سامان سیوه‌یلی: تائێستا واده‌ی وه‌رزی نوێی خوێندن دیاری نه‌كراوه
وێستگه‌نیوز-
وته‌بێژی وه‌زاره‌تی په‌روه‌رده‌ی حكومه‌تی هه‌رێمی كوردستان رایگه‌یاند كه به هۆی خانه‌نشینی مامۆستایان هیچ گرفتێكی كه‌می میلاك دروست نابێت، ده‌شڵێت: "تائێستا واده‌ی وه‌رزی نوێی خوێندن دیاری نه‌كراوه".
ئه‌مڕۆ پێنجشه‌ممه 14ی ئابی 2025 سامان سیوه‌یلی وته‌بێژی وه‌زاره‌تی په‌روه‌رده‌ی حكومه‌تی هه‌رێمی كوردستان ئاشكرایكرد كه "تا ئێستا حه‌وت هه‌زار و 500 مامۆستا له هه‌رێمی كوردستان خانه‌شین بوون و تا كۆتایی ئه‌مساڵ ژماره‌كه ده‌گاته 11 هه‌زار مامۆستا".
سامان سیوه‌یلی بۆ كوردستان 24 وتی: "په‌روه‌رده‌ی شارۆچكه‌كان میلاكی مامۆستایانیان رێكخستووه‌ته‌وه به هۆی خانه‌نشینی مامۆستایان هیچ گرفتێكی كه‌می میلاك دروست نابێت".
وتیشی: "له ئه‌گه‌ری دروستبوونی بۆشایی، نووسراوی فه‌رمی ئاراسته‌ی ئه‌نجوومه‌نی وه‌زیران ده‌كه‌ین، بۆ ئه‌وه‌ی گرفتی كه‌می مامۆستامان بۆ چاره‌بكات".
وته‌بێژی وه‌زاره‌تی په‌روه‌رده راشیگه‌یاند كه "تائێستا واده‌ی ده‌ستپێكردنی وه‌رزی نوێی خوێندن دیاری نه‌كراوه، له كۆتایی مانگی هه‌شت له كۆبوونه‌وه‌ی ئه‌نجوومه‌نی وه‌زاره‌ت ساڵنامه‌ی خوێندن په‌سند ده‌كرێت و بڕیاری ده‌ستپێكی ده‌وام له قوتابخانه‌كان ده‌درێت و ده‌ستبه‌كاربوونی مامۆستایان دیاریده‌كرێت".
PM:06:24:14/08/2025
ئه‌م بابه‌ته 1124
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت