"بە پێچەوانەی ئەوانەی دەڵێن تەنها شاخەكان دۆستی كوردن، من پێموایە كورد ئیستا دۆستی زۆرە"



وێستگە نیوز-
سەرۆكی جوڵانەوەی نەوەی نوێ‌ جەخت لەوە دەكاتەوە، ئێستا هیچمان نەكردبێت لانیكەم دونیا و ئەمریكا و كۆمەڵگای نێو دەوڵەتییمان كردوە بە دوو كەرتەوە و هەمویان لە نێوان كورد و توركیادا قەلەقن.

شاسوار عەبدولواحید، سەرۆكی جوڵانەوەی نەوەی نوێ‌ لەبارەی دۆخی ئێستای هەرێمی كوردستانەوە لە لاپەڕەی خۆی لە تۆڕێ‌ كۆمەڵایەتی فەیسبوك نوسیویەتی"من پێموایە بەپێچەوانەوە ئەم دۆخە دەبێتە بازدانێكی گەورە بۆ بەرەوپێشبردنی دۆزی كورد، وەك چۆن دوای ساڵی ١٩٩١ و راپەڕیین و كۆڕەوی هاوڵاتییان، بۆ یەكەمجار بە بڕیاری ئەنجومەنی ئاسایشی نێودەوڵەتیی، پشتگیریی لە كورد كرا".

هەروەها نوسیویشیەتی"لە ئەمریكا كورد دۆستی زۆرە و شەقام و سیاسییەكانی ئەمریكای كردوە بە دوو كەرتەوە، كەرتێكی گەورەی لەگەڵ كوردەكاندان و كەرتێكی زۆر بچوكیش لەگەڵ ترەمپ'دان (لە دوایین دەنگدانی كۆنگرێسی ئەمریكادا ٣٥٤ ئەندامی كۆنگرێس دەنگیان دژ بە هێرشی توركیا بۆ سەر كورد دا و تەنها ٦٠ كۆنگرێسمان دژی بریارەكە بوون".

دەقی نوسینەكە:

"The night is darkest before dawn"

"شەو" لەوپەڕی تاریكییدایە لە پێش "بەرەبەیان" - پەندێكی ئینگلیزیی

دەمەوێت لەم پەندەوە باس لە ئێستای دۆخی كورد بكەم، ئایا دۆخی كورد هێندە خراپە؟! داهاتوومان بەرەو كوێ دەڕوات؟

سەرباری هاوسۆزیمان بۆ برا و كەسوكارمان لە رۆژئاوا و سەرباری ئەوەی كە لە روی حیزبی و میدیایی و عیلاقاتمانەوە توانیبێتمان و بتوانین، ئەوا درێخی ناكەین و بەردەوام دەبین لە پشتیوانی بەشێكی میلەتەكەمان لە رۆژئاوا، بەڵام مەبەست لەم پەندە ئەوەیە دوای ئەوپەڕی تاریكیی شەو، رووناكیی و بەرەبەیان دێت، بۆیە بە پێچەوانەی زۆرێكەوە، سەرەڕای ئەو هەموو نەهامەتییەی رووبەروومان بۆتەوە، سەرەڕای غیابی سەركردایەتییەكی كوردیی حەكیم، نەبوونی كاری پێكەوەیی، بوونی پەرتەوازەیی و خۆخۆرییەكی سەرتاپاگیر، بێهەڵوێستیی حیزبە سیاسییەكان و بێدەنگبوونیان، سەرەڕای ئاوارەیی، مەرگ و ماڵوێرانیی كە جارێكیتر یەخەی پێگرتووینەتەوە، بەڵام پێموایە دۆخی كورد بە گشتیی هەنگاوێكی گەورە دەچێتە پێشەوە، كورد و جەنگاوەرە ئازاكانی و هاوڵاتییان، پێویستییان بە ورە بەرزكردنەوە و ئیرادە پێبەخشیینە. ئەوە دوژمن و نەیارەكانن دەیانەوێ ورە و ئیرادەمان بڕوخێ و تەسلیم ببین.

من پێموایە بەپێچەوانەوە ئەم دۆخە دەبێتە بازدانێكی گەورە بۆ بەرەوپێشبردنی دۆزی كورد، وەك چۆن دوای ساڵی ١٩٩١ و راپەڕیین و كۆڕەوی هاوڵاتییان، بۆ یەكەمجار بە بڕیاری ئەنجومەنی ئاسایشی نێودەوڵەتیی، پشتگیریی لە كورد كرا.

بە پێچەوانەی ئەوانەی دەڵێن تەنها شاخەكان دۆستی كوردن، من پێموایە كورد ئیستا دۆستی زۆرە.

لە ئەمریكا كورد دۆستی زۆرە و شەقام و سیاسییەكانی ئەمریكای كردوە بە دوو كەرتەوە، كەرتێكی گەورەی لەگەڵ كوردەكاندان و كەرتێكی زۆر بچوكیش لەگەڵ ترەمپ'دان (لە دوایین دەنگدانی كۆنگرێسی ئەمریكادا ٣٥٤ ئەندامی كۆنگرێس دەنگیان دژ بە هێرشی توركیا بۆ سەر كورد دا و تەنها ٦٠ كۆنگرێسمان دژی بریارەكە بوون، بە نزیكیی هەموو دیموكراتەكان و دوو لەسەر سێی هەموو كۆمارییەكان لە بەرژەوەندیی كورد دەنگیان دا).

جگە لەوە، ئێستا كورد لە هەمو ئەوروپا و وڵاتانی زلهێز دۆستی هەیە، لە هۆڵی هەموو پەرلەمانەكانی ئەوروپا و دونیادا چەندیین دۆستی كورد هەن.

لە بەشێكی وڵاتانی عەرەبیی و ئیسلامییدا بەرگریی لە كورد دەكرێت و دژی لەشكركێشییەكە قسە دەكەن.

تەنانەت لە ناو خودی توركیادا دەنگی غەیرە كورد هەیە دیفاع لە كورد دەكات.

ئەمە ساڵانی هەشتاكان نیە ١٨٠ هەزار مرۆڤی كورد ئەنفال بكرێن، كیمیایی بكرێت بە سەر هەڵەبجەدا و كەس لەسەرمان هەڵنەدات.

ئەمە ساڵانی هەشتاكان نیە كورد دڵی بە وتارێكی رۆژنامەیەكی بیانی خۆش بێت و كەس نەبێت ناوی بهێنێت.

ئەمە ساڵانی هەشتاكان نیە كورد توشی كیمیابارانی هەڵەبجە بێتەوە و هیچ میدیایەك باسی نەكات، چونكە ئێستا سەردەمی میدیا و سۆشیال میدیا و گڵۆباڵیزمە.

ئێستا هیچمان نەكردبێت، لانیكەم دونیا و ئەمریكا و كۆمەڵگای نێو دەوڵەتییمان كردوە بە دوو كەرتەوە و هەمویان لە نێوان كورد و توركیادا قەلەقن.

لە نێوان كوردێك كە جاران دەیانگوت تەنها شاخەكان دۆستیەتی و لە نێوان توركیایەك كە ساڵانێكی زۆر لە جەنگی سارد دۆستی رۆژئاوا و ئەمریكا بوو، چوارەم هێزی ناو ناتۆیە، پاشماوەی ئیمپڕاتۆریەتی عوسمانییە، دەروازەی رۆژهەڵاتی ئەوروپایە. كەچی كۆمەڵگای نێودەوڵەتیی قەلەقن لە نیوان ئەم توركیایە و ئەو كوردە بێ پشتوپەنایەدا.

ئەمە خۆی لە خۆیدا بەرەوپێشچوونی دۆخی كوردە و چاوەڕوان دەكەم لە داهاتوودا كورد و قەزیە سیاسییەكەی هەنگاوێكی تری گەورە بچێتە پێش.

بەعس ٣٠ ساڵ هەوڵیدا كورد بسرێتەوە، بەڵام نەیتوانی و شكستی هێنا، جاران كوردەكانی سوریا ئاواتیان ئەوە بوو تەنها پێناسی باری شارستانییان هەبێت و وەك هاوڵاتیی سوریی مافیان هەبێت، كەچی ئێستا دونیا باسیان دەكات و هاوسۆزن لەگەڵماندا، بۆیە بێهیوا مەبن، دوای هەموو تاریكییەك، رووناكیی و بەرەبەیان دێت.

خوای گەورەش دەفەرموێت: {فَإِنَّ مَعَ الْعُسْڕ یُسْرًا}.


PM:06:31:21/10/2019


ئه‌م بابه‌ته 2256 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت