فارس عیسا: ئه‌وانه‌ی درۆنمان ئاراسته ده‌كه‌ن به‌شه‌و و به‌ڕۆژ، سه‌ره‌خۆشیمان لێ ده‌كه‌ن
وێستگه‌نیوز-
سه‌رۆكی نوێنه‌رایه‌تی حكومه‌تی ھه‌رێمی كوردستان له به‌غدا رایگه‌یاند كه ئه‌وانه‌ی درۆنمان ئاراسته ده‌كه‌ن به‌شه‌و و به‌ڕۆژ، سه‌ره‌خۆشیمان لێ ده‌كه‌ن، ده‌شڵێت: "كێشه‌ی گه‌وره‌ی ئێمه له‌گه‌ڵ به‌غدا عه‌قڵیه‌ته و وه‌كو ھاوڵاتیی ده‌رجه دوو ته‌ماشای كورد ده‌كه‌ن".
ئه‌مڕۆ شه‌ممه فارس عیسا، سه‌رۆكی نوێنه‌رایه‌تی حكومه‌تی ھه‌رێمی كوردستان له به‌غدا، بۆ ماڵپه‌ڕی فه‌رمیی پارتی دیموكراتی كوردستانی باسی له‌وه كرد كه "كێشه‌ی ئێمه له به‌غدا كێشه‌ی عه‌قڵیه‌ته، گه‌یشتوونه‌ته ئه‌و قه‌ناعه‌ته‌ی ھه‌رێمی كوردستان به‌ره‌وپێش ڕۆیشتووه و متمانه‌یان به وڵاتێكی دیموكراسی و فیدراڵی نییه، به‌پێی ده‌ستووریش ئێمه وڵاتێكی دیموكراسین، به‌ڵام مامه‌ڵه‌ی ئه‌وان مه‌ركه‌زییه، ئێمه ده‌ستكه‌وته‌كانمان به یه‌كڕیزی پاراستووه، له ڕابردوو و له حكومه‌تیش به یه‌ك تیم كار كراوه، حكومه‌تی ھه‌رێمی كوردستان زۆر ھه‌وڵی داوه كێشه‌كانی ھه‌رێم نه‌گه‌نه به‌غدا، بۆیه بۆ كشانه‌وه‌ش پێویسته ھه‌موو فراكسیۆنه‌كان پێكه‌وه بكشێنه‌وه نه‌ك یه‌ك فراكسیۆن".
فارس عیسا ده‌ڵێت: "به‌غدا وه‌كو ھاوڵاتیی ده‌رجه دوو ته‌ماشای كورد ده‌كات و پێی وایه پێویسته ئه‌وان بڕیار بده‌ن و ئێمه جێبه‌جێی بكه‌ین".
وتیشی: "بۆ پرسی نه‌وتیش، پێشتر رێككه‌وتن له‌نێوان ھه‌رێم و به‌غدا هه‌بووه بۆ ئه‌وه‌ی ره‌شنووسێك ئاماده‌بكرێت و یاسای نه‌وت و غاز ده‌ربچێت، عێراق لێی په‌شیمان بووه‌وه".
ئاماژه‌شی به‌وه‌دا كه "له مانگی شه‌ش كۆبوونه‌وه‌یه‌كی له‌گه‌ڵ ئێمه ئه‌نجام دا و بڕیار درا ئه‌و نه‌وته‌ی به‌رده‌سته له سه‌ره‌تای مانگی حه‌وت راده‌ستی به‌غدا بكرێت، ئێمه‌ش به‌غدامان ئاگادار كرده‌وه، به‌ڵام عێراق وه‌ری نه‌گرت، گوایه كێشه‌ی ته‌كنیكی ھه‌یه، بۆیه جێگه‌ی داخه عێراق مامه‌ڵه‌ی جیا له‌گه‌ڵ ئێمه ده‌كه‌ن".
"ھه‌ندێك لایه‌ن له عێراق نایانه‌وێت ھه‌رێم و به‌غدا بگه‌نه رێككه‌وتن، ئه‌وه‌ش بووه ھۆی ئه‌وه‌ی به درۆن ھێرش بكرێته سه‌ر كێلگه‌كانی نه‌وتی ھه‌رێم، بۆ ئه‌وه‌ی كێشه‌كان ھه‌ر وا به‌رده‌وام بن، ئه‌وانه‌ی درۆنیان ئاراسته‌ی ھه‌رێم كردووه دیارن، ئه‌وانه‌ی درۆنمان ئاراسته ده‌كه‌ن به‌شه‌و و به‌ڕۆژ، سه‌ره‌خۆشیمان لێ ده‌كه‌ن، ئه‌وه‌ی كرا بۆ ئه‌وه بوو ھه‌رێم و به‌غدا نه‌گه‌نه ڕێككه‌وتن"، سه‌رۆكی نوێنه‌رایه‌تی حكومه‌تی ھه‌رێمی كوردستان له به‌غدا واده‌ڵێت.
فارس عیسا راشیگه‌یاند كه "وڵاتانیش له‌گه‌ڵ ئه‌وه نین كێشه‌كانی نێوان ھه‌رێم و به‌غدا به‌رده‌وام بن، ئه‌وانیش ھه‌وڵ ده‌ده‌ن چاره‌سه‌ر بكرێت، بۆیه ئه‌گه‌ر ئێمه له به‌غدا یه‌كده‌نگ و یه‌كڕه‌نگ بین كێشه‌كان باشتر چاره‌سه‌ر ده‌كرێن، یه‌كڕیزی كورد ده‌بێته فاكته‌رێك كێشه‌كان به‌یه‌كجاری چاره‌سه‌ر بكرێن، چونكه له عێراق وا بیرده‌كه‌نه‌وه چه‌ند له ھه‌رێمی كوردستان بده‌ن پێگه‌ی ئه‌وان به‌ھێز ده‌بێت".
PM:07:07:30/08/2025
ئه‌م بابه‌ته 560
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت