جێگری پارێزگار: پێشبینی ده‌كه‌ین دۆخی كۆرۆنا له هه‌ولێر به‌ره‌و خراپتر بڕوات
هێمن قادر، جێگری پارێزگاری هه‌ولێر
وێستگه نیوزـ
جێگری پارێزگاری هه‌ولێر پێشبینی ده‌كات دۆخی كۆرۆنا له شاره‌كه‌یدا به‌ره‌و خراپتر بڕوات به‌تایبه‌ت له چه‌ند رۆژی داهاتوودا، جه‌ختیش ده‌كاته‌وه كه ئێستا كێشه‌ی ئۆكسجین له شاره‌كه‌دا نه‌ماوه.
له وتوێژێكدا له‌گه‌ڵ به‌شی كوردی ده‌نگی ئه‌مریكا، مافپه‌روه‌ر هێمن قادر، جێگری پارێزگاری هه‌ولێر ئاشكرایكرد كه پێرێ نه‌خۆشخانه‌كانی شاری هه‌ولێر جێگه‌ی ئه‌وه‌ی نه‌مابوو نه‌خۆشی لێوه‌ربگیرێت، ئاماژه به‌وه‌ش ده‌كات، كه كێشه‌ی كه‌می ئۆكسجین له نه‌خۆشخانه‌كانی هه‌ولێر چاره‌سه‌ركراوه.
هێمن قادر وتیشی: ئێستا كێشه‌كه نه‌ماوه ئۆكسجینی باش دابین ده‌كرێت، به‌ڵام سیسته‌می پێدانی به‌نه‌خۆشه‌كان وه‌كو پێویست نییه، چونكه له‌ساڵی 1984 ه‌وه له‌لایه‌ن كۆمپانیایه‌كی یابانییه‌وه دروستكراوه ئه‌و كه‌لوپه‌لانه‌ی ماوه‌یان به‌سه‌رچووه و نییه له بازاڕ یه‌ده‌گی بۆ بكڕین."
ده‌قی وتوێژه‌كه‌ی جێگری پارێزگاری هه‌ولێر له‌گه‌ڵ ده‌نگی ئه‌مریكا:
"ڕێژه‌كه زۆر زیاتر له‌جاران بڵاوبۆته‌وه، له هه‌موو گه‌ڕه‌كه‌كان له كۆڵانه‌كان، له‌ناو ماڵه‌كان "
له سه‌ره‌تای وتووێژه‌كه‌دا، جێگری پارێزگاری هه‌ولێر، سه‌باره‌ت به ژماره‌ی توشبووانی كۆرۆنا له پارێزگای هه‌ولێر ده‌ڵێت: " هیچ ئامارێك نییه كه ڕۆژانه 2000 نه‌خۆش له هه‌ولێر تۆمار بكرێت، ته‌نها له چوار ڕۆژی ڕابردوودا ڕۆژانه نزیكه‌ی 200 نه‌خۆش تۆماركراوه، كه پشكنینییان بۆ ده‌كرێت له تاقیگه‌ی ناوه‌ندی هه‌ولێر، له پشكنینه‌كه ده‌رده‌چێت، كه هه‌ڵگری ڤایڕه‌سه‌كه‌ن، به‌ڵام "به‌ڕێزێك" له وه‌زاره‌تی ته‌ندروستی ئه‌وه‌ی ڕوون كردبویه‌وه ئه‌گه‌ر ڕۆژانه 200 كه‌س ده‌ربچێت له تاقیگه‌كان، كه هه‌ڵگری ڤایڕه‌سه‌كه‌ن كه‌واته 2000 كه‌س تووشبووه له شاری هه‌ولێر. كه‌واته ئێمه به‌شێوه‌یه‌كی فه‌رمی 2000 مان نییه ڕۆژانه 200 كه‌س له شاری هه‌ولێر، بابڵێن له پشكنینه‌كان ده‌رچوون، كه هه‌ڵگری ڤایڕه‌سه‌كه‌ن، بۆیه دۆخی ته‌ندروستی ده‌توانم بڵێم له هه‌ڵكشانی سێیه‌مدایه، كه هه‌ڵكشانێكی زۆره. نه‌خۆشه‌كان زۆربه‌ی هه‌ره زۆریان به نیشانه‌وه دێنه نه‌خۆشخانه. كاتێك كه نیشانه‌یان لێ ده‌رده‌چێت و ده‌چن پشكنین ده‌كه‌ن، كه‌واته ڕێژه‌كه زۆر زیاتر له جاران بڵاوبۆته‌وه، له هه‌موو گه‌ڕه‌كه‌كان له كۆڵانه‌كان، له ناو ماڵه‌كان. به‌داخه‌وه ئه‌و كه‌سانه‌ی كه به‌رگه‌ی ناگرن، گیان ده‌سپێرن، ڕۆژانه حاڵه‌تی مردن هه‌یه له شاری هه‌ولێر له 8-10 نه‌خۆش كه‌متر و زیاتر ڕۆژانه مردن هه‌یه."
"پێرێ نه‌خۆشخانه‌كانی شاری هه‌ولێر جێگه‌ی ئه‌وه‌ی نه‌مابوو یه‌ك نه‌خۆشی تری لێ وه‌ربگیرێت "
سه‌باره‌ت به هۆكاری به‌رزبوونه‌وه‌ی ژماره‌ی تووشبووانی كۆرۆنا، له شاری هه‌ولێر له كاتێكدا پێشتر بۆ پێنج ڕۆژ قه‌ده‌غه‌ی هاتوچۆ-ش ڕاگه‌یه‌نرابوو؟ مافپه‌روه‌ر هێمن قادر ئاماژه‌یكرد " له سه‌ره‌تای سه‌رهه‌ڵدانی ڤایڕه‌سه‌كه، له زۆربه‌ی وڵاتانی دونیا باسیان له‌وه كرد، كه ده‌بێت هه‌موو مرۆڤایه‌تی ئه‌و په‌تایه بگرن. كه‌واته به‌ره‌و ئه‌وه بچین به‌رگری له‌شی گشتی بڵاوبێته‌وه، بۆیه ئێمه له شاری هه‌ولێر هه‌ر زوو زۆر شوێنمان داخست، له سه‌ره‌تا داخستنی ده‌وامی قوتابخانه‌كان، هۆڵه‌كانی بۆنه‌ی ئاینی و زانكۆیه‌كان، ئێمه دامانخستن. هه‌موو مه‌به‌سته‌كه كه له‌سه‌ره‌تای مانگی سێ-وه بوو، هیوای ئێمه ئه‌وه بوو له زووترین كات چاره‌سه‌ر بدۆزرێته‌وه، یان ڤاكسینی ئه‌و ڤایڕه‌سه بدۆزرێته‌وه، له كاتێكدا ئێمه هیوای ئه‌وه‌مان ده‌خواست كه به‌ره‌و وه‌رزی هاوین و گه‌رما بڕۆین ئه‌م ڤایڕه‌سه نامێنێت، یان ئه‌وه‌تا زۆر هێواش ده‌بێته‌وه و خاو ده‌بێته‌وه و له‌ناو ده‌چێت، به‌ڵام به‌داخه‌وه به پێچه‌وانه‌وه ئێستا له مانگی هه‌شت-ین ڤایڕه‌سه‌كه زیاتر بڵاو بوویه‌وه و ته‌شه‌نه‌ی كرد."
جێگری پارێزگاری هه‌ولێر، ئه‌وه‌شی وت: " قه‌ده‌غه‌ی هاتوچۆ و ڕێكاره‌كانی خۆپارێزی و داخستنی شوێنه گشتییه‌كان هه‌موو هۆكاربوون، كه ئێمه بڵاوكردنه‌وه‌ی ئه‌و په‌تایه‌مان هێواش كرده‌وه و دوامانخست بۆ كاتێكی تر. كه‌واته ئه‌و ڤایره‌سه هه‌ر بڵاوده‌بێته‌وه و ده‌بێت هه‌موو كه‌سێك بیگرێت، به‌ڵام ئه‌وه‌ی مه‌به‌ستی حكومه‌تی هه‌رێمه هێواش بڵاوبێته‌وه بۆئه‌وه‌ی نه‌خۆشخانه‌كانی ئێمه بتوانن چاره‌سه‌ری نه‌خۆش بكه‌ن. پێرێ نه‌خۆشخانه‌كانی شاری هه‌ولێر جێگه‌ی ئه‌وه‌ی نه‌مابوو یه‌ك نه‌خۆشی لێ وه‌ربگیرێت."
" توانا و ده‌سه‌ڵاتی ته‌ندروستی ئێمه زۆر سنورداره. كه‌واته ئێمه له ڕووی ته‌ندروستییه‌وه توانای ئه‌وه‌مان نییه ئه‌و هه‌موو نه‌خۆشه له‌خۆمان بگرین "
ده‌رباره‌ی دۆخی نه‌خۆشخانه‌كانی شاری هه‌ولێر؟ جێگری پارێزگاری هه‌ولێر وتی: "له سه‌ره‌تای سه‌رهه‌ڵدانی ئه‌و ڤایڕه‌سه زۆر به‌ڕوونی وه‌زاره‌تی ته‌ندروستی و خودی "جه‌نابی" سه‌رۆكی حكومه‌تیش ئاماژه‌ی به‌وه‌كرد، كه توانا و ده‌سه‌ڵاتی ته‌ندروستی ئێمه زۆر سنورداره. كه‌واته ئێمه له‌ڕووی ته‌ندروستییه‌وه توانای ئه‌وه‌مان نییه ئه‌و هه‌موو نه‌خۆشه له‌خۆمان بگرین. هه‌م له توانای كادیری پزیشكی و هه‌م له ڕووی توانای شوێنه‌وه، هه‌میش وه‌كو چاره‌سه‌ر ئێمه ناتوانیین ئه‌و هه‌موو نه‌خۆشه‌كان له‌خۆمان بگرین، ئێمه داوای ئه‌وه‌مان ده‌كرد، كه هاوڵاتییان خۆیان بپارێزن، ده‌یان جار و سه‌دان جار ئه‌وه له هه‌موو ده‌زگاكانی ڕاگه‌یاندن بڵاوكراوه‌ته‌وه، كه له‌ڕووی ته‌ندروستییه‌وه ئێمه ناتوانیین نه‌خۆشێكی زۆر له‌خۆمان بگرین، به‌ڵام كاتێك كه ڤایڕه‌سه‌كه بڵاوبوویه‌وه و له‌م كاته‌ی كه ئێستا ئێمه‌ی تێداین، ئێمه له دوو ڕۆژی ڕابردوودا بیر له‌وه‌كراوه‌ته‌وه، كه دوو نه‌خۆشخانه‌ی تر ده‌ستنیشان بكرێت و ئاماده بكرێت بۆ وه‌رگرتنی نه‌خۆشه‌كانی هه‌ڵگری ڤایڕه‌سی كۆرۆنا، نه‌خۆشخانه‌ی ڕۆژئاوا، ئه‌مڕۆ له‌وانه‌یه بتوانێت نه‌خۆش وه‌ربگرێت. ئێمه توانایه‌كی زۆر خراپمان هه‌یه له‌ڕووی ته‌ندروستییه‌وه، كه ناتوانیین نه‌خۆشێكی زۆر له‌خۆمان بگرین له‌هه‌مانكاتیشدا كه جێگا ده‌بێت بۆ نه‌خۆشی تر ئه‌وه‌یه، كه خۆشبه‌ختانه به‌شێك له نه‌خۆشه‌كان به‌ره‌و چاره‌سه‌ر و به‌ره‌و چاكبوونه‌وه ده‌چن، كه ڕه‌وانه‌ی ماڵه‌وه ده‌كرێنه‌وه و ده‌توانرێت شوێنه‌كانی ئه‌وان سودی لێوه‌ربگرین بۆ نه‌خۆشی نوێ تا وه‌ریانبگرین."
"ژماره‌ی تووشبووان به‌ره‌و نزیكه‌ی 5000 هه‌زار توش بوو چووه "
ده‌رباره‌ی ژماره‌ی تووشبووانی كۆرۆنا، له شاری هه‌ولێر له سه‌ره‌تای سه‌رهه‌ڵدانی ڤایره‌سه‌كه‌وه؟ مافپه‌روه‌ر هێمن قادر ده‌ڵێت: " تاوه‌كو دوێنێ 4747 كه‌س توشی ڤایڕه‌سی كۆرۆنا بوون، ئه‌وه‌ی كه پشكنینیان بۆ كراوه له تاقیگه‌ی ناوه‌ندی، له هه‌ولێر، به‌ڵام له‌گه‌ڵ ئه‌وه‌شدا ده‌توانیین بڵێن به‌سه‌دان نه‌خۆش هه‌ن كه له بنه‌ڕه‌تدا پشكنینییان ئه‌نجام نه‌داوه، یا به‌بێ پشكنینی تاقیگه ڕه‌وانه‌ی ماڵه‌وه كراوه، یان چاره‌سه‌ری وه‌رگرتووه و چاكیش بۆته‌وه، به‌ڵام تاوه‌كو ئه‌مڕۆ به‌دڵنیاییه‌وه ڕێژه‌كه زیادیكردووه به‌ره‌و نزیكه‌ی 5000 هه‌زار توش بوو چووه."
"كێشه‌كه نه‌ماوه، ئۆكسجینی باش دابین ده‌كرێت، به‌ڵام سیسته‌می پێدانی به نه‌خۆشه‌كان وه‌كو پێویست نییه، چونكه له ساڵی 1984 ه‌وه ئەم سیستەمە، له‌لایه‌ن كۆمپانیایه‌كی یابانییه‌وه دروستكراوه، ئه‌و كه‌لوپه‌لانه‌ی ماوه‌یان به‌سه‌رچووه، له بازاڕ نەماون."
له‌باره‌ی كه‌موكوڕی ئۆكسجین له نه‌خۆشخانه‌كانی هه‌ولێر، به تایبه‌ت نه‌خۆشخانه‌ی ڕزگاری، مافپه‌روه‌ر هێمن قادر وتی: "سه‌رچاوه‌ی ئۆكسجین، چه‌ند جۆرێكی هه‌یه، ئۆكسجین له ڕێگه‌ی ئه‌و نه‌خۆشخانانه‌ی كه نه‌خۆشخانه‌ی گه‌وره‌ن وه‌كو نه‌خۆشخانه‌ی شاری هه‌ولێر، خۆی ئامێری كارگه‌ی ئۆكسجینی هه‌یه، به‌ڵام به‌داخه‌وه له كاركه‌وتووه چه‌ند ساڵێكه، ئێستا خه‌رێكی چاره‌سه‌ر و چاكردنه‌وه‌ین، له 10 ڕۆژی داهاتوو چاكده‌كرێته‌وه، به‌ڵام به‌دیلی ئه‌وه ئۆكسجینی شل به‌كاردێت، بۆ نه‌خۆشخانه، به‌ڵام به‌هه‌مان شێوه توانای نه‌خۆشخانه‌كه له ڕووی بینا و له ڕووی لۆجیستیكه‌وه ئه‌و سیسته‌مه مه‌ركه‌زییه‌ی كه هه‌یه‌تی، بۆ دابه‌شكردنی ئۆكسجین له ژووره‌كان و له شوێنی چاودێری چڕ به‌شێكییان له كاركه‌وتوون به‌دیلیشییان نییه بۆ گۆڕینییان، چونكه له ساڵی 1984له لایه‌ن كۆمپانیایه‌كی یابانییه‌وه دروستكراوه، ئه‌و كه‌لوپه‌لانه‌ی ماوه‌یان به‌سه‌رچووه، له بازاڕ نەماون وه‌كو یه‌ده‌گ بكڕدرێت و به‌كاربهێنرێت، بۆیه ئیعتمادی زۆری نه‌خۆشخانه له‌سه‌ر ئۆكسجینی بوتڵه، ئۆكسجینی بوتڵیش له‌ڕووی به‌كارهێنانییه‌وه زۆر سه‌خته زۆر ئه‌سته‌مه ئه‌و هه‌موو بوتڵه ئۆكسجینه له 5 نهۆمی نه‌خۆشخانه به‌كاربهێنیت. له‌وانه‌یه ئه‌سته‌م بێت و ئاسان نه‌بێت به‌ڵام خۆشبه‌ختانه ئێمه توانیمان وه‌كو به‌ڕێوه‌به‌رایه‌تی گشتی ته‌ندروستی هه‌ولێر و ئێمه‌ش وه‌كو ئیداره، كه سه‌رپه‌رشتیمانكردووه هاوكارییان بووین له كاتی ئێستا كێشه‌كه نه‌ماوه و ئۆكسجینی باش دابین ده‌كرێت، به‌ڵام سیسته‌می پێدانی به‌نه‌خۆشه‌كان وه‌كو پێویست نییه، خوازیارین كه چاره‌سه‌ر بكرێت یان ئه‌گه‌ر ڕێژه‌ی بڵاوبوونه‌وه‌ی ڤایڕه‌سه‌كه به‌ره‌و كه‌می بڕوات نه‌خۆشه‌كان بگوازرێنه‌وه نه‌خۆشخانه‌ی تر و ئه‌و نه‌خۆشخانه‌یه به‌تاڵ بكه‌ین و به‌كاری نه‌هێنیین بۆ چاره‌سه‌ری نه‌خۆشی كۆرۆنا."
مافپه‌روه‌ر هێمن قادر، ڕونیشیكرده‌وه " وه‌كو باسم كرد ئه‌سته‌مه و قورسه گواستنه‌وه‌ی ئه‌و بوتڵانه به‌ڵام ڕۆژانه ئه‌وه ده‌كرێت، ڕۆژانه زیاتر له 200 بوتڵ له نهۆمه‌كان دابه‌ش ده‌كرێت و ئه‌وه‌ی كه به‌تاڵ ده‌بێت جارێكی تر پڕده‌كرێته‌وه، له كارگه و ڕه‌وانه‌ی چاودێری چڕ ده‌كرێت، به‌ڵام له ساڵانی ڕابردوو ئه‌و پێویستییه زۆره‌ی ئۆكسجین نه‌بووه، بۆ نموونه ئه‌و ئۆكسجینه شله‌ی كه به‌كاردێت له نه‌خۆشخانه‌ی ڕزگاری كاتی خۆی له مانگێكدا 10 ته‌ن ئۆكسجین پێویست بووه، به‌ڵام له‌گه‌ڵ بڵاوبوونه‌وه‌ی ڤایڕه‌سی كۆرۆنا، له 48 كاتژمێردا 10 ته‌ن ئۆكسجین پێویسته. كه‌واته گۆڕانكاری به‌سه‌ر خواستی ئۆكسجین هاتووه، كه زۆربه‌ی زۆری ئه‌وانه‌ی كه هه‌ڵگری ڤایڕه‌سی كۆرۆنان و له ده‌ست ئه‌و نه‌خۆشه ده‌ناڵێن پێویستییان به ئۆكسجینه، به‌ڵام كاتی خۆی جۆره‌ها نه‌خۆشی هه‌بووه، چاره‌سه‌ر و نه‌شته‌رگه‌رییه‌كان هه‌بووه له‌وانه‌یه ئه‌گه‌ر چاودێری چڕ نه‌بووایه پێویستییان به ئۆكسجین نه‌ده‌بوو، بۆیه كاتی خۆی به‌و پێویستییه نه‌بووه، به‌ڵام ئێستا پێویستییه‌كی زۆره، زۆربه‌ی زۆری ئه‌وانه‌ی كه ده‌چنه نه‌خۆشخانه بۆ چاره‌سه‌ر وه‌رگرتنی ڤایڕه‌سی كۆرۆنا پێویستییان به ئۆكسجین ده‌بێت."
"ئه‌و كه‌سه‌ی وێنه‌ی بڵاوكرایه‌وه بوتڵی ئۆكسجینی ده‌فرۆشت مۆڵه‌تی فرۆشتنی كه‌لوپه‌لی پزیشكی نه‌بوو ده‌ستگیركرا "
"ئه‌و بوتڵانه‌ی كه له‌سه‌ر شه‌قامه‌كانن له هه‌موو ئه‌و شوێنانه‌شی كه پێداویستی پزیشكییان لێ ده‌فرۆشرا، ئێمه له‌شاری هه‌ولێر شه‌قامی پزیشكان و شه‌قامی 40 مه‌تریمان هه‌یه، كه پێداویستی ته‌ندروستی لێده‌فرۆشرێت، كاتی خۆشی ئه‌و بوتڵانه هه‌بوون، به‌ڵام كه ئێستا خواستێكی زۆر هه‌یه و خه‌ڵكێكیش له ماڵه‌كانی خۆیان چاره‌سه‌ر وه‌رده‌گرن له‌وانه‌یه بیریان بۆ ئه‌وه بچێت وه‌كو یه‌ده‌گێك بوتڵی ئۆكسجین، له لای خۆیان دابنێن و بیكڕن و له ماڵه‌وه دایان نێن، ئه‌و وێنه‌یه‌ی كه بڵاوكراوه‌ته‌وه كه‌سێكه كه مۆڵه‌تی فرۆشتنی پێداویستی ته‌ندروستی نییه، هه‌ر ئه‌مڕۆ ده‌ستگیركراو و ده‌ستی به‌سه‌ردا گیرا، و ڕێ و شوێنی پێویستی له‌گه‌ڵ كرا." هێمن قادر جێگری پارێزگاری هه‌ولێر وایوت"
" ئه‌گه‌ر هاوڵاتییان له‌ماڵ و كۆڵانه‌كانی خۆیان، خۆیان نه‌پارێزن قه‌ده‌غه‌ی هاتوچۆ هیچ ئامانجێك ناپێكێت "
ده‌رباره‌ی ئه‌وه‌ی ئایا له به‌رنامه‌تاندانیه قه‌ده‌غه‌ی هاتوچۆی ته‌واوه‌تی له پارێزگای هه‌ولێر ڕابگه‌یه‌نن؟ جێگری پارێزگاری هه‌ولێر، ده‌ڵێت: " ئێمه كاتی خۆی ئه‌و بابه‌تانه‌مان هه‌مووی تاقیكرده‌وه، قه‌ده‌غه‌ی هاتوچۆشمان ڕاگه‌یاند، ڕێكاره‌كانی خۆپارێزیمان كرد، زیاتر له مانگێك ئێمه قه‌ده‌غه‌ی هاتوچۆمان به قۆناغ قۆناغ ڕاگه‌یاند، به‌ڵام بووه هۆی ڕاوه‌ستانی كاروكه‌سابه‌تی هاوڵاتییان، له زۆر بواردا حكومه‌تیش توشی شه‌له‌ل بوو، بۆیه ئێمه له كاتی ئێستادا پێمان باشه هاوڵاتییان خۆیان بپارێزن، چونكه ئه‌گه‌ر ئێمه قه‌ده‌غه‌ی هاتوچۆش ڕابگه‌یه‌نیین به‌شێوه‌یه‌كی شكلی به‌رچاو له شه‌قامه سه‌ره‌كییه‌كان، له نێوان شاره‌كان به‌ڵام ئه‌گه‌ر هاوڵاتییان له كوچه و كۆڵانه‌كان له گه‌ڕه‌كه‌كان له ماڵه‌كانی خۆیان، خۆیان نه‌پارێزن هیچ ئامانجێك ناپێكێت ئه‌و بابه‌ته، بۆیه ئێمه گه‌یشتوینه‌ته ئه‌وه‌ی كه ده‌بێت ژیان له‌گه‌ڵ كۆرۆنا به‌ڕێبكه‌ین له‌هه‌مان كاتیشدا داوامان كردووه و داواش ده‌كه‌ین به‌رده‌وام كه هاوڵاتییان خۆیان پابه‌ندی ڕێنماییه‌كانی خۆپارێزی بن، بۆئه‌وه‌ی نه‌بنه هه‌ڵگری ئه‌و ڤایڕه‌سه، ئه‌گه‌ر كاریگه‌ری له‌سه‌ر خۆشیان نه‌بێت، كاریگه‌ری ده‌بێت له‌سه‌ر خه‌ڵك و ئه‌وانه‌ی كه نه‌خۆشن و چونه‌ته ته‌مه‌نه‌وه."
"پێشبینی ئه‌وه ده‌كه‌ین له چه‌ند ڕۆژی داهاتوو-دا دۆخه‌كه به‌ره‌و خراپتر بڕوات"
جێگری پارێزگاری هه‌ولێر، ئه‌وه‌شی ڕاگه‌یاند " ئێمه پێشبینی ئه‌وه ده‌كه‌ین، كه دۆخه‌كه به‌ره‌و خراپتر بڕوات له چه‌ند ڕۆژی داهاتوو، چونكه په‌تاكه به‌و شێوه‌یه بڵاوبۆته‌وه كه له كۆنتڕۆڵ ده‌رچووه، به‌ڵام وه‌كو چاره‌سه‌ر وه‌رگرتن تاوه‌كو ئێستا له‌ژێر كۆنتڕۆڵه، هاوڵاتییان وه‌كو پێویست خۆپارێزی ناكه‌ن و ماسك به‌كارناهێنن، له هه‌ندێك شوێن بۆته هۆكاری ئه‌وه، كه ڤایڕه‌سه‌كه ته‌شه‌نه بكات تاوه‌كو ئێستا هه‌موو تیمه‌كانی ته‌ندروستی و تاقیگه‌ی ناوه‌ندی و نه‌خۆشخانه‌كانی كۆرۆنا نه‌خۆش وه‌رده‌گرن و چاره‌سه‌ر بۆ نه‌خۆش ده‌كه‌ن، و نه‌خۆشیش چاك ده‌بێته‌وه، ڕێنمایی ته‌ندروستیش وه‌رده‌گرێت له‌گه‌ڵ ئه‌وه‌شدا سستی هه‌یه و توانا و تاقه‌تی ته‌ندروستی هه‌ولێر سنورداره و هاوڵاتیانیش ده‌بێت هاوكاربن له‌و بواره."
PM:12:05:05/08/2020
ئه‌م بابه‌ته 1512
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت