دامەزراوەی پەی: پەرلەمان بە رێككەوتن و لێبووردەیی كارادەكرێتەوە، نەك كڕینی ئیرادەی پەرلەمانتاران

وێستگەنیوز-

دامەزراوەی پەی بۆ پەروەردە و گەشەپێدان لەبارەی کارانەکردنی پەرلەمانی کوردستان راگەیەنداوێکی بڵاوکردەوە و دەڵێت، "پەرلەمان بە رێككەوتن و لێبووردەیی كارادەكرێتەوە، نەك كڕینی ئیرادەی پەرلەمانتاران".

ئەمڕۆ دووشەممە 22ی کانونی یەکەمی 2025، دامەزراوەی پەی بۆ پەروەردە و گەشەپێدان رایگەیاند، "پەرلەمانی كوردستان لە رۆژی (2/12/2024) یەكەم دانیشتنی سوێندخواردنی ئەندامانی ئەنجامدا، كە دەبووایە بەپێی حوكمی بڕگەی (دووەم)ی مادەی 11 و بڕگەی (یەكەم)ی مادەی 12 لە پەیڕەوی ناوخۆی پەرلەمان، دەستەی نوێی سەرۆكایەتی پەرلەمان هەڵبژێردرێت، بەڵام لەئەنجامی ناكۆكی نێوان هەردوو هێزی سەرەكی (پارتی و یەكێتی)، دانیشتنەكە بە كراوەیی هێڵدرایەوە، كە زیاتر لە ساڵێكە تا ئێستاشی لەگەڵدابێت بەردەوامە، ئەمەش پێشێلێكی گەورەی یاساو پەیرەوە، بێ نرخ كردنی پرۆسەی دەنگدان و دەنگی هاوڵاتیان و لەبەرچاو نەگرتنی رۆڵی دامەزراوەكانی لێكەوتۆتەوە".

ئاماژە بەوەکراوە، "لەهەمان كاتدا دەبوایە هێزە ئۆپۆزسیۆنەكان كە (32%)ی كورسییەكانیان لەلایە، رۆڵی بەرچاویان هەبووایە لە كۆبوونەوەی پەرلەمان و هەڵبژاردنی دەستەی سەرۆكایەتییەكەیدا، بەو پێیەی خەباتی سیاسی هێزی ئۆپۆزسیۆن تەنها لەناو هۆڵی پەرلەماندا دەبێت. ئەم هێزە ئۆپۆزسیۆنانە لەسەرەتادا دەیانتوانی ببنە هێزی فشاری كاریگەر لەسەر یەكێتی و پارتی، بەتایبەتی كە (سەرۆكی تەمەن)ی پەرلەمانیش ئەندامی یەكێك لە هێزە ئۆپۆزسیۆنەكان بوو، دەیانتوانی لە یەكەم رۆژی دانیشتنەكەوە وادەی دانیشتنی تریان دەستنیشان بكردایەو و ساردنەبوونایەتەوە، ئەوەیان رابگەیاندایە كە هەر كاتێك دانیشتنی پەرلەمان بكرێت، یان هەر هێزێك ئامادەبێت پەرلەمانی كوردستان كارا بكاتەوە ئامادەی كۆبوونەوەكە دەبن، چونكە ئەوەی گرنگە ئەوان دەیانەوێت پەرلەمان دروست بێت. كەچی هێزە ئۆپۆزسیۆنەكان نەك ئەوەیان نەكرد و هیچ هەنگاوێكیان نەنا، بەڵكو هەر لە چاوەڕوانی كۆبوونەوە و رێككەوتنی یەكێتی و پارتیدا بوون".

دامەزراوەکە دەڵێت، "ئێستاش كەوتۆتە بارودۆخێكەوە كە یەكێتی و پارتی هەركامێكیان بچنە كۆبوونەوەوە ئەوان بە پاشكۆ ئەژمار دەكرێن، لەكاتێكدا دەیانتوانی هێزی فشاری كاریگەر بن، وەك ئەوەی لەسەردەمی شەڕی ناوخۆدا (58) پەرلەمانتاری خولی یەكەم لەناو پەرلەماندا مانیان گرت، ئەوانیش دەبووایە لەناو تەلاری پەرلەماندا مانبگرن و چاوەڕێی هاتنی یەكێتی و پارتی بكەن، ئەو كاتە ئەو هەڵوێستەیان دەبووە فشارێك بۆ سەر یەكێتی و پارتی تا بە ئاسانتر رێكبكەون. لەبەر ئەوەی لەئەنجامدا بەشێك لە ئەندامان هەن كە ئامادەی كاراكردنەوەی پەرلەمانن، ئەوەش كاریگەری خۆی دەبوو، نەك ئەوەی كە یەكێتی و پارتی دەزانن تا هەردووكیان رێكنەكەون هیچ هێزێكی ئۆپۆزسیۆنی بەشداری كۆبوونەوەی پەرلەمانی ناكات، لێرەوە هێزە ئۆپۆزسیۆنەكان ئەو هەڵەیان لەدەست خۆیاندا كە هێزی فشار بن و نەبنە پاشكۆ".

دەشڵێت، "ئێستاش بە فەرمی و نافەرمی گوێ بیستی هەندێك لێدوان دەبین گوایە هەوڵێكی سیاسی هەیە بۆ رێككەوتنی هەندێ هێزی سیاسی لەگەڵ هەندێك لە ئەندامانی هێزەكانی تر لەدەرەوەی خواستی فراكسیۆنەكانیان، نەك بە رێككەوتنی سیاسی، بەڵكو بەشێوەی ئیغراكردنی ماددی و كرینی ئیرادەیان. ئەمەش كارێكە دوور لە مۆراڵی سیاسی، چونكە یەكەمیان پارە مولكی میللەتەو ناكرێت بەو شێوەیە مامەڵەی پێوە بكرێت، دووەمیشیان پەرلەمانتار نوێنەری خۆی نیە، نوێنەری ئەو خەڵكەیە كە دەنگیان پێی داوە و تەعبیر لە ئیرادەی پەرلەمانی دەكات و لێپرسراوە لە شكۆی پەرلەمان و دیموكراتیەت و ئیرادەی دەنگدەر، لەسەر ئەو بنەمایانە ناكرێت پەرلەمانتار لەپێناو بەرژەوەندی كەسیی خۆی و داخوازیی حزبێكی ترەوە بگلێتە سەفقەی رێككەوتنێكەوە، كە تیایدا خۆی بفرۆشێت و بەشداریی یارییەكی سیاسیی قێزەون بكات كە ئەنجامەكەی شڵەژانی سیاسیی زیاتری هەرێمی لێبكەوێتەوە، ئەگەر ئەمە راست بێت و هەر هێزێك بیگرێتەبەر، پێویستە هەم ئەو لایەنەی هەوڵدەدات بۆ كڕینیان ئیدانە بكرێت، هەم ئەو پەرلەمانتارانەش كە بەم شێوازە بچنە ئەو بەرەیەوە پێویستە رووی راستەقینەیان بۆ كۆمەڵگە بخرێتە روو و لەلایەن دەنگدەرانیانەوە لێپێچینەوەیان لەگەڵدا بكرێت. ئاساییە هەركام لە لایەنە سیاسییەكان رێككەوتن بكەن بۆ پێكهێنانی حكومەت لەگەڵ یەكتری، بەڵام كرین و فرۆشتنی پەرلەمانتار و ئیرادەی پەرلەمانتار كارێكی نەشیاو و نەكردەیە، چ لەلایەن ئەو هێزەی دەیكڕێت و چ لەلایەن ئەوەی خۆی دەفرۆشێت، پێچەوانەی یاساو پەیڕەو و داب و نەریت و ئەو سوێندەشە كە خواردوویانە، بۆیە ئێمە ئەم كردەیە بە هەموو شێوەیەك مەحكوم دەكەین".

باس لەوەشکراوە، "ئەوەی جێگەی تێڕامانە، هەڵبژاردنی عیراق كراوە، وا چاوەروان دەكرێت لەم هەفتەیە كۆبوونەوەی ئەنجومەنی نوێنەران بكرێت و بەپێی لێدوانەكان لە داهاتوویەكی نزیكدا حكومەتی نوێی عیراق دروست بكرێت، بەڵام لە هەرێمدا ئەوە سێ ساڵە حكومەت كاربەڕێكەرە، هێزە كوردستانییەكانیش ناتەبان، ئەمە لەكاتێكدایە كە ئەگەر بگەڕێینەوە بۆ رابردوو ساڵانی (2005-2009)، ئەوكاتە عیراق لەو پەڕی لاوازیدابوو، هێزە شیعی و سوننەكان لەوپەری ناكۆكیدا بوون، لەبەرامبەردا هەرێمی كوردستان لەوپەری بەهێزی و لایەنە كوردستانییەكانیش لەوپەڕی یەكدەنگیدا بوون، بەڵام ئێستا هەم بەغد بەهێزە و هەم لایەنە عیراقییەكانیش یەك هەڵوێستن بەرامبەر مافەكانی هەرێمی كوردستان، لەو دۆخەدا هەرێم كە پەرلەمانی نییە و حكومەتیشی كاربەڕێكەرە، دەبووایە یەكگرتوو بێت لەبەرامبەردا ئەو فشارانەی لە بەغداوە لەسەریەتی، كەچی هێزە كوردستانییەكان لەوپەڕی ناكۆكی و لاوازیدان".

دامەزراوەی پەی هیوادارە، بەپێی یاسا و بە زووترین كات پەرلەمان و حكومەت دروست بكرێت، كۆتایی بە پێشێلكارییە یاساییەكان بهێنرێت، بەبێ ئەوەی هەنگاوێكی تر بنرێت بۆ پێكهێنانی حكومەت لە دەرەوەی یاسا و ببێتە هۆی لەكەداركردنی زیاتری پرۆسەی دیموكراسی و هەڵبژاردن لە هەرێمی كوردستان لەسەر ئاستی ناوخۆیی و نێودەوڵەتی، چونكە پێداگری لەسەر بەرژەوەندییە بچوكە حزبییەكان و درێژە كێشانی ئەم دۆخە، سەردەكێشێ بۆ هەڵوەشانەوەی جارێكی تری هەڵبژاردنی پەرلەمان و مەترسی لەسەر قەوارەكەو داهاتووی هەرێمیش دروست دەكات.

PM:12:00:22/12/2025

ئه‌م بابه‌ته 316 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت