بافڵ تاڵه‌بانی: دابینكردنی ژیانێكی ئارام بۆ خه‌ڵكه‌كه‌مان كاری له‌پێشینه‌مانه
وێستگه‌نیوز-
سه‌رۆكی یه‌كێتیی نیشتمانیی كوردستان له‌میانی كۆبوونه‌وه‌ی له‌گه‌ڵ سه‌رۆكی ده‌زگای هه‌واڵگری عیراق رایگه‌یاند كه "دابینكردنی ژیانێكی ئارام بۆ خه‌ڵكه‌كه‌مان كاری له‌پێشینه‌مانه"، ده‌شڵێت: "هه‌ركه‌سێك یاساشكێنی بكات، ده‌بێت یاسای به‌سه‌ردا بچه‌سپێنرێت".
به‌گوێره‌ی راگه‌یه‌ندراوێكی نووسینگه‌كه‌ی، بافڵ تاڵه‌بانی، سه‌رۆكی یه‌كێتیی نیشتمانیی كوردستان له ده‌باشان پێشوازی له حه‌مید شه‌تری، سه‌رۆكی ده‌زگای موخابه‌راتی عیراق كرد.
ئاماژه به‌وه‌شدراوه كه "له كۆبوونه‌وه‌كه‌دا كه قوباد تاڵه‌بانی، جێگری سه‌رۆك وه‌زیران، جه‌لال شێخ ناجی، سه‌رۆكی ئاژانسی پاراستن و زانیاری/زانیاری و هیوا ئه‌حمه‌د، سه‌رۆكی ده‌زگای ئاسایشی هه‌رێم، ئاماده‌یبوون، دۆخی ئه‌منیی عیراق و ناوچه‌كه گفتوگۆی له‌سه‌ر كرا و جه‌خت له فراوانكردنی هه‌ماهه‌نگی و هاریكارییه هه‌واڵگرییه‌كان له نێوان هه‌رێمی كوردستان و عیراق كرایه‌وه، له‌پێناو زاڵبوون به‌سه‌ر ئاڵنگارییه ئه‌منییه‌كان و پاراستنی ئاسایش و سه‌قامگیری له وڵاتدا.
سه‌رۆكی یه‌كێتی گرنگیی پێویستیی په‌یوه‌ندی سه‌رجه‌م ده‌زگا هه‌واڵگریی و ئه‌منییه‌كانی دووپاتكرده‌وه و وتی: "دابینكردنی ژیانێكی ئارام و دوور له تیرۆر بۆ خه‌ڵكه‌كه‌مان كاری له‌پێشینه‌مانه".
وتیشی: "به كاری پێكه‌وه‌یمان ده‌توانین باشتر رووبه‌ڕووی مه‌ترسییه ئه‌منییه‌كان ببینه‌وه و هیچ ده‌رفه‌تێكیش بۆ تیرۆریستان نه‌هێڵینه‌وه".
سه‌رۆكی یه‌كێتی راشیگه‌یاند كه "هه‌ركه‌سێك له هه‌ر پله و پۆستێكدا بێت، یاساشكێنی بكات و ژیان و سه‌قامگیریی خه‌ڵكه خۆشه‌ویسته‌كه‌مان بخاته مه‌ترسییه‌وه، ده‌بێت یاسای به‌سه‌ردا بچه‌سپێنرێت و یاسا سه‌روه‌ر بێت".
PM:09:15:30/08/2025
ئه‌م بابه‌ته 692
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت