هێزه‌ ئه‌منییه‌كانی عیراق هه‌ڵیانكوتایه‌سه‌ر چه‌ند شوێنێكی دیكه‌ی قومار كردن

‌وێنە-گێتی

وێستگه‌ نیوزـ

هێزێكی سه‌ربه‌ نوسینگه‌ی پشكنه‌ری گشتیی سه‌ربه‌ وه‌زاره‌ین ناوخۆی عیراق هه‌ڵمه‌تێكی هه‌ڵكوتانه‌سه‌ر و پشكنینی بۆ هۆڵه‌كانی رۆڵێت و قوماركردن له‌ به‌غدای پایته‌خت ئه‌نجامدا.

وه‌زاره‌تی ناوخۆی عیراق له‌ به‌یاننامه‌یه‌كدا رایگه‌یاند هه‌ڵمه‌ته‌كه‌ ئه‌مرۆ دووشه‌ممه‌ 9ی ئه‌یلولی 2019، له‌ سێ هۆتێلی به‌غدا ئه‌نجامدراوه‌ و بۆ جێبه‌جێكردنی بڕیاره‌كانی دادگاش بووه‌ كه‌ فه‌رمانی ده‌ستگیركردنی بۆ خاوه‌ن قومارخانه‌كان به‌تۆمه‌تی سپی كردنه‌وه‌ی پاره‌ و ره‌وانه‌كردنی بۆ ده‌ره‌وه‌ی وڵات بۆ ده‌ركردون.

له‌ به‌یاننامه‌كه‌دا هاتووه‌، به‌پێی ئه‌و لێكۆڵینه‌وانه‌ی له‌گه‌ڵ 189 كه‌س كراوه‌، ده‌ركه‌وتووه‌ خاوه‌نی ئه‌و سێ هۆتێله‌ ده‌ستیان له‌ سپی كردنه‌وه‌ی پاره‌ و به‌رتیل دان به‌ چه‌ند گه‌وره‌ ئه‌فسه‌رێك هه‌بووه‌ تا رێگه‌یان پێ بده‌ن به‌ شێوه‌یه‌كی نایاسایی قومارخانه‌كانیان به‌ڕێوه‌به‌رن و بێده‌نگیی لێ بكه‌ن.

له‌ به‌شێكی به‌یاننامه‌كه‌ی وه‌زاره‌تی ناوخۆی عیراقدا هاتووه‌ كه‌ له‌ هه‌ڵمه‌ته‌كه‌ی ئه‌مڕۆدا ده‌ست به‌سه‌ر چه‌ند ئامێرێكی رۆڵێت و قوماركردندا گیراوه‌ و لێكۆڵینه‌وه‌ش له‌گه‌ڵ سه‌رجه‌م تۆمه‌تباراندا به‌رده‌وامه‌ بۆ ده‌ستگیركردنی سه‌رجه‌م ئه‌و كه‌سانه‌ی له‌ دۆسیه‌ی قومارخانه‌كاندا تێوه‌گلاون.

له‌ 6ی ئابی 2019ش، به‌ڕێوه‌به‌رایه‌تی ئاسایشی حه‌شدی شه‌عبی رایگه‌یاند كه‌ له‌ به‌غدا هه‌ڵمه‌تێكیان بۆ سه‌ر قومارخانه‌كان و ئه‌و شوێنانه‌ی كڕین و فرۆشتن به‌ مادده‌ی هۆشبه‌ر و ئافره‌ته‌وه‌ ده‌كه‌ن، ئه‌نجامداوه‌ و توانیویانه‌ سه‌رۆكی‌ گه‌وره‌ترین مافیای عیراقی ده‌ستگیربكه‌ن.



PM:07:40:09/09/2019


ئه‌م بابه‌ته 488 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت