ئەبووبەکر هەڵەدنی: خەڵکی سلێمانی بەهەموو دەنگ و ڕەنگەکانمانەوە بەرامبەر شەڕەکەی لالەزار بەرپرسیارین و ئۆباڵمان لە ئەستۆیە
وێستگەنیوز_
ئەبووبەکر هەڵەدنی دەربارەی شەڕەکەی لالەزار دەڵێت: هەموومان ئاگاداری جوڵاندنی هێزبووین، نازانم بۆچی ڕێگریمان لە ڕشتنی خوێن نەگرت و هەست بە شەرمەزاری و ئازاری ویژدان دەکەم کە ڕێگریم نەکرد.
لە هەژماری خۆی لە فەیسبووک، ئەبووبەکر هەڵەدنی، پەرلەمانتاری پێشووی کوردستان نوسیویەتی: "لە رووداوەکەی لالەزاردا بەداخەوە فەرزی کیفایەمان ئەنجام نەدا وهەمووان تاوانبارین!؟ ئەوەی هەفتەیەک لەمەوپێش و لە لالەزار روویدا ئەگەر نەڵێم هەر شەش ملیۆن کوردەکەی باشوور، لانی کەم خەڵکی سلێمانی بەهەموو دەنگ وڕەنگەکانمانەوە بەرپرسیارین وئۆباڵمان لە ئەستۆیە".
دەشڵێت: "لە کاتژمێر شەشی ئێوارەوە جموجۆڵی نا ئاسایی لە بازگەکان هەستی پێکراو لە هەشتی شەوەوە دەنگۆی فەرمانی دەستگیرکردن بۆ کاک لاهور شێخ جەنگی بڵاوبووەوە، ئیتر لەکاتەکانی دە و یانزەی شەوەوە هەمووان ئاگادار و گوێبیست و بینەری جووڵاندنی هێز بووین بۆسەر لالەزار، نازانم بۆ کەسمان نەکەوتینە خۆ تا بەر لە ڕژاندنی خوێن و ئەو زیانە ماددی ومەعنەویانە بگرین کە بەر کورد و کوردستان و هەرێم و سلێمانی کەوت، بۆچی کەسایەتیە سیاسیی و کۆمەڵایەتیەکان و بازرگانان و مامۆستایانی زانکۆ وزانایانی ئایینی و رۆشنبیر و ڕۆژنامەنوسان خۆیان کرد بە کابرای کەڕەی شەربەت وەک ئەوەی زاممان کەم وخەفەتمان هیچ نەبێت تا ئەم رووداوەش بە تەوێڵی مێژوومانەوە بنووسێت".
ئاماژەی بەوەشکردووە، نەدەکرا هەمووان پشتێنەیەکی مرۆیی دروست بکەین بۆ بەرگرتن لە شەڕەکە و دواتر دۆزینەوەی ڕێگا چارەی ئاشتیانە بۆکۆتایی هێنان بە کێشەکە. لێتان ناشارمەوە لەو ڕۆژەوە لە ئاست کەمتەرخەمی و بێباکی هاونیشتیمانیانی ئەم هەرێمە توشی شۆک و داچڵەکانێکی قووڵ بووم، لانی کەم بیرەوەری پەنجا ساڵم لە رۆژانی هەرەسی شۆڕشی ئەیلوول و کارەساتی هەکاری و جەنگی عێراق-ئێران و براکووژی ساڵانی هەشتاکان و نەوەدەکان و کیمیایی باران و ئەنفال و ڕاگواستن و تەرحیل و تەهجیر و تەبعیس و تەعریبی عەفلەقیەکان و جەنگی دووەمی کەنداو و گەمارۆی ئابووری و برسیەتی و گوڵەچنە و دوو ئیدارەیی و 31ـی ئاب و شەڕی تیرۆریستانی داعش و 16ـی ئۆکتۆبەر بیر دێت، هیچی هێندەی ئەمە ئازار بەخش نەبوو چونکە ناشایستە بوو بە کورد و ناجۆر بوو لەگەڵ پەندوەرگرتن لەدەردی ناکۆکی وبراکوژی، نادادپەروەری بوو بەرامبەر سلێمانی، نالۆجیکی بوو بەرامبەر ئێستای سەردەمی تەکنەلۆژیای نوێ کە بەدەستی خۆمان وێنەکانی باروت و خوێن و دووکەڵ وسووکایەتی و دەنگی گوللـە و زرمەی تۆپ و گرمەی زرێپۆشمان بۆ دونیا گواستەوە."
ئەبووبەکر هەڵەدنی باسی لەوەشکردووە، "ئەگەر کۆمەڵێک کەسایەتی وەک فەرزی کیفیایە بەئەرکی ناوبژی وئاشتەوایی هەڵبستاینایە ئێستا هەموومان گیرۆدەی ئەوە نەدەبووین کەخەمێکی تر وزامێکی تر بۆ چەند ساڵێکی تر خۆشیەکانمان بەرێت وکاتێکی زۆریشمان دەوێت بۆ ساڕێژی ئەم برینەش. ئیتر دەبێت نەوەکانی داهاتوو ومێژوو چۆن لێپرسینەوەی ئەو چرکەساتەمان لەگەڵ بکات؟ بەش بەحاڵی خۆم هەست بە شەرمەزاری و خەجاڵەتی دەکەم وویژدانم ئازاروگینگڵم پێدەدات."
PM:12:37:29/08/2025
ئه‌م بابه‌ته 872
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت