیان بە كاریزما نیشان بدەن و بەرژەوەندییەكانی خۆیان قایم بكەن، ئەوەندە لە بیری ئەوەدا نین دەرفەتەكان بۆ خەلك بقۆزنەوەو مەترسییەكان لە هاوڵاتیان دوور بخەنەوە. ئەمەش سەلمێنەری ئەو راستییەیە كە غیابی پەرلەمان وادەكات سەركردەكان لە بری خەلك یاریكەر و قسەكەر بن. بێگومان ئەو كاتەش مەترسی و دەرفەتەكان لە روانگەی شەخسییەوە بیریان لێدەكرێتەوە نەك بەرژەوەندی بالای گەلی كوردستان".

دامەزراوەی پەی باسی لەوەکردووە، "لەو روانگەیەوە پێمان وایە هەرچی زووە دەبێ پەرلەمانی كوردستان كە مەرجەعی بالای پرسە چارەنوسسازەكانە، كۆبێتەوەو لەسەر ئەو پرسانە دانیشتن بكات، سەركردەی هێزە سیاسییەكان لەناو پەرلەماندا راوێژ بكەن و بڕیارەكانی تایبەت بە چارەنوسی خەڵكی كوردستان بۆ مەرجەعە باڵاكە بگێڕنەوە، لانی كەم بڕیارە یەكلاكەرەوەكان لەناو پەرلەمان بدرێت، ئەگەر سەركردایەتی سیاسیی هەرێم ئەم هەنگاوانە بگرێتە بەر و هەرێم و خەڵكەكەی بپارێزێت و ئاقڵانە دەرفەتەكان لەدەستنەدات، ئەوا مێژوو بە ئاوی زێڕ بۆ خۆی و گەلەكەی دەنوسێتەوە. بە پێچەوانەوە بەردەوامی ململانێكانیان وەك ئەوەی هەیە، دەبێتە مایەی لەبار بردنی ئەو دەسكەوتانەی هەن و لەدەستدانی ئەو دەرفەتە زێڕینە نەتەوەییە مێژووییەش كە لەبەردەمدایە".

لە کۆتایی راگەیەندراوەکەدا هاتووە، "جارێكی تر جەخت لەسەر ئەوە دەكەینەوە كە رێز لەبەرهەمی ئەو یادەبگیرێ كە پەرلەمانە، داوا لە خەلكی كوردستانیش دەكەین فشارەكانیان زیاتر بكەن، داوا لە هێزە سیاسییەكان دەكەینەوە بە جدی بەخۆیاندا بچنەوە بۆ ئەوەی پەرلەمان كۆبێتەوەو لە روانگەی بەرژەوەندییەكانی خەلكی كوردستانەوە دەرفەت و مەترسییەكان تاوتوێ بكات. لە هەمان كاتدا پشتگیری هەموو هەنگاوێك دەكەین كە ببێتە كۆكەرەوەی لایەنە سیاسییەكان و یەكریزی و یەك گوتاریی نیشتیمانی، بە مەرجێك جێگرەوەی هیچ دامەزراوەیەكی فەرمی نەبێت لە سەروشیانەوە دامەزراوەی پەرلەمانی كوردستان".

PM:04:46:05/03/2026

ئه‌م بابه‌ته 256 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت