"به‌رپرسی چاوچنۆك بە بازرگانیی نەوت و دەرمان تێرنەبوون، خوێندنیشیان کرد بە پاره‌"

‌كازم فاروق، سه‌رۆكی فراكسیۆنی نه‌وه‌ی نوێ

وێستگه‌ نیوزـ

سه‌رۆكی فراكسیۆنی نه‌وه‌ی نوێ له‌ په‌رله‌مانی كوردستان ده‌ڵێت ئه‌مساڵ ته‌نها 35%ی خوێندكاران و قوتابیان له‌ زانكۆ و په‌یمانگاكان به‌ خۆڕایی وه‌رده‌گیرێن، "مەسئولی چاوچنۆكیش بە تیجارەتی نەوت و دەرمان تێرنەبوون، خوێندنیشیان کرد بە تیجارەت".

كازم فاروق، سه‌رۆكی فراكسیۆنی نه‌وه‌ی نوێ له‌ په‌رله‌مانی كوردستان راگه‌یاندوه‌:  ئەمسال تەنها 35%ی خوێندکاران و قوتابییان بە خۆڕایی لە زانکۆ و پەیمانگەکان وەردەگیرێن، بەپێی ئەوەی کە وەزارەتی خوێندنی باڵاش ڕایگەیاندوه‌،  24،784 کورسی لە زانکۆی حکومی (بەخۆڕایی) و 10،514 کورسی لە زانکۆی حکومی پاراڵێڵ (بە پارە) و 11،577 کورسی لە زانکۆی حکومی ئێواران (بە پارە) و 23،714 کورسی لە زانکۆی ئەهلی (بە پارە)یه‌.

سه‌رۆكی فراكسیۆنی نه‌وه‌ی نوێ رونیكردوه‌ته‌وه‌ و ده‌ڵێت: "کەواتە حکومەت تەنها ٣٥%ی کورسی خوێندن بەخۆڕایی بۆ خوێندکاران دابین دەکات و 65%ی خوێندکاران دەبێت لەم دۆخە سەختەدا پارە بدەن بۆئەوەی شەهادەیەك بەدەست بهێنن. نازانم ئەمە ناوبنێم پلان یان پیلان؟"

راشیگه‌یاندوه‌: "لە سەرەتای ئەم مانگەدا لەپەرلەمان هاوارمان کرد تکایە بەسە هەموو شتێک لە خوێندکار کراوە بە پارە، شەرمە لە وڵاتی نەوتدا کوڕ و کچەکانمان پارە بدەن بۆئەوەی شەهادەیەک بەدەست بهێنن."

كازم فاروق گله‌یی له‌ وه‌زاره‌تی خوێندنی باڵا كردوه‌ و رایگه‌یاندوه‌: "مەسئولی چاوچنۆك بە تیجارەتی نەوت و دەرمان تێرنەبوون، خوێندنیشیان کرد بە تیجارەت و پارە، وەزارەتیش لەباتی ئەوەی لەبەرەی خەڵک بێت، کەچی گیرفانی بەتاڵی خوێندکارەکانمان دەخاتە بەر چنگی تیجارەتی زانکۆ و پەیمانگە ئەهلیەکان."


AM:12:00:12/09/2019


ئه‌م بابه‌ته 976 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت