وەزارەتی ناوخۆ بڕیاری كردنەوەی دەروازەیەكی داوە و تائێستا بەداخراوی ماوەتەوە
وێستگەنیوز- رەڤەند گوھەزۆی
دوای ساڵێك لەداخستنی بەهۆی ڤایرۆسی كۆرۆناوە، لە 18ی ئەم مانگەوە بە نووسراوێكی فەرمی وەزارەتی ناوخۆ، بڕیاری كردنەوەی دەروازەی سەرزێرێ لەنێوان توركیا و باشووری كوردستان دەرچوو، بەڵام تائێستا نەكراوەتەوە.
سەربەست سەبری، بەرێوەبەری ناحیەی كانی ماسێ بەوێستگەنیوزی راگەیاند، ئەمڕۆ شەش رۆژ بەسەر دەرچوونی نووسراوی فەرمی وەزارەتی ناوخۆ تێپەڕی بۆ كردنەوەی دەروازەی سەرزێرێ لە باكوور و باشووری كوردستان لە سنوری قەزای ئامێدی، بەڵام تائێستا نەكراوەتەوە.
ناوبراو روونیكردەوە، تائێستا ھۆكاری سەرەكی كردنەوەی دەروازەكە دیار نییە، بەڵام بەپێی زانیارییەكان والی جۆلەمێرگ و قایمقامی قەزای چەلێ رەزامەندیان نەداوە لەسەر كردنەوەی دەروازەكە، چونكە ئەوان لە دانوستاندان.
دەروازی سەرزێرێ لە ساڵی 2016 لە نێوان توركیا و ھەرێمی كوردستان لە سنوری ناحیەی كانی ماسێ سەر بە قەزای ئامێدی لە باكووری پارێزگای دھۆك بەشێوەیەكی فەرمی كراوەتەوە.
سەربەست ئاماژە بەوەشكرد:"لەلای ئێمە ھیچ كێشەیەك نیە و فەرمانبەرانی دەروازەكە چەند رۆژێكە چوونەتە دەوامی خۆیان، ئەوانیش سیستم و تیمە پزیشكیەكانی خۆیان لە دەروازەكە داناوە و ئەوان دەڵێن چاوەڕێ بن لە چەند كاتژمێری داھاتوو دەكرێتەوە".
PM:10:00:24/02/2021
ئه‌م بابه‌ته 3224
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت