سەرکردەیەکی گۆڕان: چاکسازی دوایین چارەسەرە و ناکرێت چاومان لە بەغدا بێت
وێستگەنیوز-
سکرتێرى جڤاتى نیشتمانى بزوتنەوەى گۆڕان رایگەیاند، ئەگەر ئیرادەیەک هەبێت بۆ چاکسازی ئەوا دەکرێت مانگانە ملیۆنان دۆلار بگەڕێتەوە بۆ خەزێنەى گشتى لە برى گیرفانى حزب، دەشڵێت، خواستی مەرکەزییەت لە بەغدا بەرەو بەهێزبوون دەڕوات و رۆڵی هەرێم و پارێزگاکان تا دێت لاواز دەبێت.
عەدنان عوسمان، سکرتێرى جڤاتى نیشتیمانى بزوتنەوەى گۆڕان بە رۆژنامەی (زەمەن)ی رایگەیاندوە، چاکسازی، کۆنتڕۆڵکردنى داهاتەکان و بەشێک لە سەروەت و سامانى کۆمپانیا حزبییەکان دواین چارەسەرن بۆ رزگاکردنی هەرێم و بەرەنگاربوونەوەی قەیرانی دارایی، چونکە "لە ئێستادا تاڵانییەکى گەورە هەیە، گەرچارەسەربکرێت دۆخى هەرێم دەبوژێتەوە".
لەبارەی پەیوەندییەکانی نێوان هەولێر و بەغدا، ئەو بەرپرسەی گۆڕان ئەوەی خستوەتەڕو، رێککەوتن لەگەڵ بەغدا سەخت و دژوارە و بژاردە بەهێزەکە نێوخۆى هەرێمی کوردستانە نەک بەغدا، چونکە "رۆحى مەرکەزییەت لە بەغدا تا دێت بەهێزتر دەبێت و رۆڵی هەرێم و پارێزگاکانیش لاوازتر دەبێت".
پرسی چاکسازی لە ئێستادا پرسی شەقام و حکومەت و پەرلەمانی کوردستانە و بە وتەی عەبدولحەكیم خەسرۆ، بەرپرسی فەرمانگەی هەماهەنگی و بەدواداچوونی حكومەتی هەرێمی كوردستان، هەموو ئەو بوارانەی یاسای چاکسازی دەستنیشانی كردووە، لە 7/1 ەوە كاریان لەسەر دەكرێت و پڕۆسەی چاکسازی دەستپێدەکات.
AM:08:45:30/06/2020
ئه‌م بابه‌ته 1372
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت