حاڵەتێکی تای خوێنبەربوون لە دهۆک تۆمارکرا

وێستگەنیوز-

وەزارەتی تەندروستیی حکومەتی هەرێمی کوردستان تۆمارکردنی حاڵەتێکی تای خوێنبەربوونی لە سنووری پارێزگای دهۆک راگەیاند.

ئەمڕۆ شەممە 30ی ئابی 2025، وەزارەتی تەندروستیی حکومەتی هەرێمی کوردستان رایگەیاند، "حاڵەتێکی دیکە بە نەخۆشی تای خوێنبەربوون لە هەرێمی کوردستان تۆمارکرا، ئەویش پیاوێکی دانشتووی شاری سیمێڵ لە سنووری پارێزگای دهۆک کە تەمەن (43) ساڵە و پیشەی قەسابە بەرکەوتەی ئاژەڵی تووشبوو بووە".

ئاماژە بەوەکراوە، "دوای سەردانی نەخۆشخانە و گومانلێکردن بە نەخۆشی تای خوێنبەربوون و بوونی نیشانەکانی، چەندین رێکاری دەستنیشانکردن و چارەسەری پزیشکی گیراوەتەبەر، لەئێستادا لەژێر چاودێری پزیشکی لە نەخۆشخانە خەوێندراوە و چارەسەر وەردەگرێت و تا ئێستا باری تەندروستی جێگیرە".

ئەوەش خراوەتەڕوو، "تا ئێستا دوای بوونی چەندین حالەتی گومانلێکراوی نەخۆشی تای خوێنبەربوون لە هەرێمی کوردستان و هاتنیان بۆ نەخۆشخانە و بەدواداچوون و پشکنین بۆ گومانلێکراوانی ئەمساڵدا لەماوەی ڕابردوو، دەرەنجام تەنها 9 حالەت دەسنیشانکراون و پشتڕاستکراوەتەوە کە بەداخەوە دوو حالەت لەبەر قورسی باری تەندروستی گیانیان لەدەستدا و حالەتەکانی دیکە بەتەواوی چاکبوونەتەوە و لە نەخۆشخانە دەرچوونە".

وەزارەتی تەندروستی داوا لە هاوڵاتییان دەکات رێنماییەکان جێبەجێ بکەن و
لەکاتی بوونی گومان و نیشانەکانی نەخۆشی لەسەر ئاژەڵ پێویستە تیمەکانی ڤێترنەری ئاگاداربکرێنەوە.

PM:12:11:30/08/2025

ئه‌م بابه‌ته 200 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت