وێستگە نیوز-
نێچیرڤان بارزانی و دۆناڵد ترەمپ لە شاری داڤۆس لە سویسرا کۆبوونەوە.
کۆبوونەوەی لوتکەی نێوان نێچیرڤان بارزانی، سەرۆکی هەرێمی کوردستان و دۆناڵد ترەمپ، سەرۆکی ویلایەتە یەکگرتووەکانی ئەمریکا لە پەرواێزی لوتکەی داڤۆس لە سویسرا بەڕێوەچوو و بەگوێرەی زانیارییەکان پرسەکانی پەیوەست بە عیراق و ناوچەکە تاوتوێ کراون.
دوێنێ سێشەممە 21 ی کانونی دووەمی 2020 لە شاری داڤۆس لە سویسرا گەورەترین لوتکەی ئابوری جیهان کە بە کۆڕبەندی داڤۆس ناسراوە کارەکانی دەستپێکرد.
کۆڕبەندەکە تا 24 ی ئەم مانگە بەردەوام دەبێت 53 سەرۆک و نزیکەی 700 بەرپرس بەشداری تێدا دەکەن و تیشک دەخەنە سەر کێشەکانی جیهان، شاندێکی باڵای هەرێمیش بە سەرۆکایەتی نێچیرڤان بارزانی بەشدارن لە کۆڕبەندەکەدا.
بە گوێرەی زانیارییەکان نێچیرڤان بارزانی لە پانێڵی "ناسەقامگیری رۆژهەڵاتی ناوەڕاست" بەشداری سەرەکی دەبێت و بە زمانی کوردی وتەکانی پێشکەش دەکات.
کۆڕبەندی ئابوری جیهانی داڤۆس ماوەی 50 ساڵە بە بەردەوامی ساڵانە بەڕێوەدەچێت، بۆ ئەمساڵیش سێ هەزار کەس لە بازرگان و سیاسەتوان و چالاکوانان لە 118 وڵاتی جیهانەوە بەشدارن.
لە چوار رۆژی کۆڕبەندەکەدا 175 پانێڵ لەسەر حەوت بواری سەرەکی بەڕێوەدەچن.
ش . ر
PM:12:57:22/01/2020