به‌ره‌ی گه‌ل چه‌ند داواكارییه‌ك ئاراسته‌ی ده‌سته‌ی مافی مرۆڤ ده‌كات
وێستگه‌نیوز-
به‌ره‌ی گه‌ل داوا له ده‌سته‌ی سه‌ربه‌خۆی مافی مرۆڤی هه‌رێمی كوردستان ده‌كات له نزیكه‌وه چاودێری كه‌یسه‌كه‌ی لاهور شێخ جه‌نگی بكات و ئاماژه‌ی به‌وه كرد كه "تا ئێستاش له‌لایه‌ن ده‌زگا ئه‌منیه‌كان لایه‌نگرانی به‌ره‌ی گه‌ل ده‌ستگیر ده‌كرێن".
ده‌سته‌ی سه‌ربه‌خۆی مافی مرۆڤ له راگه‌یه‌ندراوێكدا ئاماژه‌ی به‌وه‌دا كه ئه‌مڕۆ دووشه‌ممه 2025/9/1 نوێنه‌ری به‌ره‌ی گه‌ل به سه‌رۆكایه‌تی شادمان مه‌لا حه‌سه‌ن سه‌ردانی دیوانی ده‌سته‌یان كرد و له‌لایه‌ن دكتۆره مونا یاقۆ سه‌رۆكی ده‌سته‌ی سه‌ربه‌خۆی مافی مرۆڤ و شاندی ده‌سته پێشوازی لێكرا.
له راگه‌یه‌ندراوه‌كه‌دا هاتووه كه "سه‌ره‌تا شانده‌كه سوپاسی ده‌سته‌ی مافی مرۆڤیان كرد كه له‌نزیكه‌وه سه‌ردانی سه‌رۆكی به‌ره‌ی گه‌ل و ده‌ستگیركراوه‌كانیان كردبوو و سۆراخی ون بوه‌كانیان به‌سه‌ر كردبۆوه. دواتر وتی داواكارین ده‌سته‌ی مافی مرۆڤ له‌نزیكه‌وه چاودێری كه‌یسه‌كه‌ی لاهور شێخ جه‌نگی بكات" و ئاماژه‌ی به‌وه كرد تا ئێستاش له‌لایه‌ن ده‌زگا ئه‌منیه‌كان لایه‌نگرانی به‌ره‌ی گه‌ل ده‌ستگیر ده‌كرێن و ده‌ست به‌سه‌ر كه‌ناڵی زوومی ئه‌و حیزبه داگیراوه‌و داوایان كرد كه ڕێگه بدرێت بكرێته‌وه".
ده‌ستی مافی مرۆڤ ئاماژه‌شی به‌وه‌دا كه شادمان مه‌لا حه‌سه‌ن وتیشی: "داوا ده‌كه‌ین چاره‌نوسی ئه‌و كه‌سانه‌ش ئاشكرا بكرێ كه هێشتا دیار نین له‌ڕۆژی رووداوه‌كه‌وه" و "بۆ ئه‌و مه‌به‌سته‌ش لیستێكی پێشكه‌ش به‌ده‌سته كرد".
لای خۆیه‌وه مونا یاقو سه‌رۆكی ده‌سته وتی: "وه‌ك ده‌سته‌ی مافی مرۆڤ به‌دواداچون بۆ هه‌ر كه‌یسێك ده‌كه‌ین بێ جیاوازی له‌هه‌ر كوێ بێ و ئه‌وه‌ش مافی ده‌سته‌یه و له‌چوار چێوه‌ی ئه‌رك و كاری خۆی به‌رده‌وام ده‌بێت له‌پێناو پاراستنی بنه‌ماكانی مافی مرۆڤ و گشت هاوڵاتیان".
وتیشی: "ده‌رگای ده‌سته كراوه‌یه بۆ هه‌ر كه‌س و لایه‌نێك كه سكاڵای خۆی پێشكه‌ش بكات بۆ سۆراخ كردن یان به‌دوا داچوون".
لای خۆیه‌وه شادمان مه‌لا حه‌سه‌ن له راگه‌یه‌ندراوێكدا وتی: "ئه‌مڕۆ دووشه‌ممه 2025/9/1 سه‌ردانی ده‌سته‌ی سه‌ربه‌خۆی مافی مرۆڤی هه‌رێمی كوردستانم كرد، له‌گه‌ڵ دكتۆر مونا یاقو سه‌رۆكی ده‌سته و هاوكارانی كۆبوومه‌وه، سه‌باره‌ت به ڕه‌وشی گیراو و بێ سه‌روشوێنانی شه‌ڕه‌كه‌ی رۆژی 22ی ئابی شاری سلێمانی".
شادمان مه‌لا حه‌سه‌ن ده‌ڵێت: "داوامان كرد هه‌وڵی به‌رده‌وامی خۆیان بده‌ن بۆ دیاریكردنی چاره‌نووسی بێ سه‌روشوێنان و باشكردنی ره‌وشی گیراوه‌كان و دادگایكردنیان به‌شێوه‌یه‌كی دادپه‌روه‌رانه".
ئه‌و سه‌ركرده‌یه‌ی به‌ره‌ی گه‌ل راشیگه‌یاندووه كه "داواكارین له كه‌سوكاری گیراوان ئه‌وانه‌ی تاكو ئێستا چاره‌نووسیان نادیاره، په‌یوه‌ندی به ناوه‌نده‌كانی مافی مرۆڤ بكه‌ن، بۆ دیاریكردنی چاره‌نووسیان".
PM:07:50:01/09/2025
ئه‌م بابه‌ته 1004
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت