وەزارەتی بەرگریی تورکیا: داواکارین هەسەدە پابەندی ڕێککەوتنی دیمەشق بێت
وێستگەنیوز_
وەزارەتی بەرگریی تورکیا ڕایگەیاند، یاداشتی لێکتێگەیشتنی تورکیا و سووریا بۆ مەشق و ڕاوێژکاری سەربازییە، هەروەها پاڵپشتی خۆی بۆ یەکپارچەیی خاکی سووریا دووپاتکردەوە و داوای لە هێزەکانی سووریای دیموکرات دەکات، پابەندی ڕێککەوتنی دیمەشق بێت.
ئەمڕۆ پێنجشەممە، 14ـی ئابی 2025، وەزارەتی بەرگریی تورکیا ڕاگەیەندراوێکی بڵاوکردەوە تێێدا هاتووە، پێشبینی دەکات هێزەکانی سووریای دیموکرات پابەندی ڕێککەوتنامەی یەکگرتن لەگەڵ حکوومەتی سوریا بن.
ئاماژەی بەوەش کرد، ڕاگەیەندراوی 'جیاوازبوونەوە' کە هەسەدە لە 8ـی ئاب بڵاویکردەوە، پێچەوانەی ئەو ڕێککەوتنەیە کە لەگەڵ دیمەشق واژۆکراوە.
دەشڵێت: حکوومەتی سوریا بەرنامەی هەمەلایەنە و یەکگرتوو بە ئامانجی کۆتاییهێنان بە دابەشکاریی نەتەوەیی و ئایینی و تائیفی سووریا نیشانداوە، هەڵسوکەوتی ئیستفزازی و دابەشکاری هێزەکانی سووریای دیموکرات ڕێگری لەم پرۆسەیە دەکات.
ڕوونیشی کردەوە، بانگەوازەکانی حکوومەتی سووریا بۆ "یەک دەوڵەت، یەک سوپا" زۆر گرنگە بۆ بەدیهێنانی ئاشتی و سەقامگیریی سووریا لە ناوچەکەدا، "چاوەڕوانی پابەندبوون و جێبەجێکردنی ئەو ڕێککەوتنەی لە نێوان دیمەشق و هەسەدە لە 8ـی ئاداردا واژۆکراوە دەکەین، بۆ بەشداریکردن لە بنیاتنانی سووریایەکی سەقامگیر و ئاشتیخواز و ئاسایشی دوور لە تیرۆر."
وتیشی: هەر لەسەرەتاوە بەرگریان لە یەکێتی سیاسی و یەکپارچەیی خاکی سووریا کردووە و بەردەوامیش دەبن لە پاڵپشتیکردنیان و واژۆکردنی یاداشتنامەی دوێنێی لێکتێگەیشتنی هاوبەش بۆ ڕاهێنان و ڕاوێژکاریی سەربازیی لەگەڵ سووریا، هەنگاوێکی گرنگە لە نێوان هەردوو وڵاتدا.
PM:03:47:14/08/2025
ئه‌م بابه‌ته 540
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت