لەبارەی زیادبوونی قوربانییەکانی "سێكسی ئەلیكترۆنی" لەکوردستان هۆشداری دەدرێت

‌لە قەزایەكی كوردستان، هەفتانە 11 كەس ڤیدیۆی سێكسی لێ تۆماركراوە، هەرێمی کورستان بە قوناغێكی "مەترسیداری" سۆشیال میدیا ناودەبرێت

ئەندام عومەر، ماستەر لە ئەندازیاری كۆمپیوتەر و بەڕێوەبەری كۆمپانیای تێك ئای بۆ تەكنەلۆژیای زانیاری لەپەیجی خۆی لەفەیسبوک نوسیویەتی، "سێكس یەكێكە لە 5 بەهێزترین سێكتەری بازرگانی لەسەرانسەری جیهان، لەگەڵ پێشكەوتنە بەردەوامەكانی تەكنەلۆژیا، سێكسی ئەلیكترۆنییش زیاد بووە كە خۆی دەبینێتەوە لە قسە كردن و نوسین و پەیوەندی دەنگ و رەنگ (ڤیدیۆ)، سێكسی ئەلیكترۆنی بریتیە لە خۆبەتاڵكردنەوە لە حەز و ئارەزوەكان لەگەڵ ڕەگەزی بەرامبەر چ بە شێوەی نوسین (نامە-چات)،بە شێوەی دەنگ (مۆبایل ئەپڵیكەیشنەكانی پەیوەندی كردن)یاخود بە شێوەی دەنگ و ڕەنگ (ڤیدیۆكۆڵ)".

ئاماژەی بەوەشکردوە، "ماوەی چەند ساڵێكە سێكسی ئەلیكترۆنی لە هەرێمی كوردستان بڵاوبۆتەوە و بەو هۆیەشەوە سەدان هەزار دۆلار رەوانەی دەرەوەی كوردستان كراوە، نەبوونی هۆشیاری پێویست و تێنەگەیشتن لە بنەما سەرەكیەكانی سۆشیال میدیا ، بە بێ دەنگی كوردستانی پەلكێش كردوە بۆ قۆناغێكی مەترسیدار و هێواش هێواش ئەو مەترسیانە ئاشكرا دەبن، لە ماوەی ڕابردوودا و بە تایبەتی تر كۆتایی ئەم 3 ساڵە، مانگانە سەدان هەزار دۆلار رەوانەی دەرەوەی ووڵات دەكرێت (بە تایبەتی مەغریب و تونس و جەزائیر) بە هۆی تۆماری ڤیدیۆی ئابروبەرانەی بەكارهێنەرانی ئینتەرنێت لە هەرێمی كوردستان یاخود بە واتایەكی تر سێكسی ئەلیكترۆنی".

ئەو شارەزایەی تۆڕە کۆمەڵایەتییەکان هۆشداری دەدات لەمەترسییەکانی بڵابونەوەی ئەو جۆرە بازرگانییە و باس لەوە دەکات، باندە مەغریبیەكان سەرمەشقی ئەو كارەیان كردوە و لە ڕێگای تۆڕە كۆمەڵایەتیەكانەوە سێكسی ئەلیكترۆنی بە شێوەی ڤیدیۆ لەگەڵ خەڵك ئەنجام دەدەن و دواتریش هەرەشەی بڵاوكردنەوەی لێدەكەن ،بۆ ئەم مەبەستەش مانگانە سەدان هەزار دۆلار لە هەرێمی كوردستانەوە رەوانەی دەرەوەی ووڵات دەكرێت بە مەبەستی "ئابرونەچوون و بڵاو نەكردنەوەی ڤیدیۆكانیان، بەگوێرەی ئامارێکیش قەزایەكی بچووكی ئەم كوردستانە، هەفتانە 11 كەس ڤیدیۆی سێكسی لێ تۆماركراوە لەلایەن ئەو باندە مەغریبیانەوە، لە هەمان كاتدا و بە پێی ئاماری وەزارەتی ناوەخۆ، ڕۆژانە 72 كەس لە تەواوی هەرێمی كوردستان داوای یاسایی تۆماردەكات دژی خراپ بەكارهێنانی سۆشیال میدیا و هەڵخەتاندن و هەرەشە و سووكایەتی پێكردن ".

ئەوەشی خستوەتەڕو، ئەوەی جێگای مەترسییە، ئێستا ئەو باند و گروپانە لە هەرێمی كوردستان ، بە مەبەست یان بێ مەبەست ، هەرەشەی بڵاوكردنەوەی ڤیدیۆ و وێنەی ڕووتی سەدان كەس دەكەن، بەجۆرێک لە 2 مانگی رابردوودا تۆری "كۆمەلایەتی سناپ چات كەوتوەتە ژێر هەرەشەی ئەو باندە كوردیانە و دەیان ڤیدیۆی رووت و سێكسی كچی كوردیان بلاوكردوەتەوە. ئەوەی گرنگە تاوەكو ئێستا هۆشیاری پێویستی بەكارهێنانی تۆرە كۆمەڵایەتیەكان نیە ، لە ناردنی وێنە و ڤیدیۆی رووت لە نێوان 2 خۆشەویست ، یان 2 هاوڕێ ، یان 2 هاوسەر.. هتد وای كردوە كە دوای بڵاوبونەوەی ئەو ڤیدیۆیانە بە لێدان و جیابونەوە (تەلاق) و تەنانەت هەندێك كەیس بە كوشتن كۆتایی هاتووە".

لەبارەی رێگاکانی چارەسەری ئەو بابەتەش ئەندام عومەر دەڵێت، دوو بنەمای سەرەكی هەیە بۆ ئەو ئەو جۆرە لادان و هەڵەكردنانە، یەكەمیان نەبوونی هۆشیاری تەكنەلۆژی (كە نازانم كێ بەو كارە هەڵبسێت و خەڵك ئاگادار بكاتەوە لەو جۆرە مەترسیانە )، دووەمینیان ئەو بێ كەسیەی لە سۆشیال میدیا و راگەیاندنی كوردی هەیە كە وایان لە خەڵك كردوە هەموو شتێكیان لا ئاسایی بێت، "پر بینەرترین و زۆرترین خوێنەری بابەتەكان یان باسی سێكسە ، یان ڤیدیۆی نیمچە ڕووت وسێكسیە، ئەوەی جێگای هەڵوێستە لەسەر كردنە ئەوەیە كە لە هەركەسێك بپرسیت و ئامۆژگاری بكەیت كە ئاگاداری خۆی و ماڵ و منداڵ و خۆشەویستانی بێت ، ئەوا بێ یەك و دوو دەڵێت ئاگرە سوورە لە من دوورە ،بەڵام بێ ئاگا لەوەی ڕۆژێك دێت ئەو ئاگرەی سۆشیال میدیا هەمومان بەرەو هەڵدێر دەبێت و دوور یان نزیك كاریگەری نەرێنی لەسەرمان بەجێدەهێڵێت".