سودانی و تۆم باراك باسیان له رێگریكردن له هه‌ر په‌ره‌سه‌ندنێكی زیاتر له ناوچه‌كه كرد
وێستگه‌نیوز –
سه‌رۆك وه‌زیرانی عێراق و نێرده‌ی تایبه‌تی سه‌رۆكی ئه‌مریكا له سوریا باسیان له پاڵپشتیكردنی سه‌قامگیری سوریا و بوژانه‌وه‌ی ئابووری و رێگریكردن له هه‌ر په‌ره‌سه‌ندنێكی زیاتر له ناوچه‌كه كرد.
نووسینگه‌ی راگه‌یاندنی سه‌رۆك وه‌زیرانی عێراق رایگه‌یاند كه ئه‌مڕۆ یه‌كشه‌ممه محه‌مه‌د شیاع سودانی سه‌رۆك وه‌زیران پێشوازی له تۆم باراك نێرده‌ی تایبه‌تی سه‌رۆكی ئه‌مریكا له سوریا كرد.
له راگه‌یه‌ندراوێكی نووسینگه‌كه‌ی سودانی هاتووه كه "له میانی دیداره‌كه‌دا باسیان له چۆنێتی ئه‌و پرۆسه‌یه كرد كه عێراق له ڕێگه‌یه‌وه بتوانێت به‌رده‌وام بێت له پاڵپشتیكردنی سه‌قامگیری سوریا و ئاسایش و خۆشگوزه‌رانی و بوژانه‌وه‌ی ئابووری، كه له هه‌مان كاتدا سه‌قامگیری و خۆشگوزه‌رانی عێراق به‌هێزتر بكات".
ئاماژه به‌وه‌شدراوه كه "له دیداره‌كه‌دا باس له ئاڵوگۆڕی بیروڕا سه‌باره‌ت به ڕێگریكردن له هه‌ر په‌ره‌سه‌ندنێكی زیاتر له ناوچه‌كه كرا له‌گه‌ڵ پاڵپشتیكردنی ڕێڕه‌وی دیپلۆماسی بۆ چاره‌سه‌ركردنی ناكۆكییه‌كان و دانانی ناوچه‌كه له‌سه‌ر ڕێگای هاوكاری و گه‌شه‌ی ئابووری و سه‌قامگیری درێژخایه‌ن".
راشیگه‌یاند كه تۆم باراك جه‌ختی له‌و ڕۆڵه بنیاتنه‌ر و گرنگه كرده‌وه كه عێراق ده‌توانێت بیگێڕێت بۆ گه‌یشتن به ئامانجه هاوبه‌شه‌كان.
PM:09:00:30/11/2025
ئه‌م بابه‌ته 216
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت