پۆلیسی دارستان: ئاگره‌كه‌ی پێنجوێن به‌رده‌وامه‌ و كه‌سێكیش ده‌ستگیركرا

‌

وێستگه‌نیوز –
به‌ڕێوه‌به‌رایه‌تی پۆلیسی دارستان و ژینگه‌ی پارێزگای سلێمانی رایگه‌یاند كه‌ ئاگره‌كه‌ی پێنجوێن تا ئێستا به‌رده‌وامه‌ و بریندار هه‌یه‌ و كه‌سێكیش ده‌ستگیركراوه‌.

ئه‌مڕۆ شه‌ممه‌ پۆلیسی دارستان و ژینگه‌ی سلێمانی له‌ راگه‌یه‌ندراوێكدا بڵاویكرده‌وه‌ كه‌ "ئاگره‌كه‌ی سنوری قه‌زای پێنجوێن تا ئێستا به‌رده‌وامی هه‌یه‌ و كۆنترۆڵ نه‌كراوه‌ سنوری چه‌ند گوندێكی وه‌ك (هه‌ڵاڵاوا، مه‌سۆ، كێلو، نزاره‌ و ده‌ره‌گورگان)ی گرتۆته‌وه‌.

له‌ راگه‌یه‌ندراوه‌كه‌دا هاتووه‌ "له‌گه‌ڵ ده‌ستپێكی ئاگره‌كه‌ ته‌واو هێزه‌كانی پۆلیسی دارستانی سلێمانی و به‌به‌شداری مه‌فره‌زه‌كانی په‌شی پۆلیسی دارستانی پێنجوێن و بنكه‌كانی سه‌یدسادق و بنكه‌كانی شاره‌زوور و بنكه‌كانی قه‌ره‌داغ و بنكه‌كانی به‌شی سلێمانی و باره‌گای به‌ڕێوه‌به‌رایه‌تیمان ئاماده‌بوون".

ئاماژه‌شی‌ به‌وه‌دا كه‌ "هاوشانی ئێمه‌ تیمه‌كانی به‌رگری شارستانی هه‌روه‌ها تیمی خۆبه‌خش و دڵسۆزی رێكخراوی مله‌كه‌وه‌ و دانیشتوان و گوندنشینانی دڵسۆز و خه‌مخۆر به‌وپه‌ڕی دڵسۆزی تا ئه‌م ساته‌ به‌شدارن له‌ هه‌وڵی كۆنتڕۆڵكردنی ئاگره‌كه‌.

پۆلیسی‌ دارستان ده‌ڵێت: "به‌هۆی سه‌ختی ناوچه‌كه‌ و مه‌ترسی هه‌بوونی مین كاری ته‌واوی تیمه‌كان سه‌خت بووه‌".

ئه‌وه‌شی‌ خسته‌ڕوو كه‌ "به‌هۆی ئه‌و ئاگره‌وه‌ تا ئێستا چه‌ند بریندارێك هه‌یه‌ كه‌ دوو هاوڵاتی دڵسۆز و خۆبه‌خشن له‌گه‌ڵ به‌ڕێوه‌به‌ری پۆلیسی دارستانی پێنجوێن و له‌ ئێستادا له‌ژێر چاره‌سه‌ردان".

راشیگه‌یاند كه‌ "له‌ ئێستادا كه‌سێك به‌تۆمه‌تی كه‌وتنه‌وه‌ی ئاگره‌كه‌ ده‌ستگیركراوه‌ و لێكۆڵینه‌وه‌ و به‌دواداچوون به‌رده‌وامه‌".

PM:04:34:30/08/2025