سلێمانی عەسرێکی ماتەمینی جیاواز بۆ نوسەرو شاعیر بەشدار سامی بەڕێوەدەبات

وێستگەنیوز - 
بڕیارە کاتژمێر سێی ڕۆژی هەینی 13 ی شوبات، سلێمانی ماتەمینییەکی جیاواز بەبۆنەی چلەی ماتەمینی شاعیرو نوسەرو بەشدار سامی لەهۆڵی سینەما سالم بەڕێوەببات. 

ڕۆژی 29 ی 12 ی 2025 بەشدار سامی دوای ململانێیەکی زۆر لەگەڵ نەخۆشی شێر پەنجە کۆچی دوایی کرد .

بەهۆکاری خۆپیشاندان و  ناڕەزایەتییەکان دژی هێرشەکانی سەر ڕۆژئاوا ئامادەکارییەکان بۆ چلەی ماتەمینی دواکەوت و بڕیارە ڕۆژی هەینی لەلایەن هاوڕێیانی و کۆمەڵێک هونەرمەندەوە بەناونیشانی " عەسرێک لەگەڵ بەشدار سامی " ماتەمینییەکی جیاوازی بۆ بەڕێوەبچێت.
 
بەشدار سامی لە ساڵی 1984 لە شارۆچکەی مەخموور لەدایکبووە و لە هەولێر نیشتەجێ بوو. بە یەکێک لە دەنگە نوێیەکانی شیعری کوردی دادەنرا. 
 
چوار کتێبی شیعریی چاپ کردووە، "سبەی رۆژێکی دیکەیە، ئێوارە سەرابییەکان، رۆیشتن بە ئاراستەی مردووە بەڕێزەکان و لە گوڵ دەترسم"، هەروەها فۆتۆگرافەریش بووە.
 
ساڵی 2007 خەڵاتی ڤێستیڤاڵی نەورۆزی (یەکێتیی نووسەرانی کورد-لقی هەولێر)ی بۆ شیعری لاوان وەر گرتووە. 

ساڵی 2010 خەڵاتی لاوی ساڵی لە وەزارەتی رۆشنبیری و لاوانی حکومەتی هەرێمی کوردستان بۆ شیعر وەرگرتوە.

ساڵانی 2011 و 2014 خەڵاتی یەکەمی ڤێستیڤاڵی گەلاوێژی بۆ شیعر پێ بەخشرا‌وه. 
 
رۆژی 13.5.2025، بەشدار سامی لەکاتی ناساندنی کتێبی "لە گوڵ دەترسم"  وتی : "ئەمە دوایین کتێبی منە و پێموانییە کتێبی دیکە بنووسم و هەر ئەوەیە بە ناوی من دەمێنێتەوە، ئەمەش بەهۆی تەندروستیمەوە.

PM:09:54:11/02/2026

ئه‌م بابه‌ته 188 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت