کاردانەوەی بەشێكی وڵاتانی جیهان سەبارەت بە هێرشەکەی ئیسرائیل بۆ سەر بارەگایەکی حەماس لە قەتەر
وێستگەنیوز_
ئیسرائیل هێرشێکی بۆ سەر بارەگایەکی حەماس لە قەتەر ئەنجامدا و کارداوانەی وڵاتانی جیهانی بەدوای خۆیدا هێنا.
سوپای ئیسرائیل ڕایگەیاند، هێزەکانیان بە هەماهەنگی دەزگای ئاسایشی ناوخۆی (شاباک) هێرشی ئاسمانییان کردە سەر بارەگایەکی حەماس لە دەوحەی پایتەختی قەتەر، بە گوێرەی میدیاکان شاندی دانوستانکاری حەماس کراوەتە ئامانج، ئەمەش کاردانەوەی نێودەوڵەتی لێ کەوتەوە.
ئەنتۆنیۆ گوتێرس، سکرتێری گشتیی نەتەوە یەکگرتووەکان سەرکۆنەی هێرشەکانی ئیسرائیلی کرد و رایگەیاند: " ئاگاداری هێرشەکانی ئیسرائیلین بۆ سەر قەتەر، وڵاتێک بۆ گەیشتن بە ئاگربەست و ئازادکردنی هەموو بارمتەکان ڕۆڵێکی زۆر ئەرێنی دەگێڕێت."
دەشڵێت: هێرشەکان پێشێلکارییەکی ئاشکرایە بۆ سەر سەروەری و یەکپارچەیی خاکی قەتەر، داواش لە هەموو لایەنەکان دەکات بۆ گەیشتن بە ئاگربەستی هەمیشەیی کار بکەن نەک لەناوبردنی.
هەروەها وەزارەتی دەرەوەی تورکیا لە ڕاگەیەندراوێکدا، هێرشەکانی ئیسرائیل بۆ سەر ئەندامانی حەماس لە دەوحەی پایتەختی قەتەر سەرکۆنە دەکات و ئەوەش نیشان دەدات کە ئیسرائیل "سیاسەتی فراوانخوازی لە ناوچەکە و تیرۆر پەیڕەو دەکات، بەئامانجکردنی شاندی دانوستانکاری حەماس لە کاتێکدا گفتوگۆکانی ئاگربەست بەردەوامە، ئەوە دەردەخات کە ئیسرائیل ئامانجی گەیشتن بە ئاشتی نییە، بەڵکو دەیەوێت درێژە بە شەڕەکە بدات."
لە لایەکی دیکەوە ئیسماعیل بەقایی، وتەبێژی وەزارەتی دەرەوەی ئێران بە تەلەڤزیۆنی وڵاتەکەی ڕاگەیاندووە، "ئەم کارە لە ڕادەبەدەر مەترسیدار و تاوانکارییە، هاوکات پێشێلکردنی سەروەری نیشتمانی و یەکپارچەیی خاکی قەتەر، پێشێلکارییەکی گەورەیە بۆ سەرجەم یاسا و ڕێسا نێودەوڵەتییەکان."
ئاژانسی هەواڵی دەوڵەتی سعوودییەش بڵاوی کردەوە، محەممەد بن سەلمان، شازادەی جێنشینی وڵات لەگەڵ تەمیم بن حەمەد سانی میری قەتەر قسەی کردووە و پشتیوانی خۆی بۆ قەتەر دووپات کردەوە.
وەزارەتی دەرەوەی سعوودیەش لە راگەیەندراوێکدا ئاماژەی داوە، سعوودیە هێرشەکانی ئیسرائیل و پێشێلکردنی ئاشکرای سەروەری قەتەر بە توندی سەرکۆنە دەکات.
لە ڕاگەیەندراوەکەدا هاتووە، سعوودییە "هاوسۆزی و پشتیوانی تەواوی خۆی لەگەڵ قەتەر دووپات دەکاتەوە و هەموو تواناکانی خۆی بۆ پشتیوانیکردن پیشان دەدات، هۆشداری دەدات هێرشەکانی بەردەوامەکانی ئیسرائیل و پێشێلکارییە ئاشکراکانی یاسا نێودەوڵەتییەکان بەرەو ئەنجامێکی خراپمان دەبات.
هەرچی وەزارەتی دەرەوەی عێراقە، "بە توندی ئیدانەی هێرشەکانی ئیسرائیل بۆ سەر سەرکردەکانی حەماس لە دەوحەی پایتەختی قەتەر دەکات و بە کارێکی ترسنۆکانەی دەزانێت، و پێشێلکارییەکی ئاشکرای سەروەری و خاکی قەتەرە و هەڕەشە بۆ سەر ئاسایش و سەقامگیرییەکەیە ناوچەکە."
وەزارەتەکە دەڵێت، "ئەم هێرشانە لە چوارچێوەی سیاسەتە بەردەوامەکەی ئیسرائیل بۆ لەنێوبردنی گەلی فەڵەستین، کە ئاسایشی ناوچەکە و نێودەوڵەتی ڕووبەڕووی گرژی و ئاڵۆزی زیاتر دەکاتەوە."
هەروەها وەزارەتی دەرەوەی عێراق پشتیوانی خۆی و گەلی قەتەر ڕووبەڕووبوونەوەی هەر هێرشێک بۆ سەروەرییەکانی و ئاسایشی نیشتمانیی دووپات کردەوە.
سەرۆکایەتی میسریش دەڵێت: "هێرشەکەی ئیسرائیل پێشهاتەیەکی مەترسیداری دار و ڕەت کردنەوەی گەشەسەندنەکانە، ئاماژەشی داوە، ئەو هێرشانە هەوڵە نێودەوڵەتییەکان بۆ کەمکردنەوەی گرژییەکان لە ناوچەکەدا تێک دەدات".
هاوکات، شێخ عەبدوڵڵا بن زاید، وەزیری دەرەوەی ئیمارات، بە توندی هێرشەکەی ئیسرائیلی بۆ سەر دەوحە سەرکۆنە کرد و بە پێشێلکارییەکی ئاشکرای سەروەریی قەتەر و یاسای نێودەوڵەتی ناوبرد. هەروەها پشتگیری تەواوی وڵاتەکەی بۆ قەتەر دەربڕی و داوای ڕاگرتنی دەستبەجێی گرژییەکان کرد. داواشی لە کۆمەڵگەی نێودەوڵەتی و ئەنجوومەنی ئاسایش کرد کە بەرپرسیارێتی خۆیان جێبەجێ بکەن بۆ ڕێگریکردن لە ئیسرائیل، چونکە بەردەوامبوونی ئەم هێرشانە هەڕەشە لە ئاسایشی ناوچەکە و جیهانی دەکات.
حکومەتی عومان لە ڕاگەیەندراوێکدا هاوسۆزی خۆی بۆ قەتەر گەلەکەی پیشان دا و بە توندی سەرکۆنەی هێرشەکانی ئیسرائیل کرد ئاماژەی داوە، ئەم هێرشانە پێشێلکارییەکی ئاشکرای یاسا نێودەوڵەتییەکان و سەروەری دەوڵەتانە، کە دەبێتە هۆی پەرەسەندنێکی مەترسیدار لە ناوچەکەم و هەڕەشە بۆ سەر ئاسایش و سەقامگیری ناوچەکە دەکات و دووری دەخاتەوە لە ڕێگای ئاشتی.
وەزارەتی دەرەوەی کوەیت لە تۆڕی کۆمەڵایەتی ئێکس بڵاوی کردووەتەوە، بە توندی ئیدانەی ئەو هێرشە ناڕەواکانی ئیسرائیل دەکەین.
لای خۆشیەوە ئەیمەن سەفادی، وەزیری دەرەوەی ئوردن، لە تۆڕی کۆمەڵایەتی ئێکس نوسیویەتی: بە توندی ئیدانەی هێرشی ئیسرائیلی بۆ سەر قەتەر دەکەم، ئەوە پێشێلکارییەکی ئاشکرای یاسا نێودەوڵەتییەکانە.
جۆزێف عەون، سەرۆکی لوبنان'ـیش سەبارەت بە هێرشەکەوە لە ئێکس نوسیویەتی: "ئەمە دەکەوێتە چوارچێوەی هەوڵەکانی ئیسرائیل بۆ ئاژاوەگێڕی لە ناوچەکە، کە ئیرادەی خۆی بۆ هێرشکردنە سەر هەموو ئەو وڵاتانەی هەوڵی بەدیهێنانی سەقامگیری و ئاسایش لە وڵاتانی ناوچەکە دەدەن نیشان داوە.
نەواف سەلام، سەرۆک وەزیرانی لوبنان ڕایگەیاند، حکومەتەکەی "بە توندی هێرشەکەی ئیسرائیل بۆ سەر قەتەر سەرکۆنە دەکات و داوای لە کۆمەڵگەی نێودەوڵەتی کرد هێرشەکانی ئیسرائیل ڕابگرن، چونکە ئەو هێرشانە هەڕەشە لە سەقامگیری ناوچەکە دەکەن.
کەمێک لەمەوبەریش، نوسینگەی مەحموود عەباس، سەرۆکی فەڵەستین لە ڕاگەیەندراوێکدا هێرشەکانی ئیسرائیل بۆ سەر قەتەر بە پێشێلکردنی ئاشکرای یاسا نێودەوڵەتییەکان و پەرەسەندن گرژییەکان ناو دەبات، کە هەڕەشە لە ئاسایش و سەقامگیری ناوچەکە دەکات.
هەروەها ماجید ئەنساری، وتەبێژی وەزارەتی دەرەوەی قەتەر، ڕاگەیەنراوێکی لە بارەی هێرشەکەی ئیسرائیل بۆ سەر چەند بارەگایەکی بزووتنەوەی حەماس لە دەوحەی پایتەختی قەتەر بڵاو کردەوە. بە توندترین شێوە هێرشەکەی ئیسرائیل بۆ سەر چەند بارەگایەکی ئەندامانی مەکتەبی سیاسیی حەماس لە دەوحە، سەرکۆنە دەکەین.
جەختی لەوە کردەوە، ئەم هێرشە تاوانکارییە پێشێلکارییەکی ئاشکرای هەموو یاسا نێودەوڵەتییەکانە، هەروەها هەڕەشەیەکی جیددییشە لەسەر ئاسایش و سەلامەتی قەتەرییەکان.
PM:07:18:09/09/2025
ئه‌م بابه‌ته 280
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت