سۆن: دوا ١٠ ساڵ تۆتنهام جێدەهێڵم
.jpg)
وێستگە سپۆرت-
سۆن ئاشکراى کرد دوای 10 ساڵ تۆتنهام جێدەهێڵێت و ئەوەش قورسترین بڕیاری ژیانیەتی.
هیونگ مین سۆنی ئەستێرەی کۆریای باشووری لە کۆنگرەیەکى ڕۆژنامەوانى پێش یارییە دۆستانەکەی یانەکەی رایگەیاند، بڕیاری کۆتاییمداوە و لەم هاوینەدا دوای 10 ساڵ یانەی تۆتنهام جێدەهێڵم.
سۆن وتی، شتێکی گرنگ هەیە دەمەوێت پێتان بڵێم ئەویش ئەوەیە کە بڕیاری کۆتاییمداوە بە رێککەوتن لەگەڵ بەرپرسانی یانەکەم، ئەوانیش بەڕێزەوە پشتیوانی رۆیشتنم لێدەکەن.
وتیشی، ئەمە قورسترین بڕیاری ژیانم بووە بەڵام هەست دەکەم هەموو شتێکم لەگەڵ یانەکەم بەدەستهێناوە، کاتی ئەوە هاتووە بەدوای ژینگەیەکی نوێ و رکابەری نوێدا بگەڕێم.
سۆن دەڵێت، من یاریزانێک لاو بووم کاتێک پەیوەندیم بە تۆتنهامەوە کرد و تەنانەت زمانی ئینگلیزیشم نەدەزانی، ئەمڕۆش وەک پیاوێکی پێگەیشتوو ئەم یانەیە جێدەهێڵم، سوپاسی هاندەران دەکەم کە بەردەوام خۆشەویستی خۆیان بۆ دەربڕیوم.
دەشڵێت، هەندێک لە هاوڕێکانم بێهیوا بوون بەڵام رێزی بڕیارەکەشیان گرتم، بن دەیڤز هاوڕێییەکی نزیکمە و گفتوگۆم لەگەڵ کردووە لەسەر داهاتووم، لە چەند رۆژی رابردوودا هەوڵمداوە دڵخۆش دەربکەوم تا کاریگەری نەرێنی لەسەر یاریزانەکان دروست نەکات.
بە پێی هەواڵی رۆژنامەکان بێت، مین سۆن لەگەڵ یانەی لۆس ئەنجلێسی ئەمریکی گەیشتووەتە رێککەوتن، ئەو یاریزانەش تا ئەم ساتە 454 یاریی بۆ تۆتنهام ئەنجامداوە و خاوەنی 193 گۆڵ و 101 ئەسیستە، وەرزی رابردووش نازناوی یۆرۆپا لیگی لەگەڵدا بەدەستهێنا.
AM:10:46:02/08/2025
ئه‌م بابه‌ته 1592
جار خوێنراوه‌ته‌وه