11 ساڵ بەسەر ئازادکردنی کۆبانێ تێپەڕدەبێت و هەسەدە پابەندبوونی خۆی بە درێژەدان بە شەڕی دژ بە داعش دووپاتدەکاتەوە

وێستگەنیوز-

ئەمڕۆ دووشەممە 26ی کانونی دووەمی 2026، 11یەمین ساڵیادی رزگارکردنی کۆبانێ-یە لەدەستی رێکخراوی تیرۆریستی داعش، لەم یادەدا هێزەکانی سوریای دیموکرات "هەسەدە" دووپاتی دەکاتەوە کە "بەردەوام دەبن لە شەڕی دژ بە داعش".

لە راگەیەندراوێکدا هەسەدە رایگەیاند، "یازدەهەمین ساڵوەگەڕی رزگارکردنی کۆبانێ لەدەستی رێکخراوی تیرۆریستی داعش وەک یەکێک لە گرنگترین ساتەکانی مێژووی بەرەنگاربوونەوەی تیرۆریزمی جیهانی وەستاوە، ئەم سەرکەوتنە مێژووییە سەرەتای داڕمانی راستەقینەی مەترسیدارترین و دڕندەترین رێکخراوی تیرۆریستیی جیهانی مۆدێرن بوو کە تا ئێستا ناسیبێتی و ئەو ڕاستییە حاشا هەڵنەگرەی دامەزراند کە ئیرادەی گەلانی ئازاد و ڕێکخراو توانای ئەوەی هەیە".

ئاماژە بەوەکراوە، "شەڕی کۆبانێ بە هەموو مانایەک شەڕی قەدەر بوو، تەنیا بەرگریکردن لە شارێک نەبوو، بەڵکو بەرگریکردن بوو لە بەها مرۆییەکان و مافی گەلان بۆ ژیان و ئازادی و کەرامەت، لە ساتێکی مێژوویی سەرەکیدا، شەڕڤانانی یەکینەکانی پاراستنی گەل (یەپەگە) و یەکینەکانی پاراستنی ژنان (یەپەژە) دژی پڕۆژەیەکی جینۆسایدی سیستماتیکی وەستانەوە، بەمەش زەمینەیان بۆ ئازادکردنی ناوچە بەرفراوانەکانی سوریا خۆشکرد و کۆتایی بە فراوانبوونی خوێناوییەکەی لە ناوچەکەدا هێنا".

لە راگەیەندراوەکەدا ئەوەش هاتووە، "سەرکەوتنی کۆبانێ سەرەتای راستەقینەی کۆتایی بۆ داعش دیاری کرد و پەیامێکی دەنگدانەوەی بۆ جیهان نارد کە توندڕەوی ناتوانێت بەرگەی ئیرادەی گەلانی ئازاد بگرێت".

هەسەدە دەڵێت، "ئەمڕۆ دوای 11 ساڵ لەو سەرکەوتنە مێژووییە، شاری کۆبانێ جارێکی دیکە دەکەوێتە بەر هێرش و گەمارۆ و فشاری بێوچان لە هەوڵی ئاشکرا بۆ تێکدانی ئیرادەی گەلەکەی و ناسەقامگیرکردنی ئەو سەقامگیرییەی کە بە قوربانیدانی بێئەندازە بەدەست هاتووە، بەئامانجکردنی کۆبانێ ئەمڕۆ هێرشێکی ڕاستەوخۆیە بۆ سەر ڕەمزی سەرکەوتن بەسەر داعشدا".

هەر لەو چوارچێوەیەشدا هەسەدە پابەندبوونی تەواوی خۆی بە درێژەدان بە شەڕی داعش دووپات دەکاتەوە و هۆشداری دەدات لەوەی کە هەر ناسەقامگیرییەک لە باکور و ڕۆژهەڵاتی سوریا مەترسی ڕاستەوخۆ بۆ سەر ئاسایشی ناوچە و نێودەوڵەتی دروست دەکات، هەروەها دەرفەتی ڕاستەقینە بۆ ڕێکخراوە تیرۆریستییەکان دەڕەخسێنێت بۆ ئەوەی ڕێکخراوە تیرۆریستییەکان کۆببنەوە و دەست بە چالاکییەکانیان بکەنەوە.

هەسەدە پەیامێک ئاڕاستەی کۆمەڵگەی نێودەوڵەتی دەکات و دەڵێت، "پاراستنی دەستکەوتەکانی سەرکەوتن بەسەر داعش و دەستەبەرکردنی ئاسایش و سەقامگیری ئەو ناوچانەی کە لەم شەڕەدا باجێکی وا قورسیان داوە، هەڵبژاردنێکی سیاسی نییە، بەڵکو بەرپرسیارێتییەکی هاوبەشی ئەخلاقی و یاساییە، بێدەنگی سەبارەت بە دۆخی کۆبانێ دژایەتی ئەو قوربانیدانانەیە کە بۆ تێکشکاندنی تیرۆر دراون و هەوڵە نێودەوڵەتییەکان بۆ بەرەنگاربوونەوەی تیرۆر تێکدەدات".

لە کۆتاییدا هەسەدە دووپاتی دەکاتەوە، کە کۆبانێ وەک سیمبولی هەمیشەیی خۆڕاگری دەمێنێتەوە و ئەو سەرکەوتنەی کە 11 ساڵ لەمەوبەر بەدەست هاتبوو، تەنیا یادەوەرییەک نییە بۆ وەبیرهێنانەوە، بەڵکو پابەندبوونێکی نوێیە بۆ بەرگریکردن لە ئازادی و پاراستنی دەستکەوتەکانی شەهیدان و بنیاتنانی ئایندەیەکی ئارام و دیموکراسی بۆ هەموو خەڵکی سوریا.

AM:10:26:26/01/2026

ئه‌م بابه‌ته 292 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت